Inai Oi Laloatao, A?
Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:
Inai hereva bibliomancy ena anina be dahaka, bona Keristani taudia ese edena bamona idia laloa be namo?
Inai hereva bibliomancy ena anina be, herevana ta ese Baibel ai edena rau ia kehoa, to ia itaia siri ginigunana ena hereva ese ia do ia durua. Keristani taudia momokanidia be meamea dalanai Baibel idia gaukaralaia lasi. To Baibel idia stadilaia, unai amo diba maorona bona Dirava ena heduru idia abia.—12/15, rau 3.
“Tanobada” do ia ore ena anina be dahaka?
“Tanobada” do ia ore ena anina be tanobada korikorina do ia ore lasi, to Dirava ena ura idia badinaia lasi taudia do idia ore. (1 Ioa. 2:17) Dirava ese tanobada bona kara maoromaoro taudia do ia hadikaia lasi.—1/1, rau 5-7.
Ena be Abela ia mase vadaeni, to edena dala ai ita ia hereva henia noho? (Heb. 11:4)
Abela ese ena abidadama karana amo ita ia hereva henia noho. Iena abidadama karana amo gau momo ita dibaia diba. Iena haheitalai namona ita tohotohoa be gau badana.—1/1, rau 12.
Dirava amo ita daudau lasi totona, dahaka gaudia dekenai abia hidi maorona ita karaia be namo?
Gaudia be inai: Moni gaukara, moale karadia, kompiuta bona unai bamona gaudia ma haida, iseda helt, moni, idia atoa siri famili tauna bamoa karana, bona dagi eiava sibona eda lalohadai laloa bada karana.—1/15, rau 12-21.
Israela taudia ese kopina utua kara be edia “kudouna lalonai idia abia momokani lasi” ena anina be dahaka? (Ier. 9:26)
Idia gwau-edeede bona edia kudouna be ia dika. Unai dainai, edia lalohadai bona ura gaudia be Dirava ena bamona lasi, bona idia haidaua be namo. (Ier. 5:23, 24)—3/15, rau 9-10.
Dirava ena tanobada oreana ena kahana idauidau be dahaka?
Idia be Hakaua Oreana, brens komiti, loaloa naria taudia, elda oreana, kongrigeisen, bona pablisa ta ta.—4/15, rau 29.
Guna Israela taudia ese kara dika taudia idia hamasea totona, au dekenai idia taua dae, a?
Lasi. Bese haida be unai bamona idia karaia, to Israela taudia be lasi. Heberu Toretoredia ese idia sivarailaia negadia ai, kara dika taudia be idia hamasea guna, hegeregere nadi amo idia hodoa mase. (Lev. 20:2, 27) Bena edia tauanina be au ta dekenai idia taua dae, unai amo ma haida idia hadibaia kara dika badadia do idia karaia lasi.—5/15, rau 13.
