Iseda lalokau tauna ta ia mase neganai, vaia ita tai badina ita diba ia do ita itaia lou lasi. Momokani, Iesu ese Lasaro ia lalokau henia, to ia be Lasaro ia mase dainai ia tai lasi. Ioane bukana ese ia hahedinaraia, Iesu be Lasaro ena famili bona turadia ia hebogahisi henidia dainai ia tai.​—⁠Ioa. 11:36.

Iesu ia kamonai Lasaro ia gorere neganai, ia be Lasaro hanamoa totona ia lao haraga lasi. Baibel ia gwau: “Iesu ese Lasaro ena gorere sivaraina ia kamonai neganai, ia noho gabuna ai dina ma rua ia noho.” (Ioa. 11:6) Dahaka dainai Iesu ia lao haraga lasi? Badina ta dainai Iesu be unai bamona ia karaia. Ia gwau: “Inai gorere ena dokona be mase lasi, to Dirava dekenai hairai ia henia, vadaeni Dirava ena Natuna be unai dala ai idia hanamoa diba.” (Ioa. 11:4) Lasaro ena gorere “ena dokona” be mase lasi. Iesu ia ura Lasaro ena mase amo “Dirava dekenai hairai ia henia.” Edena dala ai? Iesu be hoa karana badana ta do ia karaia; iena turana be mase amo do ia hatorea isi.

Iesu be ena hahediba taudia dekenai ia gwau, mase be mahuta bamona. Unai dainai idia ia hamaoroa: “Do lau lao bona [Lasaro] do lau hanogaia.” (Ioa. 11:11) Iesu dekenai, Lasaro be mase amo do ia hatorea isi karana be hegeregere, sina ta ese natuna be mahuta amo ia hanogaia. Unai dainai, Iesu ese Lasaro ena mase ia lalohisihisilaia be anina lasi.

To, dahaka dainai Iesu ia tai? Ioane 11:33 ia gwau: “Iesu ese Maria bona ia ida idia mai Iuda taudia idia taitai ia itaia neganai, ena lalona ia hisihisi bada bona ia lalohekwarahi.” Unai dainai, “Iesu ena mata ranu ia diho.” Oibe, Iesu ia lalohisihisi bada, badina ia itaia ena lalokau turadia be idia daradoko.​—⁠Ioa. 11:35.

Unai sivarai ese ia hahedinaraia, Iesu be mai ena siahu tanobada matamatana lalonai, eda lalokau taudia do ia hatorea isi bona gorere do ia haorea. Danu, ia hahedinaraia edia lalokau taudia idia mase dainai idia taitai taudia be Iesu ese ia lalodia bada. Ita dibaia gauna ma ta be inai, edia lalokau taudia idia mase dainai idia daradoko taudia ita hebogahisi henidia be namo.

Iesu ia diba Lasaro do ia hatorea isi. To, ia be ena turadia ia lalokau bona hebogahisi henidia dainai ia tai. Unai hegeregerena, hebogahisi karana ese ita do ia doria, ‘idia taitai taudia ida ita taitai’ totona. (Roma 12:15) Bema ta be unai bamona ia taitai, namo lasi ita gwau ia be toreisi lou helarona ia abidadama henia lasi. Iesu be haheitalai namona, badina ena be ia diba Lasaro do ia hatorea isi, to idia taitai taudia ia hebogahisi henia bona ia danu ia tai.