AUGUST 1936 ai, Swaziland Royal Kraal o king ena hanua ai gau ta ia vara. Robert bona George Nisbet be saun motuka amo miusiki bona Tadikaka J. F. Rutherford ena tok edia rekodi idia gadaralaia. King Sobhuza Namba 2 be unai ia kamonai dainai ia moale bada. George ia gwau: “Ai hemarai badina King ia ura rekoda masini, rekodi bona laud-spika ia hoia!”

Robert be mai hemataurai ida ia gwau, unai kohu be idia hoihoilaia lasi gaudia. Dahaka dainai? Badina idia be tau ta ena kohu. King ia ura diba unai tauna be daika?

Robert ia haere ia gwau: “Unai kohu ibounai be King ma ta ena.” Bena Sobhuza ia ura diba unai King be daika. Robert ia gwau: “Ia be Iesu Keriso, Dirava ena Basileia ena King.”

Sobhuza be mai hemataurai ida ia gwau: “O, ia be King badana, bona lau ura lasi iena kohu ta lau abia.”

Gabeai Robert ia gwau: ‘Lau be King Sobhuza ena kara dekenai lau hoa. Ia be nao gado ia herevalaia namonamo to ia hekokoroku lasi, ia laloa gaudia be ia gwauraia hedinarai, bona taunimanima be mai gari lasi ida ia idia hereva henia diba. Miniti 45 lalonai lau be King Sobhuza ida iena ofesi lalonai ai helai, bona George be murimuri ai miusiki ia gadaralaia.’

Robert ia gwau: ‘Adorahi ai, ai be Swazi National School ai vadivadi henia bona ekspiriens namona ta ai davaria. Hedmasta ai haroro henia bona ia kamonai namonamo. Ia dekenai rekoda masini ai herevalaia bona ai noia, bema namo sikuli ibounai ese tok ta do idia kamonai. Hedmasta be mai moale ida emai noinoi ia abia dae, bona stiuden 100 bamona ia boiria ava latanai do idia helai, tok idia kamonai totona. Hedmasta ia gwau edia sikuli ai memero dekenai kapenta, konstraksen, uma gaukarana, English gado bona matematik idia hadibaia. Bona kekeni dekenai nesi, ruma naria gaukara, bona gaukara ma haida idia hadibaia.’ King Sobhuza ena tubuna hahine ese unai sikuli ia haginia. a

Lagani 1933 bamona ai, painia taudia be Royal Kraal idia vadivadi henia neganai, King Sobhuza be mai moale ida edia hereva ia kamonai. Nega ta, ia ese ena gadi taudia 100 bamona ia haboua Basileia ena tok ta idia kamonai totona. Ia ese iseda magasin ena sabskripsen bona buka haida ia abia. Daudau lasi murinai, King be mai ena tiokratik laiberi! Ena be  Tanobada Tuarina Iharuana ai Britain gavamani ese iseda buka bona magasin idia taravatudia, to King ese ena buka ibounai ia naria namonamo.

Lagani momo lalodiai, King Sobhuza Namba 2 be ena hanua Lobamba dekenai Witnes taudia ia abia dae, bona nega haida pasto ia boiridia Baibel ena tok idia kamonai totona. Dina ta, tadikaka ta ladana, Helvie Mashazi be Mataio karoa 23 ia herevalaia lalonai, pasto haida be mai badu ida idia toreisi bona idia doria ia helai totona. To King ese idia ia koua, bona Tadikaka Mashazi ia hamaoroa do ia hereva noho. Ma danu, King ese helai taudia ia hamaorodia, tok lalonai idia kamonai siri ibounai do idia torea!

Nega ma ta ai, pasto foa be painia tadikaka ta ena tok idia kamonai murinai edia dabua ena kola idia giroa, badina idia ura lasi hahedinaraia idia be pasto taudia. Idia gwau: “Hari, ai be pasto taudia lasi, to Iehova ena Witnes taudia.” Bena idia ese painia tadikaka idia nanadaia, bema hegeregere ia amo King ese ia abia buka haida idia abia diba.

Lagani 1930 bamona amo ela bona ia mase laganina 1982 ai, King Sobhuza be Iehova ena Witnes taudia ia matauraia. Danu, Witnes taudia be Swazi taudia edia sene karadia ai idia vareai lasi neganai, ia dagedage henidia lasi. Unai dainai, Witnes taudia be King idia matauraia bona ia mase neganai, idia taitai bada.

Lagani 2013 ena matamanai, Swaziland ai Basileia harorolaia taudia be 3,000 bamona. Swaziland ena popiuleisen be 1 milioni ia hanaia, anina be pablisa tamona be taunimanima 384 do ia haroro henia. Kongrigeisen ibounai 90 lalonai painia taudia 260 mai kahana idia gaukara goadagoada, bona lagani 2012 ena Memorial dekenai taunimanima 7,496 idia lao. Unai ese ia hahedinaraia unai gabu dekenai kamonai taudia be momo. Lagani 1930 lalodiai, tadikaka haida be Swaziland dekenai idia lao bona gaukara namona idia karaia.​—Orea ena Histori South Africa amo.