1, 2. (a) Dahaka dainai ita “guriguri noho” be namo? (b) Guriguri karana dekenai edena henanadai ita lalodia be namo?

 GUNA hanuaboi ai ia gaukara tauna ta, ia gwau: “Daba kahanai oi noga noho be mai ena hekwarahi.” Hanuaboi ibounai idia noga noho taudia ese iena hereva do idia abia dae danu. Hari iseda nega be unai bamona danu. Ita be Satani ena tanobada dikana ena dibura momokani negana ai ita noho, unai dainai ita noga noho be gau badana. (Roma 13:12) Bema inai nega dokona lalonai ita mahuta, dika bada do ita davaria! Unai dainai, gau badana be do ita “laloa maoromaoro” bona “guriguri noho.”—1 Pet. 4:7.

² Ita be nega dokonai ita noho dainai, namona be sibona ita nanadaia: ‘Egu guriguri karana be edena bamona? Lau be guriguri daladia idauidau lau gaukaralaia, bona hanaihanai lau guriguri, a? Lau be haida totona lau guriguri danu, eiava egu dabu bona ura gaudia sibona totona lau guriguri? Bona lau roho mauri totona, edena dala ai guriguri karana ese lau ia durua diba?’

3. Edena guriguri daladia idauidau ita gaukaralaia diba?

³ Aposetolo Paulo be Efeso taudia ia tore henia neganai, ‘guriguri idauidau’ ia herevalaia. (Efe. 6:18) Eda guriguri lalonai Iehova ita noia diba eda ura gaudia ia henia bona ita ia durua hekwakwanai ita hanaia totona. Iehova, ‘guriguri ia kamonai’ Diravana, be mai hebogahisi ida iseda noinoi ia kamonai. (Sal. 65:2) To, namo lasi eda ura gaudia sibona ita gurigurilaia. Namona be eda guriguri amo Iehova ita hanamoa, tanikiu henia, bona noinoi henia.

4. Dahaka dainai nega ibounai eda guriguri lalonai Iehova ita hanamoa be maoro?

⁴ Badina idauidau dainai, iseda guriguri lalonai Iehova do ita hanamoa be namo. Hegeregere, ia do ita  hanamoa badina “ia ese kara badadia ia karaia” bona ‘iena siahu be bada herea momokani.’ (Salamo 150:1-6 duahia.) Salamo karoa 150 ena siri siks ese nega 11 ita ia hagoadaia Iehova ita hanamoa totona. Dirava ia matauraia bada salamo torea tauna ta ia gwau: “Dina ta ta lalonai, nega 7 lau ese oiemu ladana lau hanamoa noho, oiemu kota maoromaoro dainai.” (Sal. 119:164) Oibe, Iehova ita hanamoa be maoro. Unai dainai “dina ta ta lalonai, nega 7,” anina be nega ibounai eda guriguri lalonai ia ita hanamoa be namo.

5. Edena dala ai guriguri lalonai Iehova ita tanikiu henia karana ese ita ia gimaia?

⁵ Guriguri dalana ma ta be Dirava do ita tanikiu henia. Paulo ese Filipi Keristani taudia ia hagoadaia, ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai.” (Fili. 4:6) Guriguri lalonai Iehova ita tanikiu henia karana ese ita ia gimaia. Badina inai nega dokona ai, taunimanima be ‘tanikiu karana idia hahedinaraia lasi.’ (2 Tim. 3:1, 2) Bema ita naria namonamo lasi, ita danu be tanikiu karana do ita hahedinaraia lasi. Guriguri lalonai Iehova ita tanikiu henia neganai, do ita moale bona eda mauri lalonai idia vara gaudia dainai do ita maumau lasi. (Iuda 16) Ma danu, tama be edia ruma bese ida guriguri amo Dirava idia tanikiu henia neganai, unai ese edia adavana bona natudia ia durua tanikiu karana idia hahedinaraia totona.

6, 7. Guriguri dalana ma ta be dahaka, bona edena bamona negadiai Iehova ena heduru ita noia diba?

⁶ Guriguri dalana ma ta be, mai taitai ida Dirava ena heduru totona ita noinoi. Edena bamona negadiai mai taitai ida Iehova ena heduru ita noia diba? Haida ese ita idia dagedage henia eiava gorere badana ta ita abia neganai, unai bamona ita karaia diba. To, dagedage bona gorere negadia sibona ai, unai ita karaia, a?

⁷ Mani Lohiabada ena guriguri ita laloa, bona ia ese Dirava ena ladana, Iena Basileia bona Iena ura ia gwauraia dalana ita itaia. (Mataio 6:9, 10 duahia.) Inai tanobada be kara dika amo ia honu, bona gavamani be hegeregere lasi taunimanima edia ura gaudia idia henia totona. Unai dainai, namona be ita guriguri iseda guba Tamana ese ena ladana do ia hahelagaia, bona iena Basileia ese tanobada amo Satani ena lohia dalana do ia kokia. Danu, Iehova do ita noia iena ura gauna be tanobada ai do ia vara, guba dekenai ia vara bamona. Oibe, ita guriguri noho bona guriguri daladia idauidau ita gaukaralaia be mai anina bada.

8, 9. Dahaka dainai Getesemane umana ai Petero bona aposetolo taudia ma haida idia mahuta dainai, ita hahemaoro henidia auka be maoro lasi?

⁸ Ena be aposetolo Petero ese Keristani taudia ia hagoadaia do idia “guriguri noho,” to nega ta ia ese unai sisiba ia badinaia lasi. Iesu be Getesemane umana ai ia guriguri noho lalonai, Petero bona aposetolo taudia ma haida be idia mahuta. Ena be Iesu ese idia ia hamaoroa ‘do idia gima noho bona guriguri noho,’ to idia be unai idia karaia lasi.—Mataio 26:40-45 duahia.

⁹ Namo lasi Petero bona unai aposetolo taudia ita hahemaoro henidia auka, to namona be ita laloatao idia be unai dina ai idia karaia gaukara idauidau dainai idia hesiku bada. Mani oi laloa, idia be Pasova totona idia hegaegae bona hanuaboi ai unai aria idia karaia. Bena Iesu ese Lohiabada ena Anibou ia hamatamaia, unai amo ia mase murinai idia ese ena mase laloatao ariana idia karaia diba. (1 Kor. 11:23-25) Baibel ia gwau, idia be “Dirava hanamoa  anedia idia abia murinai, Olive Ororona dekenai idia lao.” Unai gabu daudau idia lao totona, idia be Ierusalema hanua ena dala maragidia idia badinaia. (Mat. 26:30, 36) Reana idia be daba kahanai unuseniai idia ginidae. Bema ita be idia ida Getesemane umana ai ita noho, reana do ita mahuta danu. Iesu be idia mahuta aposetolo taudia ia gwau henia lasi, to mai hebogahisi ida ia gwau, edia “lalona be ia ura, to tauanina ia manoka.”

10, 11. (a) Petero be Getesemane umana ai ia vara karana amo dahaka ia dibaia? (b) Petero ena sivarai amo dahaka oi dibaia?

¹⁰ Petero be ia vara karana amo mai anina bada gauna ta ia dibaia. Getesemane umana ai Iesu be idia ia hamaoroa, ia gwau: “Inai hanuaboi ai, lau dekenai do ia vara gauna dainai umui ibounai do umui moru.” To Petero be ia dekenai ia haere, ia gwau: “Oi dekenai do ia vara gauna dainai idia ibounai do idia moru, to lau be do lau moru lasi!” Bena Iesu ia gwau Petero ese nega toi ia do ia gorea. To, Petero ia hereva goada ia gwau: “Ena be oi ida do lau mase, to oi do lau gorea lasi.” (Mat. 26:31-35) Ena be Petero be unai bamona ia hereva, to Iesu ena hereva hegeregerena ia moru. Petero be nega ihatoina Iesu ia gorea neganai, ia lalohisihisi bona “ia tai dikadika.”—Luka 22:60-62.

¹¹ Danu Petero ia laloparara, sibona ena diba dekenai ia tabekau lasi be namo. Unai nega ai guriguri karana ese Petero ia durua bada. Unai ita diba badina Petero ese inai sisiba ia henia, “do umui guriguri noho.” Ita be unai sisiba ita badinaia, a? Ita be nega ibounai ita “guriguri noho,” bona ita hahedinaraia Iehova dekenai ita tabekau, a? (Sal. 78:7) Namona be aposetolo Paulo ena sisiba ita laloatao danu, ia gwau: “Bema tau ta ia laloa ia gini goada noho, namona be ia naria namonamo, dika ia moru.”—1 Kor. 10:12.

12. Dahaka dainai ita dekenai Nehemia be haheitalai namona?

¹² Mani Nehemia ita laloa. Ia be lagani 500 B.C.E. lalonai, Parasa ena King Aratasaseta ena wain bubua tauna. Nehemia be haheitalai namona, badina mai ena kudouna ibounai ida Dirava ia guriguri henia. Ierusalema ai idia noho Iuda taudia edia hekwakwanai ia laloa dainai, dina haida lalonai ia aniani lasi bona Dirava ia guriguri henia. (Neh. 1:4) Aratasaseta ese ia nanadaia dahaka dainai ia moale lasi neganai, Nehemia be “Guba ena Dirava dekenai [ia] guriguri.” (Neh. 2:2-4) Vadaeni dahaka ia  vara? Iehova ese Nehemia ena guriguri ia haerelaia, bona gau haida ia karaia Iena taunimanima ia durua totona. (Neh. 2:5, 6) Unai ese Nehemia ena abidadama ia hagoadaia bada!

13, 14. Eda abidadama ia goada noho bona Satani ena hedibagani ita dadaraidia totona, dahaka ita karaia be namo?

¹³ Bema Nehemia bamona, hanaihanai ita guriguri, eda abidadama do ia goada. Satani be ia hebogahisi lasi bona ia itaia ita manoka neganai, ita do ia dibagania. Hegeregere, bema ita gorere eiava lalometau, reana do ita laloa hua ta ta ai ita karaia haroro gaukara be Dirava ese ia laloa bada lasi. Reana ita haida be guna ita karaia kereredia ita laloa noho dainai, ita lalometau. Satani ia ura do ita laloa ita be anina lasi. Ia ese unai bamona lalohadai kereredia ia gaukaralaia, eda abidadama ia hamanokaia totona. To, bema ita “guriguri noho,” eda abidadama do ia goada. Oibe, “abidadama ena kesi badana” amo ita ese ‘dika tauna ena peva ibounai mai edia lahi ita habodoa diba.’—Efe. 6:16.

¹⁴ Bema ita “guriguri noho” Satani ena hedibagani lalonai do ita moru lasi, bona Iehova do ita abidadama henia noho. Hedibagani bona hahetoho ita davaria neganai, namona be Nehemia ita laloa bona karaharaga Dirava ita guriguri henia. Badina Iehova ena heduru sibona amo, eda abidadama idia tohoa hedibagani bona hahetoho ita hanaia diba.

15. Ma haida totona guriguri karana ita laloa neganai, edena henanadai ita lalodia be namo?

¹⁵ Iesu ia guriguri Petero ena abidadama do ia manoka lasi totona. (Luka 22:32) Danu, aposetolo edia negai ia noho Keristani tauna ta ladana, Epafra be Iesu  ia tohotohoa bona Kolose tadikaka totona ia guriguri goadagoada. Paulo ese Kolose tadikaka ia tore henia, ia gwau: “Ia be nega ibounai umui totona ia guriguri goadagoada. Unai amo lo taudia bamona do umui gini goada, bona Dirava ena ura ibounai do umui abidadama henia momokani.” (Kol. 4:12) Namona be sibona ita nanadaia: ‘Lau be tanobada hegegemadai tadikaka taihu totona lau guriguri goadagoada, a? Disasta negadiai dika bada idia davaria tadikaka taihu totona lau guriguri hanaihanai, a? Edena negai lau be Iehova ena orea idia gunalaia tadikaka totona lau guriguri? Hekwakwanai idia davaria tadikaka taihu totona lau guriguri, a?’

16. Iseda tadikaka taihu totona ita guriguri be mai anina bada, a? Mani oi herevalaia.

¹⁶ Tadikaka taihu totona Iehova ita guriguri henia neganai, unai ese idia do ia durua. (2 Korinto 1:11 duahia.) Ena be Iehova ena hesiai taudia momo edia guriguri loulou karana ese Iehova do ia doria lasi kara ta ia karaia totona, to bema ia itaia idia ese edia tadikaka taihu idia laloa bada, edia guriguri do ia haerelaia. Unai dainai, ma haida totona ita guriguri karana ita laloa boio lasi be namo. Iseda Keristani tadikaka taihu ita lalokau henidia dainai, Epafra bamona, namona be idia totona ita guriguri goadagoada. Unai bamona ita karaia neganai, do ita moale badina “henia kara ena moale be bada, to abia kara ena moale be maragi.”—Kara 20:35.

17, 18. Edena dala ai “guriguri noho” karana ese ita ia durua diba?

¹⁷ Paulo be inai hereva, “hanuaboi be kahirakahira do ia ore bona dina be kahirakahira do ia hedinarai” ia do gwauraia lasi neganai, ia gwau: “Umui be hari ita noho negana umui diba. Hari be mahuta amo umui noga negana, badina iseda hahemauri be kahirakahira, guna abidadama taudia ai ita lao negana bamona lasi.” (Roma 13:11, 12) Dirava ese ia gwauhamatalaia tanobada matamatana be kahirakahira do ia vara, bona iseda hahemauri negana be kahirakahira momokani. Unai dainai, namona be Iehova tomadiho henia karana ita goadalaia bona ita noga noho. Namo lasi tanobada ena anina lasi gaudia ese eda guriguri karana Iehova dekenai idia hadikaia. Gau badana be ita “guriguri noho.” Unai ese ita do ia durua Iehova ena dina ita naria noho lalonai, ‘eda kara do idia helaga bona Dirava badinaia karadia’ do ita hahedinaraia. (2 Pet. 3:11, 12) Namona be eda mauri dalana amo ita hahedinaraia, ita noga noho bona ita abia dae momokani inai tanobada dikana ena dokona be kahirakahira. Unai dainai, namona be “nega ibounai do [ita] guriguri.” (1 Tes. 5:17) Iesu bamona namona be regerege lasi gabudia ita tahua, unuseniai Iehova ita guriguri henia. Bema eda guriguri ita halataia bona mai eda kudouna ibounai ida Iehova ita hereva henia, iena turana ai ita lao diba. (Iam. 4:7, 8) Unai be hahenamo badana!

¹⁸ Baibel ia gwau: “Keriso be tanobada ai ia noho neganai, mase amo ia do ia hamauria diba Tauna dekenai ia guriguri bona ia noinoi goadagoada, mai taitai bona mai mata ranu ida, bona Dirava ese ena noinoi ia kamonai, badina ia ese Dirava ia gari henia.” (Heb. 5:7) Iesu be mai taitai bona mata ranu ida Dirava ia noinoi henia, bona Dirava ia badinaia ela bona ia mase. Unai dainai, Iehova ese ena Natuna lalokauna be mase amo ia hatorea isi, bona guba ai mase diba lasi maurina ia henia. Herevana vaira negana ai hedibagani bona hahetoho ita davaria, to ita danu be eda guba Tamana ita badinaia noho diba. Oibe, bema ita “guriguri noho,” ita ese mauri hanaihanai ahuna ita abia diba.