1. Momo ese hesiai tauna be edena bamona idia laloa? Bona Roma 6:22 be edena bamona hesiai tauna ia herevalaia?

 MOMO ese hesiai tauna idia laloa neganai, idia gwau ia be biaguna ese ia biagua bona kara auka henia tauna. To, Dirava ena hesiai tauna ai oi lau be idau. Baibel ese ia hahedinaraia Keristani tauna be sibona abia hidi ia karaia diba, lalokau Biaguna ta ia hesiai henia totona. Unai dainai, aposetolo Paulo be Keristani ginigunadia ia gwauraia ‘Dirava ena hesiai taudia’ neganai, anina be idia be Dirava idia lalokau henia dainai iena hesiai gaukara helagana idia karaia. (Roma 6:22) Unai hesiai gaukara be dahaka? Edena dala ai Satani bona tanobada edia igui hesiai taudia ai ita lao lasi? Bona bema Iehova ita hesiai henia goadagoada, dahaka ahuna namona do ita abia?

2. (a) Dahaka dainai Israela tauna ta be ena ura hegeregerena, biaguna ia hesiai henia noho diba? (b) Dahaka dainai hesiai tauna ena taiana dekenai matu idia karaia?

² Dirava ese Israela taudia dekenai ia henia Taravatuna ese ita ia durua, Iehova ena hesiai tauna ai ita lao ena anina ita lalopararalaia totona. Heberu hesiai tauna be ena biaguna ese lagani namba seven ai ia ruhaia diba. (Eso. 21:2) To, Taravatu ia gwau, bema hesiai tauna ta be ena Biaguna ia lalokau henia bona ia ura do ia hesiai henia noho, unai bamona ia karaia diba. Unai neganai, biaguna ese nila amo unai hesiai tauna ena taiana dekenai matu do ia karaia. (Eso. 21:5, 6) Dahaka dainai unai bamona idia karaia? Badina Heberu gado ai badinaia karana idia herevalaia neganai, idia gaukaralaia herevana ena anina ma ta be kamonai karana. Unai dainai, unai hesiai tauna ena taiana dekenai matu idia karaia ese ia hahedinaraia, ia ura mai ena kamonai ida ena biaguna do ia hesiai henia noho. Iseda gwauhamata karana be unai bamona danu. Iehova dekenai eda mauri ita gwauhamatalaia neganai, ita hahedinaraia ia ita lalokau henia dainai ita ura ia ita kamonai henia.

3. Dahaka dainai Dirava dekenai eda mauri ita gwauhamatalaia?

 ³ Bapatiso ita do abia lasi neganai, ita be abia hidi ita karaia Iehova do ita hesiai henia. Ita ese eda mauri ita gwauhamatalaia badina ita ura Iehova do ita badinaia bona ena ura do ita karaia. To ta ese ita ia doria lasi unai abia hidi ita karaia totona. Unai hegeregerena, matamata taudia be Iehova dekenai sibona edia mauri idia gwauhamatalaia murinai bapatiso idia abia. To, edia tama sina hamoalea totona, unai idia karaia lasi. Keristani taudia ese edia mauri idia gwauhamatalaia ena badina badana be guba Biaguna, Iehova idia lalokau henia. Aposetolo Ioane ia gwau: “Dirava ita lalokau henia ena anina be inai, iena taravatu ita badinaia.”—1 Ioa. 5:3.

4. ‘Kara maoromaoro ena hesiai taudia’ ai ita lao totona, dahaka ita karaia be namo?

⁴ Ita moale badina Iehova ese dala ia kehoa, iena hesiai taudia ai ita lao! Keriso ena mauri davalaia boubouna ita abidadama henia dainai, kara dika ena igui hesiai amo ita ia ruhaia. Ena be ita be goevadae lasi, to ita be mai iseda ura ida Iehova bona Iesu edia henunai ita noho. Paulo ese ena revareva ta lalonai unai ia hahedinaraia goevagoeva. Ia gwau: “Unai hegeregerena, umui danu umui laloa umui be kara dika dekenai umui mase vadaeni, to Keriso Iesu amo umui be Dirava totona umui mauri noho.” Ma ia gwau: “Umui diba lasi, a? Bema umui ese ta dekenai sibona umui henia, bona igui hesiai tauna bamona ia umui kamonai henia, umui be iena igui hesiai taudia. Unai dainai bema umui be kara dika ena igui hesiai taudia, umui be do umui mase, to bema umui be kamonai karana ena igui hesiai taudia, umui be kara maoromaoro taudia. Dirava lau tanikiu henia badina guna umui be kara dika ena igui hesiai taudia, to umui dekenai idia henia hadibaia herevadia be mai kudouna ibounai ida umui badinaia. Oibe, umui be kara dika ena igui lalonai umui noho lasi dainai, umui be kara maoromaoro ena igui hesiai taudia ai umui lao.” (Roma 6:11, 16-18) Unai siri dekenai Paulo ia gwau, “mai kudouna ibounai ida umui badinaia.” Unai dainai, Iehova dekenai eda mauri ita gwauhamatalaia neganai, ita be ‘kara maoromaoro ena hesiai taudia’ ai ita lao.

5. Ita be edena tuari lalonai ita noho, bona dahaka dainai?

⁵ Eda gwauhamata ita hagugurua totona, hahetoho ita hanaia be namo. Ita be tuari rua lalonai ita noho bamona. Tuari ginigunana be Paulo ese ia herevalaia. Ia gwau: “Lauegu kudouna ai Dirava ena taravatu lau moalelaia momokani. To lau davaria, egu tauanina lalonai taravatu ma ta ia noho, bona unai taravatu be egu lalona ai ia noho taravatuna ia tuari henia, bona inai kara dika ena taravatu ese igui hesiai tauna bamona lau ia hakaua.” (Roma 7:22, 23) Ita be goevadae lasi taudia dainai, ita hekwarahi iseda tauanina ena ura dikadia ita dadaraia totona. Aposetolo Petero ese ita ia hagoadaia, ia gwau: “Ura kwalimu taudia bamona do umui noho, bona emui ura kwalimu do umui gaukaralaia lasi kara kerere hunia totona, to Dirava ena igui hesiai taudia bamona do umui noho.”—1 Pet. 2:16.

6, 7. Edena dala ai Satani ese inai tanobada gaudia amo iseda lalona ia veria toho?

⁶ Tuari iharuana be, ita be demoni ese idia biagua tanobadana ida ita tuari. Satani, inai tanobada ena lohia, be dala idauidau ai ita ia dibagania Iehova bona Iesu ita badinaia lasi totona. Ia ura ita be iena igui hesiai taudia ai do ita lao, unai dainai ita ia dibagania tanobada ena ura ita badinaia totona. (Efeso 6:11, 12 duahia.) Unai ia karaia dalana ta be, ia ese tanobada ai lalona veria gaudia idauidau ia atoa. Aposetolo Ioane ia gwau: “Bema ta be tanobada ia lalokau henia, Tamana ena lalokau be ia dekenai ia noho lasi. Badina tanobada ena gaudia ibounai be inai, tauanina ena ura, matana ese idia ura henia gaudia bona ta ese ena kohu ia heagilaia karana, unai gaudia be Tamana amo idia mai lasi, to tanobada amo idia mai.”—1 Ioa. 2:15, 16.

⁷ Tanobada hegegemadai, taunimanima be moni bona kohu momo idia tahua. Satani ese  taunimanima edia lalona ia veria bena idia abia dae moni ese moale korikori ia havaraia. Gabu ibounai dekenai stoa badadia idia haginia. Bisinesi edia advatais idauidau ese taunimanima edia lalona idia veria, kohu bona moale karadia idia tahua momo. Hegeregere, turist edia loaloa dalana idia hegaegaelaia bisinesi ese holidei gabudia mai hairaidia idia advatais, bona unai ese emu lalona idia veria tanobada taudia ida oi lao totona. Oibe, ita itaia bona kamonai gaudia ibounai ese eda lalona idia veria, inai tanobada taudia ita tohotohoa totona.

8, 9. Dahaka ese ita dekenai hekwakwanai momo ia havaraia diba, bona dahaka dainai?

⁸ Aposetolo edia negai, Keristani kongrigeisen be tanobada ena lalohadai idia abia, unai dainai Petero be idia ia herevalaia neganai, ia gwau: “Idia laloa dina ai edia tauanina ena ura idia hagugurua karana be moale gauna. Umui huanai idia be miro bona maka gaudia. Bona umui ida idia aniani hebou neganai, edia hadibaia hereva koikoidia amo umui idia hakaua kerere, bona unai idia moalelaia bada. Idia ese sibodia idia abia isi herevadia, anina lasi herevadia unai, idia gwauraia. Bona idia ese tauanina ena ura, bona gwau-edeede hemarai karadia amo, kerere taudia amo idia heau siri noho taudia idia koia. Idia gwauhamata unai taudia be ura kwalimu do idia abia, to idia be do dika ena igui hesiai taudia. Badina bema gau ta ese tau ta ia biagua, unai tauna be unai gauna ena igui hesiai tauna ai ia lao.”—2 Pet. 2:13, 18, 19.

⁹ Bema ita be “matana ese idia ura henia gaudia” ita tahua, unai ese ita do ia ruhaia diba lasi. To, tanobada ena biaguna, Satani Diabolo ena igui hesiai taudia ai do ita lao. (1 Ioa. 5:19) Bema kohu momo tahua karana ena igui hesiai taudia ai ita lao, hekwakwanai momo do ita davaria bona ita roho mauri be auka.

10, 11. Hari, Satani ia ura daidia ia dibagania, bona edena dala ai tanobada ena edukeisen ese idia ia hahekwakwanaia diba?

¹⁰ Eden umana ai ia karaia bamona, hari inai negai danu Satani ese mauri idia lalopararalaia namonamo lasi taudia, hegeregere matamata taudia ia dibagania. Ia moale lasi bema ia itaia matamata tauna ta, o taunimanima ma ta, be Iehova ia hesiai henia. Satani ia ura lasi Iehova dekenai idia gwauhamata taudia ese Iehova do idia tomadiho henia bona badinaia.

¹¹ Mani matamanai ita herevalaia igui hesiai tauna ita laloa. Ena taiana ai matu idia karaia neganai, reana hisihisi ia mamia; gabeai unai hisihisi ia ore, bona ia noho maka ese ia hamomokania ia ura ena biaguna ia hesiai henia noho. Nega  haida matamata taudia be edia turadia ese idia abia hidi dalana idia dadaraia be auka. Hegeregere, Satani ia ura taunimanima idia abia dae moni gaukara ese moale korikori ia havaraia. To, ita ese eda hetura karana Iehova ida ita hanamoa karana ita laloa bada be gau badana. Iesu ia gwau: “Dirava dibaia totona idia hitolo taudia be idia moale.” (Mat. 5:3) Dirava dekenai edia mauri idia gwauhamatalaia Keristani taudia be Dirava ena ura idia karaia, Satani ena lasi. Idia ese “dina bona hanuaboi” Baibel idia duahia bona laloa dobu. (Salamo 1:1-3 duahia.) To, bema Iehova ena hesiai tauna be edukeisen badana ia tahua, ia be nega lasi Baibel ia laloa dobu bona Iehova ia hesiai henia totona.

12. Hari, matamata taudia momo vairanai dahaka abia hidi ia noho?

¹² Moni gaukara ia karaia Keristani tauna be ena bosi amo hahetoho ia davaria diba. Paulo ese Korinto taudia ia tore henia neganai, ia gwau: ‘Dirava ese oi ia boiria neganai oi be hesiai tauna ta, a? Namo lasi unai oi lalohekwarahilaia, to bema oi dekenai ruhaia dalana ia kehoa, vadaeni unai oi abia dae be namo.’ (1 Kor. 7:21) Bema hesiai tauna dekenai ruhaia dalana ia noho, unai do ia abia dae be namo. Hari, tano momo ai gavamani ese taravatu idia atoa, maragidia be lagani haida lalonai do idia sikuli. Unai murinai, stiuden ta ta be abia hidi idia karaia. Bema Keristani tauna ta be moni gaukara namona abia totona, edukeisen badana ia abia hidi, ia be nega lasi ful-taim hesiai gaukara ia karaia totona.—1 Korinto 7:23 duahia.

13. Edena edukeisen ese Iehova ena hesiai taudia do ia durua bada?

¹³ Paulo ese Kolose ai idia noho Keristani taudia ia hamaoroa: “Umui naria namonamo, dika tau ta ese inai tanobada ena aonega bona anina lasi hereva koikoidia amo umui ia tarapua. Unai gaudia be taunimanima edia sene herevadia amo, bona idia be inai tanobada ena lalohadai badadia hegeregerena, to Keriso ena hadibaia herevadia hegeregerena lasi.” (Kol. 2:8) Hari inai negai, diba bada taudia momo ese ‘tanobada ena aonega bona anina lasi hereva koikoidia, unai gaudia be taunimanima edia sene herevadia amo,’ idia hahedibalaia. Edukeisen badana idia abia taudia be diba sibona idia abia, to mauri lalonai idia vara hekwakwanai hahanaia dalana idia diba lasi. To Iehova ena hesiai taudia be idau, badina idia abia hidi edukeisen ese idia ia durua gaukara idauidau idia karaia totona. Unai amo kohu bona moni momo lasi maurina idia noholaia, bona Dirava idia hesiai henia diba. Idia ese Paulo ena sisiba Timoteo dekenai idia  laloa bada, Paulo ia gwau: “Oibe, Dirava badinaia karana lalonai gau momo do ita abia, bema ita abia dae ita dekenai idia noho gaudia be hegeregere. Unai dainai, bema ita be mai iseda aniani, dabua bona noho gabuna, unai be hegeregere.” (1 Tim. 6:6, 8) Keristani momokanidia be idia ura lasi sikuli badadia idia lao bona digri idia abia, to haroro gaukara idia goadalaia, bona idia durua taudia be edia “hamomokania revareva” bamona.—2 Korinto 3:1-3 duahia.

14. Filipi 3:8 ena hereva hegeregerena, Paulo ese Dirava bona Keriso hesiai henia ena hahenamo be edena bamona ia laloa?

¹⁴ Mani aposetolo Paulo ita laloa. Ia be Iuda ena taravatu hahediba tauna badana, Gamaliela, ese ia hadibaia. Paulo ese ia abia edukeisen be hari inai negai idia karaia iunivesiti edukeisen bamona. To, Paulo ese unai edukeisen be Dirava bona Keriso hesiai henia ena hahenamo ida ia hahegeregerea neganai, dahaka ia gwau? Ia gwau: “Egu Lohiabada Keriso Iesu ena diba hereadaena dainai, lau laloa gau ibounai be anina lasi.” Ma ia gwau: “Oibe, ia dainai lau ese gau ibounai lau rakatania bona lau laloa unai gaudia be momoru sibona, unai amo Keriso lau abia diba.” (Fili. 3:8) Iena hereva ese Keristani matamata taudia bona edia tama sina idia durua edukeisen dekenai abia hidi maorona idia karaia totona. (Laulau itaia.)

15, 16. Iehova ena orea ese dahaka edukeisen ia henia, bona ena badina be dahaka?

¹⁵ Inai tanobada ena sikuli badadia idia lao taudia momo be edena bamona kara idia hahedinaraia? Nega momo idia ese gavamani bona siahu taudia idia gwau-edeede bona heai henidia. (Efe. 2:2) To, Iehova ena orea ese maino ia noho kongrigeisen lalonai edukeisen hereadaena ia henia. Ita ta ta ese wiki ta ta ai Tiokratik Haroro Sikuli amo diba ita abia. Danu, singul painia tadikaka be, Singul Tadikaka Edia Baibel Sikuli idia lao diba, bona headava painia taudia be, Keristani Headava Taudia Edia Baibel Sikuli idia lao diba. Unai bamona tiokratik edukeisen ese ita idia durua iseda guba Biaguna, Iehova ita badinaia totona.

¹⁶ Baibel ena hereva namodia momo be Watch Tower Publications Index bona Watchtower Library CD-ROM dekenai ita davaria diba. Unai edukeisen hereadaena ese ita ia durua Iehova ita tomadiho henia totona. Danu, ita ia durua ma haida ita hadibaia Dirava ida maino idia karaia totona. (2 Kor. 5:20) Bena, unai murinai idia ese ma haida idia durua danu.—2 Tim. 2:2.

17. Edukeisen hereadaena ese dahaka hahenamo ia mailaia?

¹⁷ Iesu ena moni parabolena lalonai, idia kamonai hesiai taudia rua be edia biaguna ese ia hanamodia dainai, ia ida idia moale hebou bona idia dekenai gaukara ma haida ia henia. (Mataio 25:21, 23 duahia.) Hari, edukeisen hereadaena ese moale bona hahenamo ia mailaia. Mani Michael ita laloa. Sikuli dekenai ia be maka namodia ia abia dainai, iena tisa ese idia boiria bona hagoadaia iunivesiti ia lao totona. To, tisa idia hoa badina Michael be vokeisenel sikuli kosi ta ia abia hidi, unai amo sibona ia naria bona regula painia gaukara ia karaia diba. Michael ia laloa ia be abia hidi kererena ia karaia, a? Ia gwau: “Painia bona elda gaukara lau karaia neganai, lau abia Tiokratik edukeisen ese lau ia durua bada. Ena be moni gaukara amo moni momo lau abia diba, to lau moalelaia hahenamo idauidau ese unai idia hereaia. Lau moale badina iunivesiti lau lao lasi.”

18. Dahaka dainai oi ura edukeisen hereadaena oi abia hidi?

¹⁸ Edukeisen hereadaena ese ita dekenai Dirava ena ura ia hadibaia, bona ita ia durua Iehova ita hesiai henia totona. Danu, ‘dika ena igui amo ita ia ruhaia,’ bona gabeai “Dirava ena natudia edia ura kwalimu hereadaena do [ita] abia.” (Roma 8:21) Ma danu, gau badana be ita ia hadibaia edena dala ai ita hahedinaraia diba eda guba Biaguna, Iehova ita lalokau henia.—Eso. 21:5.