“Taunimanima momo do idia heau lao, heau mai, bona aonega [o hereva momokani, NW] do ia bada herea.”​—⁠DAN. 12:4.

EDENA BAMONA DO OI HAERE?

Hari, taunimanima be edena dala ai “hereva momokani” idia dibaia?

Edena dala ai hereva momokani idia abia dae taudia idia “momo” idia lao?

Edena dala ai hereva momokani be gabu ibounai ia lao?

1, 2. (a) Edena dala ai ita diba Iesu be hari bona nega vairai ita ida do ia noho? (b) Daniela 12:4 hegeregerena, haida be Baibel idia stadilaia namonamo neganai, dahaka ia vara?

 MANI oi laloa, oi be Paradaiso ai oi noho. Daba ibounai mai moale ida oi noga bona gaukara idauidau oi karaia. Oi dekenai hisihisi o gorere ta be lasi. Gau idauidau oi itaia, kamonai, mamia, dogoatao bona bonaia namonamo diba. Emu goada be bada, emu gaukara oi moalelaia, emu turadia be momo bona gau ta oi lalohekwarahilaia lasi. Iehova ena Basileia ese tanobada ia lohiaia neganai, unai hahenamo idauidau do oi moalelaia. King Iesu Keriso ese taunimanima ibounai do ia hanamoa, bona durudia Iehova idia dibaia totona.

² Unai nega ai, Dirava bona ena Natuna ese abidadama taudia do idia durua, ma haida dekenai Iehova ena dala idia hadibaia totona. Oibe, nega ibounai Iehova bona Iesu ese Keristani taudia idia durua unai idia karaia totona. Iesu be guba ai ia do daekau lasi neganai, ena hahediba taudia dekenai ia gwau: “Lau be dina iboudiai umui ida do lau noho.” Anina be Iesu ese idia do ia durua noho. (Mataio 28:19, 20 duahia.) Iseda abidadama unai gwauhamata dekenai ia goada totona, lagani 2,500 gunanai Daniela ese Babulonia ai ia torea peroveta herevana ta do ita stadilaia. Daniela ese iseda nega be inai bamona ia herevalaia: “Taunimanima momo do idia heau lao, heau mai, bona aonega [o hereva momokani, NW] do ia bada herea.” (Dan. 12:4) Hari ita laloparara inai hereva “heau lao, heau mai” be stadi namonamo karana ia herevalaia. Inai peroveta herevana ese ia hahedinaraia, Baibel idia stadilaia namonamo taudia be Dirava ena hereva momokani do idia diba. Danu, unai peroveta herevana ia gwau, “hereva momokani do ia bada herea.” Hereva momokani idia  abia dae taudia ese idia dibaia gaudia be ma haida idia hadibaia. Danu, gabu ibounai taunimanima ese hereva momokani do idia dibaia. Hari, unai peroveta herevana ia guguru dalana do ita stadilaia. Unai amo eda abidadama do ia goada bona ita abia dae momokani, hari Iesu be ena hahediba taudia ida ia noho, bona Iehova be ena gwauhamata nega vaira totona do ia hagugurudia.

KERISTANI KORIKORIDIA ESE “HEREVA MOMOKANI” IDIA DAVARIA

3. Aposetolo taudia idia mase murinai dahaka ia vara?

³ Paulo ia gwau aposetolo taudia idia mase murinai, momo be hereva momokani do idia mogea, bona unai kara do ia bada ia lao. (Kara 20:28-30; 2 Tes. 2:1-3) Lagani momo lalodiai, sibona idia gwauraia Keristani taudia be “hereva momokani” idia diba lasi. Dubu gunalaia taudia idia gwau Baibel idia abidadama henia, to “demoni edia hadibaia hereva” o Dirava matauraia lasi koikoi herevadia, be taunimanima dekenai idia hadibaia. (1 Tim. 4:1) Unai dainai, momo be Dirava ena hereva momokani idia diba lasi. To, hahediba hereva koikoidia idia abia dae hegeregere, Dirava be Toi Tamona, souli ia mase diba lasi, bona souli be hel lahina ese ia gabua ela bona hanaihanai.

4. Lagani 1870 lalodiai, Keristani korikoridia be edena dala ai “hereva momokani” idia tahua?

⁴ To, ‘dina gabedia’ ia do matamaia lasi neganai, lagani 1870 ai gau haida idia idau. Pennsylvania, U.S.A. ai, Keristani korikoridia haida idia hebou, bona hereva momokani tahua totona Baibel idia stadilaia. (2 Tim. 3:1) Edia ladana be Bible Student taudia. Iesu ia gwau, “aonega bona diba bada taudia” be “hereva momokani” do idia davaria lasi. To, Baibel Student taudia be unai bamona taudia lasi, badina idia manau bona idia ura Dirava ena ura do idia karaia. (Mat. 11:25) Bible Student taudia be Baibel siri idia duahia, herevalaia bona Dirava ena heduru totona idia guriguri. Baibel siri idauidau idia hahegeregerea, bona guna Baibel ena hereva idia tahua taudia edia toretore idia stadilaia. Metairametaira, Bible Student taudia ese lagani momo lalodiai idia diba lasi herevadia edia anina idia lalopararalaia.

5. Dahaka dainai Bible Student taudia ese pepapepa ladana The Old Theology haida idia printaia?

⁵ Bible Student taudia be idia davaria gaudia dainai idia moale bada, to idia hekokoroku lasi. Idia laloparara unai hereva momokanidia be hanaihanai Baibel ai idia noho. Unai dainai, ma haida dekenai idia gwau lasi idia davaria gaudia be hereva matamatadia. (1 Kor. 8:1) To, taunimanima idia durua Baibel ena hereva momokani idia dibaia totona, pepapepa ladana The Old Theology haida idia printaia. Unai pepapepa ginigunadia ese momo idia durua Iesu bona aposetolo taudia edia hahediba herevadia idia abia dae, bona ‘sene herevadia’ idia dadaraia totona.​—⁠The Old Theology, No. 1, April 1889, rau 32.

6, 7. (a) Lagani 1870 amo Iehova ena Witnes taudia be dahaka hereva momokani idia dibaia? (b) Oi be edena hereva momokani oi moalelaia?

⁶ Lagani 1870 amo, Iehova ena Witnes taudia be hereva momokanidia momo idia dibaia. a Unai hereva momokanidia ita stadilaia neganai, ita dibaia gaudia ese eda mauri idia hanamoa, moale ita davaria bona nega vaira totona helaro ita abia. Ita idia durua eda lalokau Diravana, Iehova ita dibaia, bona iena ura ita lalopararalaia totona. Danu, idia hahedinaraia Iesu Keriso be daika, dahaka dainai tanobada ia mai bona ia mase, bona hari dahaka ia karaia  noho. Hereva momokanidia ese ita idia durua unai amo, Dirava ese dika ia koua lasi ena badina, guriguri ita gwauraia dalana, bona moale korikorina davaria dalana ita dibaia.

⁷ Peroveta herevadia haida be nega daudau lalonai idia “hunia” bamona, to hari edia anina ita lalopararalaia bona idia guguru noho. (Dan. 12:9) Unai peroveta herevadia momo be Evanelia bukadia bona Apokalupo bukana lalonai. Hegeregere, Iehova ese gubai idia vara gaudia haida be ita dekenai ia hadibaia. Unai gaudia be taunimanima ese edia matana amo idia itaia diba lasi. Ita dibaia gaudia be inai: Iesu be king ai ia lao vadaeni, guba ai tuari ta ia vara bona Satani mai ena demoni be tanobada ai idia negea diho. (Apok. 12:7-12) Danu, Dirava ese ita ia durua tanobada ai idia vara gaudia edia anina ita lalopararalaia totona. Ita laloparara dahaka dainai ‘nega aukadia idia vara, bona taunimanima idia hahekwarahia bada.’ Danu, ita laloparara dahaka dainai tuari, tano mareremarere, gorere, bona hitolo idia vara.​—⁠2 Tim. 3:1-5; Luka 21:10, 11.

8. Daika ese ita ia durua hereva momokani ita lalopararalaia totona?

⁸ Iesu ese ena hahediba taudia ia hamaorodia: “Umui itaia gaudia idia itaia taudia be idia moale. Badina umui lau hamaoroa, peroveta taudia bona king momo be umui itaia gaudia idia ura idia itaia, to idia itaia lasi bona idia ura umui kamonai gaudia idia kamonai, to idia kamonai lasi.” (Luka 10:23, 24) Oibe, ita moale danu badina Iehova Dirava ese ita ia durua hereva momokani ita “itaia” bona “kamonai” o lalopararalaia totona. Danu, ita moale badina ia ese ena lauma helaga, “durua tauna” amo ita ia durua hereva momokani ita lalopararalaia totona! (Ioane 16:7, 13 duahia.) Ita laloaboio lasi hereva momokani be gau hereadaena, bona haida do ita durua idia dibaia totona.

“MOMO” BE “HEREVA MOMOKANI” IDIA ABIA DAE

9. Watch Tower, April 1881 gauna lalonai edena boiboi herevana idia halasia?

⁹ Watch Tower, April 1881 gauna lalonai inai hereva “Haroro Taudia 1,000 Ai Tahua” idia halasia. Unai hereva lalonai tadikaka taihu idia boiria edia nega ibounai o kahana idia gaukaralaia haroro gaukara totona, bona kolpota o painia taudia ai do idia lao. Idia noidia gabu ibounai do idia lao Dirava idia lalokau henia Keristani korikoridia idia tahua, bona idia dekenai Dirava bona Baibel ena hereva momokani do idia hadibaia.

10. Haroro taudia 1,000 ena boiboi herevana idia duahia murinai, momo be dahaka idia karaia?

¹⁰ Bible Student taudia ese ma haida idia boiria idia haroro totona, badina idia laloparara Keristani korikoridia ese sivarai namona idia harorolaia be namo. To, taunimanima handred haida sibona be Bible Student taudia edia hebou dekenai idia lao, anina be reana haida be boiboi herevana idia abia dae lasi. To, momo be pepapepa o magasin ta idia duahia bona idia laloparara unai be hereva momokani, bona idia ura ma haida do idia durua. Hegeregere, lagani 1882 ai, London, England ai, tau ta be Bible Student taudia edia Watch Tower bona buklet ta ia duahia murinai, ia gwau: “Mani lau umui hadibaia edena dala ai bona dahaka hereva do lau harorolaia, unai amo Dirava ese ia hanamoa gaukarana lau karaia diba.”

11, 12. (a) Kolpota taudia edia tahua gauna be dahaka? (b) Kolpota taudia ese edena dala ai kongrigeisen matamatadia idia haginia?

¹¹ Lagani 1885 ai, kolpota taudia be 300 bamona. Edia tahua gauna be iseda tahua gauna hegeregerena: Idia ura taunimanima be Iesu ena hahediba taudia ai idia halaoa. To idia karaia dalana be iseda amo ia idau. Hari, ita be taunimanima tamona ida Baibel ita stadilaia, bena kongrigeisen  heboudia dekenai ita boiria mai. To guna, kolpota taudia be grup ai taunimanima idia stadi henia. Kamonai taudia dekenai buka idia hariharilaia bona iboudiai idia boiria gabu tamona dekenai idia stadi totona. Unai dala amo kolpota taudia ese kongrigeisen matamatadia idia haginia.

¹² Hegeregere, lagani 1907 ai kolpota taudia haida be siti lalonai Millennial Dawn bukana (ladana ma ta be Studies in the Scriptures) idia abia vadaeni taudia idia tahua. Bona Sunday ena hebou totona kamonai tauna ta ena ruma dekenai idia boiridia mai. Sunday ai, kolpota tadikaka ta ese tok ta ia henia bona Dirava ena palani idauidau ia herevalaia. Vaira Sunday ai, hebou idia mai taudia ia hagoadaia idia hebou hanaihanai totona. Lagani 1911 ai, tadikaka ese taunimanima be hahediba taudia ai idia halaoa gaukarana idia karaia totona, dala matamatana idia tohoa. Tadikaka ibounai 58 be United States bona Canada ena kahana idauidau dekenai idia lao pablik tok idia henia totona. Hebou idia mai taudia edia ladana bona adres idia abia, bona haida edia ruma dekenai idia hebou totona, grup maragidia ai idia haridia. Unai dala amo idia ese kongrigeisen matamatadia idia haginia. Lagani 1914 ai, tanobada hegegemadai Bible Student taudia edia kongrigeisen ibounai be 1,200.

13. Haroro gaukara ena sivarai dekenai, dahaka oi moalelaia?

¹³ Hari, tanobada hegegemadai kongrigeisen ibounai be 109,400 bona painia ibounai be 895,800. Kahirakahira taunimanima 8 milioni be “hereva momokani” idia abia dae, bona edia mauri lalonai idia badinaia. (Isaia 60:22 duahia.) b Unai be hoa gauna badina Iesu ia gwau taunimanima momo be iena hahediba taudia do idia inai henidia, dagedage henidia, dibura ruma ai do idia atodia bona hamasedia. (Luka 21:12-17) Ena be Satani, ena demoni bona taunimanima ma haida ese haroro gaukara idia koua toho, to Iehova ena hesiai taudia be edia gaukara idia hadokoa lasi, bona anina namona idia havaraia noho. Idia be “tanobada ibounai dekenai”​—⁠siahu gabudia, sinou gabudia, ororo ai, tano gagaedia ai, siti ai bona gunika gabudia dekenai idia haroro noho. (Mat. 24:14) Iehova ena heduru dainai unai gaukara ibounai idia karaia diba.

“HEREVA MOMOKANI DO IA BADA HEREA”

14. Edena dala ai iseda buka bona magasin ese hereva momokani be gabu momo dekenai idia abia lao?

¹⁴ Momo ese sivarai namona idia harorolaia bona Sosaiti ese buka bona magasin momo ia halasia dainai, hereva momokani be gabu momo dekenai ia lao vadaeni. July 1879 ai, Bible Student taudia ese Watchtower magasin ginigunana idia halasia. Unai neganai magasin ena ladana be Zion’s Watch Tower and Herald of Christ’s Presence. Bible Student taudia ese printa  kampani ta dekenai moni idia henia, unai magasin ena English gado kopi 6,000 ia printaia totona. Unai neganai Charles Taze Russell ena mauri lagani be 27 sibona, to idia abia hidi unai magasin torea gaukarana ia gunalaia totona, bona lo tadikaka 5 be hereva haida idia torea danu. Hari, Gima Kohorona be tanobada hegegemadai idia hariharilaia momo magasin ginigunana. Hua ta ta ai ena kopi ibounai 42,182,000 be gado 195 ai idia printaia. Awake! be tanobada hegegemadai idia hariharilaia momo magasin iharuana. Hua ta ta ai ena kopi ibounai 41,042,000 be gado 84 ai idia printaia. Danu, lagani ta ta ai buka bona Baibel 100 milioni idia printaia.

15. Iseda magasin bona buka ita printaia totona, moni be edeseni amo ita abia?

¹⁵ Unai gaukara be taunimanima edia ura hegeregerena ai idia henia kontribusen monina amo idia karaia. (Mataio 10:8 duahia.) Printa bisinesi taudia idia hoa badina idia diba masini, pepa, inka bona gau ma haida edia davana be bada herea. Betele ena printa gaukara totona kohu ia hoia tadikaka ta ia gwau, bisinesi taudia haida be Betele idia vadivadi neganai idia hoa, badina inai gaukara badana be kontribusen moni sibona amo ita karaia. Idia hoa badina masini badadia ita hoia bona magasin bona buka momo ita printaia diba. Danu, idia hoa badina idia itaia Betele ai matamata taudia be mai moale ida idia gaukara.

HEREVA MOMOKANI ESE TANOBADA DO IA HAHONUA

16. Dahaka dainai Iehova ia ura “hereva momokani” be gabu ibounai ia lao?

¹⁶ Iehova ena heduru dainai “hereva momokani” be gabu ibounai ia lao, badina Ia ura “taunimanima idauidau do ia hamauria bona hereva momokani ena diba maoromaoro do idia abia.” (1 Tim. 2:3, 4) Iehova ia ura taunimanima be hereva momokani do idia diba, unai amo dala maorona ai ia do idia tomadiho henia bona ia ese do ia hanamodia. Haroro gaukara amo Iehova ese abidadama horoa Keristani taudia ia haboua. Danu, “bese ibounai, iduhu ibounai, kopina bona gado idauidau amo,” ia ese “hutuma bada” taudia ia haboua noho. Edia helaro be tanobada ai do idia mauri hanaihanai.​—⁠Apok. 7:9.

17. Tomadiho momokani taudia edia namba ia bada daekau ese dahaka ia hamomokania?

¹⁷ Idia hanaia lagani 130 lalodiai, tanobada hegegemadai tomadiho momokani taudia edia namba ia bada daekau. Unai ese ia hamomokania Dirava bona ena horoa King, Iesu Keriso, be Iehova ena hesiai taudia tanobada ai idia hakaua, gimaia, gunalaia bona hadibaia noho. Iehova be ena gwauhamata hegeregerena, hari iseda negai momo ia durua hereva momokani idia dibaia totona. Unai dainai, ita abia dae momokani nega vairai ena gwauhamata do ia hagugurudia. Baibel ia gwau: “Tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.” (Isa. 11:9) Unai nega ai Iehova ese taunimanima dekenai hahenamo idauidau do ia henia!

[Footnotes]

[Study Questions]

[Picture on page 6]

Bible Student taudia be manau taudia bona idia ura Dirava ena ura idia karaia

[Picture on page 7]

Iehova ese emu hekwarahi “hereva momokani” harorolaia totona ia laloa bada