Kenya ai painia rua be ruma ta dekenai idia vareai neganai, idia itaia tau ta be bedi dekenai ia hekure noho. Idia hoa badina iena tauanina be maragi bona ena imana be kwadogi. Idia be unai tau ida Dirava ena gwauhamata, “aena idia dika taudia be do idia roho bona mavaru” idia herevalaia neganai, unai tau ia moale bona ia kiri.​—⁠Isa. 35:6.

Unai painia taudia idia davaria Onesmus be turia gorerena ta, osteogenesis imperfecta ia abia. Iena turia be idia goada lasi dainai, idia makohi haraga. Unai gorere hanamoa dalana be lasi dainai, Onesmus ia laloa ena mauri ibounai lalonai ia be wilisea ai do ia helai bona hisihisi do ia ania.

Onesmus be Baibel stadi ia abia dae. To, iena sinana ia ura lasi Onesmus be Keristani heboudia dekenai do ia lao, badina ia laloa reana unuseniai hekwakwanai ta do ia vara bona ena hisihisi do ia habadaia. Unai dainai tadikaka ese hebou ai tok idia rekodia, bona Onesmus ese ruma ai ia kamonai. To, Onesmus be hua faiv ia stadi murinai, ena lalona ia hadaia hebou do ia lao, ena be hekwakwanai ia davaria diba.

Keristani heboudia lao henia karana ese Onesmus ena gorere ia habadaia, a? Lasi. Onesmus ia gwau: “Hebou lalonai lau noho neganai, lau mamia hisihisi be ia ore bamona.” Ia laloa ia davaria helaro matamatana ese ena hisihisi ia haorea. Onesmus ena sinana ia itaia ena natuna be ia moale dainai, ia danu ia moale bona Baibel stadi ia abia dae. Ia gwau: “Dirava hesiai henia gaukarana be iena muramura.”

Daudau lasi murinai, Onesmus be bapatiso lasi pablisa ai ia lao. Gabeai, ia bapatiso bona hari ia be hesiai tauna. Ena be Onesmus ese ena aena ruaosi bona imana ta ia gaukaralaia diba lasi, to ia ura dikadika Iehova ia hesiai henia. Matamanai ia ura do ia heduru painia to aplikeisen ia atoa lasi. Dahaka dainai? Badina ia diba unai ia karaia neganai, haida do ia hahekwarahia ena wilisea idia pusia loaloa totona. To, tadikaka taihu dekenai ena lalohadai ia gwauraia hedinarai neganai, idia gwauhamata ia do idia durua. Unai dainai, heduru painia ia karaia diba.

Gabeai, Onesmus ia ura ia regula painia neganai, unai bamona lalohekwarahi ia abia lou. To, nega ta ia be dina ena siri ia duahia bona unai ese ia durua bada. Unai siri be Salamo 34:8. Ia gwau: “Lohiabada ena kara do umui tahua namonamo, iena dala do umui tohoa namonamo, vadaeni do umui diba momokani, Lohiabada be namo momokani.” Onesmus be unai siri ia laloa dobu murinai, ena lalona ia hadaia do ia regula painia. Hari, wiki ta ta ai ia be dina foa ia haroro bona ena Baibel stadi haida be idia goada idia lao. Lagani 2010 ai, Onesmus be Painia Gaukara Sikuli dekenai ia lao. Ia moale badina unai sikuli ena tisa ta be guna ia idia haroro henia tadikaka ta!

Ena be Onesmus ena tama sina idia mase vadaeni, to dina ta ta ai tadikaka taihu ese Onesmus idia naria. Hari ia abia noho hahenamo idauidau dainai ia moale, bona ia be vaira negana ia naria noho, badina unai negai “ta ese do ia gwau lasi, ‘Lau be gorere.’”​—⁠Isa. 33:24.