PASCAL be Côte d’Ivoire ena ogogami hanuana ta ai ia bada, bona mauri namona ia tahua. Ia be boksini tauna bona ia laloa, ‘Edeseniai boksini tauna goadana ai do lau lao, bona lau taga diba?’ Ena mauri lagani be 25 bamona neganai, ia laloa Europe ia lao be namo. To, pepa maorodia be lasi dainai, ia ura hehuni dalanai do ia lao.

Lagani 1998 ai, Pascal ena mauri lagani be 27 neganai, ena laolao ia hamatamaia. Ghana, Togo, bona Benin edia boda ia hanaia lao ela bona Niger ena taoni ladana Birni Nkonni ai ia ginidae. Hari, iena laolao be do ia auka matamaia, badina not kahana ia lao totona, motuka amo Sahara Desert do ia hanaia. Bena bouti amo Mediterranean davara do ia hanaia, bona Europe ia lao. Unai be iena palani. To Niger ai gau rua idia vara dainai, ena laolao ia hadokoa.

Gau ginigunana be, iena moni ia ore. Gau iharuana be, painia ta ladana Noé ia davaria bona Baibel stadi ia abia dae. Ia dibaia gaudia ese ena kudouna ia hamarerea bona ena lalohadai ia haidaua. Tauanina gaudia tahua guna karana ia dadaraia bona Dirava ena ura ia atoa guna. Lagani 1999 December ai, Pascal ia bapatiso. Iehova tanikiu henia totona, lagani 2001 ai, hereva momokani ia dibaia taoni Niger ai, ia painia matamaia. Iena hesiai gaukara be edena bamona ia laloa? Ia gwau: “Lau ese mauri namona lau davaria vadaeni!”

Pascal bamona, momo idia davaria edia mauri idia moalelaia momokani totona, Dirava ena hesiai gaukara idia atoa guna be namo. Unai bamona idia karaia totona, momo be Europe idia rakatania bona Africa dekenai pablisa be momo lasi gabudia idia lao. Witnes taudia 65 bamona, edia mauri lagani 17 ia lao 70 be West Africa ena tano haida hegeregere, Benin, Burkina Faso, Niger, bona Togo dekenai idia lao. a Dahaka ese edia lalona ia veria dainai edia gabu idia rakatania, bona edia mauri be edena bamona?

Denmark taihu ta, Anne-Rakel ia gwau: “Egu tama sina be Senegal ai misinari gaukara idia karaia. Hanaihanai idia be mai moale ida misinari gaukara idia herevalaia dainai, lau ura unai gaukara do lau karaia danu.” Lagani 15 gunanai, ena mauri lagani be 20 bamona neganai, Togo ia lao bona saini gado kongrigeisen ia bamoa. Iena haheitalai ese ma haida ia durua, a? Ia gwau: “Unai murinai egu tadina kekeni bona mero danu be Togo dekenai idia mai.”

France amo mauri lagani 70 headava tadikaka ta, Aurele ia gwau: “Lagani faiv gunanai moni gaukara amo lau ritaea neganai, egu vairanai be abia hidi ta ia  noho: France ai do lau noho bona paradaiso lau naria sibona, eiava egu haroro gaukara do lau habadaia.” Aurele be ena haroro gaukara ia habadaia. Lagani toi gunanai, ia bona adavana Albert-Fayette be Benin idia lao. Aurele ia gwau: “Iniseniai Iehova ai hesiai henia karana be abia hidi maorona.” Mai kiri ida ia gwau: “Emai teritori ena kone gabudia haida be Paradaiso bamona.”

Clodomir bona ena adavana, Lysiane, be lagani 16 gunanai France amo idia lao Benin. Matamanai, edia famili bona turadia France ai idia reaia dainai, idia lalohisihisi bona idia laloa edia mauri matamatana do idia manadalaia lasi. To, idia laloparara idia gari be anina lasi. Bona gabeai edia noho idia moalelaia. Clodomir ia gwau: “Unuseni ai noho lagani 16 ai moalelaidia bada, badina lagani ta ta ai ta ai durua hereva momokani ia abia totona.”

France tadikaka ta, Sébastien bona adavana Johanna danu be lagani 2010 ai Benin idia lao. Sébastien ia gwau, “Kongrigeisen ai gaukara be bada herea. Unai dainai, ai hekwarahi nega kwadogina ai gau momo ai dibaia totona!” Taunimanima ese edia haroro gaukara be edena bamona idia laloa? Johanna ia gwau: “Taunimanima be hereva momokani totona idia ranu mase bamona. Nega haida ai haroro lasi, to taunimanima ese dala ai ai idia itaia neganai, Baibel henanadai idia henia bona buka o magasin idia abia.” Benin idia lao dainai edia headava maurina be edena bamona? Sébastien ia gwau: “Unai ese emai headava ia hagoadaia. Lau moale badina dina ibounai lalonai, lau be egu adavana ida lau haroro hebou.”

Eric bona ena adavana Katy be Benin ena not kahana, taunimanima momo lasi gabuna, ai painia gaukara idia karaia. Lagani 10 gunanai France ai idia do noho neganai, magasin ai pablisa momo lasi gabudia idia lao taudia edia sivarai idia duahia, bona ful-taim hesiai taudia idia hereva henia danu. Unai ese edia lalona ia veria dainai, lagani 2005 ai Benin dekenai idia lao. Idia moale badina idia itaia kongrigeisen be ia tubu daekau. Eric ia gwau: “Lagani rua gunanai, Tanguiéta ena taoni ai emai grup ena pablisa taudia be 9 sibona; hari pablisa ibounai be 30. Sunday ai, hebou idia mai taudia be 50 ia lao 80 bamona. Ai moale badina ai itaia pablisa edia namba be ia bada ia lao!”

Tano ma haida ai idia painia taudia be dahaka hekwakwanai idia davaria? Benjamin ena mauri lagani be  33, bona ia be Anne-Rakel ena tadina. Lagani 2000 ai Denmark dekenai, Benjamin be Togo ai misinari gaukara ia karaia tadikaka ta ia hedavari henia. Benjamin ia gwau: “Ia lau hamaoroa lau ura do lau painia neganai, ia gwau: ‘Namona be Togo ai painia gaukara oi karaia.’” Benjamin be unai ia lalohadailaia bona ia gwau: “Unai nega ai egu mauri lagani be 20 ia do abia lasi, to egu taihudia rua be Togo ai idia painia noho. Unai ese dala ia kehoa unuseniai lau lao totona.” Vadaeni, Togo dekenai ia lao, to hekwakwanai haida ia davaria danu. Benjamin ia gwau: “Lau be French gado lau diba lasi. Hua ginigunadia siks be auka, badina ma haida lau hereva henidia diba lasi.” To, gabeai Benjamin be French gado ia dibaia. Hari, ia be Benin Betele ai ia gaukara, bona motuka amo pablikeisen be kongrigeisen bona tano idauidau dekenai ia abia lao, bona kompiuta dipatmen ia durua danu.

Matamanai ita herevalaidia taudia, Eric bona Katy be Benin idia do lao lasi neganai, France dekenai idau gado taudia edia teritori ai idia haroro. Edena dala ai West Africa be idau? Katy ia gwau: “Noho gabuna namona ai davaria be auka. Hua haida lalonai ai be paoa bona ranu lasi rumana ta dekenai ai noho.” Eric ia gwau: “Emai neiba taudia ese miusiki ena rege idia habadaia ela bona daba kahana. Gau badana be oi haheauka bona unai mauri dalana oi manadalaia toho.” Idia ruaosi idia gwau: “Unai teritori matamatana dekenai ai haroro ena moale ese ai davaria hekwakwanai ia hereaia.”

France tadikaka Michel bona adavana Marie-Agnès, edia mauri lagani be 55 bamona, be lagani faiv gunanai Benin idia lao. Matamanai idia lalohekwarahi bona Michel ia gwau, haida idia laloa ia bona adavana be Benin idia lao neganai, dika do idia davaria. Ia gwau: “Bema oi diba lasi Iehova be ita ia naria, do oi gari. Unai dainai, Iehova totona bona Iehova ida Benin dekenai ai lao.”

Tano ma haida ai painia gaukarana idia manadalaia taudia idia gwau, hegaegae karana be mai anina bada. Inai gaudia oi karaia be namo: Palani oi karaia guna. Unai gabu ena mauri dalana oi manadalaia. Moni oi negea kava lasi. Iehova dekenai oi tabekau.​—Luka 14:28-30.

Matamanai ita herevalaia tadikaka, Sébastien, ia gwau: “Benin  ai do lao lasi neganai, lau bona Johanna be lagani rua lalonai moale karadia ai dadaraia, bona anina lasi gaudia ai hoia lasi, unai amo emai moni ai haboua.” Benin ai idia painia noho totona, lagani ta ta ai Europe idia lao bona hua haida lalonai  moni gaukara idia karaia, bena Benin dekenai idia giroa lou.

Painia singul taihu 20 bamona be West Africa idia lao, bona idia ta be Marie-Thérèse. France ai ia be basi draiva gaukara ia karaia. To lagani 2006 ai, lagani tamona gaukara amo ia laga-ani bona Niger dekenai ia painia. Daudau lasi murinai, ena lalona ia hadaia Niger dekenai do ia painia noho. Marie-Thérèse ia gwau: “France dekenai lau giroa lou murinai, egu bosi lau hamaoroa lau ura egu gaukara dinadia lau haidaua, bona ia abia dae. Hari, lau be May ia lao August, France ai basi draiva gaukara lau karaia, bona September ia lao April, Niger ai lau painia.”

‘Dirava ena Basileia idia tahua guna’ taudia idia diba, Iehova ese edia ‘dabu gaudia ibounai idia dekenai do ia henia.’ (Mat. 6:33) Mani inai haheitalai ita laloa: France singul taihu ta Saphira, ena mauri lagani be 25 bamona be Benin dekenai ia painia noho. Lagani 2011 ai, France dekenai ia lao moni gaukara ia karaia totona, unai amo Benin dekenai do ia giroa lou neganai, tauanina dalanai sibona ia naria diba. Unai be nega namba siks Benin dekenai do ia lao. Saphira ia gwau: “Unai be Friday, egu moni gaukara ena dina ginigabena. To, egu moni ia hegeregere lasi dainai, lau ura ma dina 10 do lau gaukara. Lau be France ai wiki rua sibona do lau noho. Iehova dekenai egu hekwakwanai lau gurigurilaia. Unai murinai, gaukara idia tahua kampani ta ese lau ia rini henia, bona idia henanadai bema lau ura wiki rua lalonai edia gaukara tauna ta ena gabu do lau abia.” Monday ai, Saphira be unai ofesi dekenai ia lao, ena gabu do ia abia hahinena ese gaukara ia hadibaia totona. Ia gwau: “Lau hoa, badina lau davaria ena gabu do lau abia hahinena be Witnes taihu ta, bona ia ura gaukara amo dina 10 do ia laga-ani Painia Sikuli ia lao totona! To, ena bosi ia ura lasi do ia lao ela bona ma ta idia davaria ena gabu ia abia totona. Taihu be lau karaia hegeregerena, Iehova ia guriguri henia.”

Tadikaka taihu haida be West Africa ai lagani momo idia painia bona unuseniai idia noho. Haida be lagani haida sibona idia noho, bena edia tano korikori dekenai idia giroa lou. To, unai bamona idia karaia taudia danu be hari hahenamo momo idia davaria noho. Idia davaria moale korikorina be Iehova hesiai henia karana amo ia mai.