LAGANI haida gunanai, Rúbia (1) (hari ena mauri lagani be 30) ia lao saut Brazil dekenai kongrigeisen maragina ta ai ia painia taihu ta ladana, Sandra (2) ia vadivadi henia totona. Unuseniai ia vara gauna ta ese Rúbia ena mauri ia haidaua. Unai be dahaka? Mani Rúbia ita nanadaia.

“Lau ese Sandra lau bamoa iena stadi hahinena ta ai vadivadi henia totona. Ai stadi noho lalonai, stadi hahinena ia gwau: ‘Sandra, egu gaukara gabuna ai kekeni toi be idia ura Baibel idia stadilaia, to idia lau hamaoroa do idia naria. Lau diba, inai lagani ai oiemu lista be ia honu momokani.’ Lau kamonai herevana dekenai lau hoa. Baibel idia ura stadilaia taudia edia ladana be lista ta dekenai idia torea! Egu kongrigeisen dekenai lau hekwarahi bada stadi  tamona lau davaria totona. Unai nega ai lau mamia, unai taoni maragina dekenai idia noho taudia do lau durua be namo. Daudau lasi murinai, lau ese egu noho gabuna lau rakatania bona Sandra ia painia taoni maragina dekenai lau lao.”

Rúbia be dahaka ia karaia? Ia gwau: “Unai taoni maragina dekenai lau lao bona hua rua idia ore murinai, egu Baibel stadi ibounai be 15. Bona daudau lasi murinai, Sandra bamona lau danu be Baibel idia ura stadilaia taudia edia lista ta lau karaia!”

Diego (3), hari ena mauri lagani be 20 bamona, be saut Brazil ai ia noho taoni maragina ta ladana, Prudentópolis dekenai idia painia taudia haida ia vadivadi henia. Ena vadivadi neganai ia itaia gaudia ese ena kudouna idia hamarerea, bona ia idia durua iena haroro gaukara ia laloa namonamo totona. Ia gwau: “Egu kongrigeisen dekenai lau noho kava sibona, bona hua ta ta hora haida sibona lau haroro. To, unai painia taudia lau vadivadi henia bona edia ekspiriens namodia lau kamonai neganai, lau itaia idia ese edia haroro gaukara idia moalelaia, to lau be unai gaukara lau ura henia lasi. Lau itaia idia be edia mauri idia moalelaia, bona lau ura egu mauri be idia edia bamona.” Unai murinai, Diego be painia gaukara ia matamaia.

Oi be Diego bamona, haroro gaukara oi karaia bona hebou oi lao, to emu kudouna ibounai ida unai oi karaia lasi, a? Bema oibe, emu hesiai gaukara oi moalelaia totona, emu mauri oi haidaua bona pablisa be momo lasi gabuna ta dekenai oi lao diba, a? Momo be edia mauri namona do idia rakatania karana dekenai idia daradara. To, matamata taudia momo be edia mauri namona idia rakatania vadaeni, bona pablisa be momo lasi gabudia dekenai idia lao. Idia ese edia ura bona tahua gaudia idia haidaua, unai amo edia hesiai gaukara idia habadaia diba. Mani Bruno ena sivarai ita laloa.

Lagani haida gunanai, Bruno (4) (hari ena mauri lagani be 28) be miusiki sikuli badana ta dekenai ia  lao, bona iena tahua gauna be miusiki gadaralaia orea ta ena gunalaia tauna ai do ia lao. Sikuli dekenai iena gaukara be namo herea dainai, nega haida idia boiria miusiki gadaralaia oreana ta ia gunalaia totona. Toana be ia be moni gaukara namona do ia abia. To, Bruno ia gwau: “Lau mamia egu mauri lalonai gau ta ia noho lasi. Lau lalohekwarahi, badina ena be lau bapatiso vadaeni, to egu lalona ibounai ida Iehova lau hesiai henia lasi. Guriguri amo egu hemami be Iehova dekenai lau gwauraia, bona kongrigeisen ai lo tadikaka edia heduru lau tahua. Gau ibounai lau laloa namonamo murinai, egu lalona lau hadaia egu miusiki sikuli do lau rakatania, bona pablisa be momo lasi gabuna ta dekenai do lau lao.” Unai abia hidi ia karaia dainai dahaka ia vara?

Bruno be Guapiara taoni (ena popiuleisen be 7,000 bamona) dekenai ia lao; unai taoni ena daudau be kilomita 260 bamona São Paulo siti amo. Unuseniai gau momo be idau. Bruno ia gwau: “Lau be ruma maragina ta dekenai lau noho. Unuseniai frisa, TV o Intanet gaukaralaia dalana be lasi. To, unai ruma ena badinai be uma gabu ta bona au huahua momo idia noho. Guna lau dekenai unai gaudia be lasi!” Unuseniai, Bruno be kongrigeisen maragina ta ia bamoa, bona wiki ta ta lalonai dina ta be gunika hanuadia dekenai ia lao ia haroro totona. Baege dekenai ena aniani, ranu, buka bona magasin ia udaia bena motabaik amo ia lao. Unai hanua taudia momo be guna sivarai namona idia kamonai lasi. Bruno ia gwau: “Lau ese Baibel stadi 18 bamona lau karaia, bona lau itaia idia haida ese edia mauri idia haidaua neganai, lau moale bada!” Ma ia gwau: “Unai neganai lau laloparara egu mauri lalonai ia noho lasi gauna lau davaria vadaeni​—unai be Basileia gaudia atoa guna karana amo ia mai moalena. Bema tanobada gaudia lau atoa guna, unai bamona moale do lau davaria lasi.” Edena dala ai Bruno be moni ia abia sibona ia naria totona? Mai kiri ida ia gwau: “Ma haida dekenai gita gadaralaia dalana lau hadibaia.” Ia be miusiki tisa bona haroro gaukara ia karaia namonamo tauna.

Mariana (5) (hari iena mauri lagani be 20 bamona) ena sivarai be Bruno ena bamona. Ia be loea ta bona  ena davana be bada, to ia moale lasi. Ia gwau: “Lau mamia lau be ‘lai lau lulua kava bamona.’” (Had. 1:17) Tadikaka bona taihu haida ese Mariana idia hagoadaia ia painia totona. Gau ibounai ia laloa namonamo murinai, ia bona ena turadia Bianca (6), Caroline (7), bona Juliana (8), be edia lalona idia hadaia Bolivia kahirakahira ia noho taoni maragina, Barra do Bugres ena kongrigeisen idia durua totona. Edia noho gabuna amo unai taoni be daudau herea. Dahaka ia vara?

Mariana ia gwau: “Egu palani be hua toi sibona do lau noho. To, hua toi idia ore murinai, egu Baibel stadi ibounai be 15! Idia goada idia lao totona, heduru idia abia noho be namo. Egu lalona be ia goada lasi, idia do lau hamaoroa lau be idia do lau rakatania. Dala tamona be idia ida do lau noho sibona.” Unai taihu foa be unai bamona idia karaia. Vadaeni, Mariana ese ia abia hidi gaukarana ese ena mauri lalonai anina namona ia havaraia, a? Ia gwau: “Lau moale badina Iehova ese lau ia gaukaralaia, taunimanima do lau durua edia mauri idia hanamoa totona. Danu, lau moale badina hari egu nega bona goada be mai anina bada gaukarana ai lau gaukaralaia. Egu mauri lalonai, lau laloa bada gauna be egu Baibel stiuden taudia do lau durua. Lau itaia idia goada idia lao neganai lau moale. Lau dekenai inai hereva ia guguru: ‘Lohiabada ena kara do umui tahua namonamo, vadaeni do umui diba momokani, Lohiabada be namo momokani.’”​—Sal. 34:8.

Tanobada hegegemadai matamata taudia momo be “mai edia ura kwalimu” ida sibona idia henia, gunika hanuadia ai Basileia sivarai namona idia harorolaia totona! Iehova be unai ia itaia neganai, ia moale bada. (Sal. 110:3; Aon. 27:11) Unai bamona idia karaia hesiai taudia ibounai be Iehova ese ia hanamodia.​—Aon. 10:22.