1. Keristani matamata taudia momo be dahaka gaukara namodia idia karaia noho?

 ITA moale badina hari taunimanima milioni momo be tomadiho momokani lalonai idia vareai noho. (Apok. 7:9, 10) Matamata taudia momo idia moale, badina ma haida idia durua ‘mauri ranu idia inua totona, ia be davana lasi.’ (Apok. 22:17) Matamata taudia haida be momo ida Baibel stadi idia karaia bona taunimanima idia durua edia mauri idia hanamoa totona. Haida be mai gari lasi ida idau gado taudia edia teritori ai hereva momokani idia harorolaia. (Sal. 110:3; Isa. 52:7) Edena dala ai unai gaukara namona oi karaia diba?

2. Edena dala ai Timoteo ena haheitalai ese ia hahedinaraia, Iehova ia ura matamata taudia dekenai maduna ia henia? (Laulau ginigunana itaia.)

² Hari oi karaia abia hidi ese dala do ia kehoa vaira neganai, Dirava ena hesiai gaukara idauidau oi moalelaia totona. Hegeregere, Lusitera ai ia noho merona Timoteo mani oi laloa. Ia be abia hidi maorodia ia karaia dainai, ena mauri lagani be 20 bamona neganai, ia hegeregere misinari gaukara ia karaia totona. (Kara 16:1-3) Paulo be dagedage karana dainai Tesalonika kongrigeisen matamatana ia rakatania, to hua haida murinai Timoteo ia siaia Tesalonika tadikaka ia hagoadaia totona. (Kara 17:5-15; 1 Tes. 3:1, 2, 6) Timoteo be unai gaukara ia abia neganai ia moale bada!

3. Emu mauri lalonai edena abia hidi be mai anina bada, bona edena negai unai abia hidi oi karaia be namo?

³ Matamata negana be nega namona abia hidi badadia oi karaia totona. To, Iehova do oi hesiai henia ena abia hidi ese abia hidi ma haida ia hereaia. Edena nega be nega namona unai abia hidi oi karaia totona? Iehova ia gwau: “Oi be eregabe neganai, ia ese oi ia karaia Dirava do oi laloa.” (Had. 12:1) Iehova do oi “laloa” dala namona tamona be mai emu kudouna ibounai ida ia oi hesiai henia. (Deu. 10:12) Unai abia hidi be mai anina bada. Unai ese emu vaira nega maurina ia haidaua diba.—Sal. 71:5.

4. Edena abia hidi ma haida ese Dirava hesiai henia karana idia hanamoa o hadikaia diba?

⁴ Momokani, Iehova do oi hesiai henia be abia hidi badana. To, abia hidi ma haida ese emu vaira nega maurina idia haidaua diba danu. Hegeregere, abia hidi do oi karaia oi headava o lasi, daika do oi adavaia bona edena moni gaukara do oi abia. Unai be abia hidi badadia danu, to aonega dalana be Iehova do oi hesiai henia ena abia hidi oi karaia guna. (Deu. 30:19, 20) Dahaka dainai? Badina bema Iehova hesiai henia ena abia hidi oi karaia guna, unai ese oi do ia durua headava bona moni gaukara dekenai abia hidi maorodia oi karaia totona. (Luka 14:16-20 sekea.) To, bema headava bona moni gaukara oi abia hidi guna, reana unai ese emu Dirava hesiai henia karana idia hadikaia diba. Unai dainai, namona be mai anina bada gaudia oi abia hidi guna.—Fili. 1:10.

5, 6. Mani oi hahedinaraia, edena dala ai abia hidi maorodia ese gabeai dala ia kehoa diba Iehova ita hesiai henia totona. (Inai magasin lalonai ia hedinarai atikol ladana, “Lau Maragi Neganai Lau Abia Hidi Gauna” itaia.)

⁵ Dirava hesiai henia karana ena abia hidi oi karaia murinai, namona be oi tahua iena ura be dahaka, bona edena dala ai ia do oi hesiai henia. Japan tadikaka ta ia gwau: “Egu mauri lagani be 14 neganai, haroro gaukara ai lau bamoa elda tadikaka be ia itaia lau ese haroro gaukara lau moalelaia lasi. Mai manau ida lau ia hamaoroa: ‘Yuichiro, namona be ruma oi lao, oi helai bona Iehova ese oi totona ia karaia gaudia oi laloa dobu.’ Dina haida lalonai unai lau karaia bona gurigurilaia. Metairametaira, egu lalohadai lau haidaua. Gabeai, lau ese Iehova hesiai henia gaukarana lau moalelaia. Danu, misinari taudia edia sivarai duahia karana lau moalelaia, bona Dirava hesiai henia gaukarana habadaia daladia lau laloa matamaia.”

⁶ Yuichiro ma ia gwau: “Lau ese abia hidi ma haida lau karaia, unai amo gabeai tano ma ta ai Iehova lau hesiai henia diba. Hegeregere, English gado kosi ta lau abia hidi. Haisikuli lau haorea neganai, pat-taim moni gaukara lau karaia, bona English gado be ma haida dekenai lau hadibaia, unai amo lau painia diba. Egu mauri lagani be 20 neganai, Mongolia gado lau dibaia matamaia, bona Mongolia grup ena pablisa taudia lau vadivadi henia. Lagani rua murinai, 2007 ai Mongolia tanona lau vadivadi henia. Painia taudia haida ida lau haroro neganai, lau itaia taunimanima be hereva momokani idia tahua, unai dainai lau ura unuseniai do lau noho bona idia do lau durua. Japan dekenai lau giroa lou bona palani lau karaia. April 2008 ema bona hari, lau be Mongolia dekenai lau painia noho. Iniseniai mauri be auka, to taunimanima be sivarai namona idia abia dae, bona idia lau durua diba Iehova kahirakahira idia lao totona. Lau mamia lau ese mauri dala namo hereana lau abia hidi.”

7. Ita ta ta ese dahaka abia hidi do ita karaia, bona Mose amo dahaka ita dibaia?

⁷ Iehova ena Witnes taudia ta ta sibona ese abia hidi do ia karaia, edena dala ai Iehova do ia hesiai henia. (Ios. 24:15) Ta ese oi do ia hamaoroa lasi oi headava o lasi, daika do oi adavaia o edena moni gaukara do  oi abia. Do oi abia hidi moni gaukara ena kosi be nega kwadogina sibona lalonai do oi karaia, a? Umui Keristani matamata taudia haida be ogogami hanuadia ai umui noho; haida be taga bada siti lalodiai umui noho. Tanobada hegegemadai emui kara, diba, ura gaudia, bona abidadama be idauidau. Reana emui mauri be Aigupito ai idia noho Heberu memerodia eiava Mose ena mauri hegeregerena. Mose be king ena ruma ai ia noho, to Heberu memerodia be igui hesiai taudia. (Eso. 1:13, 14; Kara 7:21, 22) Idia danu be mai anina bada negana ai idia noho. (Eso. 19:4-6) Idia ta ta be abia hidi do idia karaia, edia mauri be edena bamona do idia gaukaralaia. Mose be abia hidi maorona ia karaia.—Heberu 11:24-27 duahia.

8. Abia hidi maorodia oi karaia totona, edeseni amo heduru oi abia diba?

⁸ Iehova ese oi ia durua oi matamata negana lalonai abia hidi maorodia oi karaia totona. Ia ese hakaua herevadia ia henia emu mauri lalonai oi badinaia totona. (Sal. 32:8) Danu, abidadama tama sina bona kongrigeisen elda taudia ese oi idia durua diba edena dala ai unai hakaua herevadia oi badinaia totona. (Aon. 1:8, 9) Hari, ita ese Baibel ena hakaua herevadia toi do ita herevalaia. Idia ese oi do idia durua abia hidi maorodia oi karaia totona.

9. (a) Edena dala ai Iehova be ita ia matauraia bona ura kwalimu ia henia? (b) ‘Basileia ita tahua guna’ karana ese dahaka dala idauidau do ia kehoa?

⁹ Dirava ena Basileia bona ena kara maoromaoro do umui tahua guna. (Mataio 6:19-21, 24-26, 31-34 duahia.) Iehova be ita ia matauraia dainai, ura kwalimu ia henia abia hidi ita karaia totona. Ia gwau lasi emu nega ibounai be haroro gaukara ai do oi haorea. To Iesu ese ita ia durua totona, Basileia do ita tahua guna ena hakaua herevana ia gwauraia. Unai hakaua herevana oi badinaia neganai, dala do ia kehoa Iehova bona emu neiba taudia dekenai lalokau do oi hahedinaraia, bona mauri hanaihanai ena helaro do oi laloa bada. Headava bona moni gaukara totona oi karaia abia hidi ese idia hahedinaraia oi be tauanina gaudia oi laloa momo, eiava idia hahedinaraia oi be Dirava ena Basileia bona ena kara maoromaoro oi tahua goadagoada?

10. Dahaka dainai Iesu ia moale, bona edena abia hidi ese oi do ia hamoalea?

¹⁰ Haida hesiai henia karana amo moale oi davaria. (Kara 20:20, 21, 24, 35 duahia.) Iesu ese ita dekenai unai mai anina bada hakaua herevana ia gwauraia. Iesu ia moale bada badina ia be sibona ena ura ia dadaraia, to Tamana ena ura ia karaia. Ia itaia manau taudia ese sivarai namona idia abia dae neganai, ia moale bada. (Luka 10:21; Ioa. 4:34) Reana oi danu be ma haida oi durua neganai, oi moale bada. Bema Iesu ena hakaua herevadia hegeregerena abia hidi oi karaia, Iehova do oi hamoalea bona do oi moale danu.—Aon. 27:11.

11. Dahaka dainai Baruku ese ena hesiai gaukara ia moalelaia lasi, bona Iehova ese dahaka sisiba ia henia?

¹¹ Moale korikorina be Iehova hesiai henia karana amo ita davaria diba. (Aon. 16:20) Ieremia ena seketere Baruku be unai ia laloaboio. Nega ta ena hesiai gaukara ia moalelaia lasi. Iehova ese ia hamaoroa: “To oi ese gau namo herea, oi sibona totona, oi tahua noho, a? . . . Inai bamona tahua kara do oi karaia lasi, badina be lau ese taunimanima ibounai dekenai dika do lau havaraia, to oiemu mauri be oi dekenai do lau henia. Do oi lao gabudia ibounai dekenai oi be do oi heau mauri.” (Ier. 45:3, 5) Dahaka ese Baruku do ia hamoalea? Iena ura gaudia do ia karaia bena do ia mase, eiava Iehova ena ura do ia karaia bena Ierusalema ena dika amo do ia roho mauri?—Iam. 1:12.

12. Ramiro be dahaka abia hidi ia karaia dainai moale ia davaria?

¹² Tadikaka ta ladana Ramiro be ma haida  durua karana amo moale ia davaria. Ia gwau: “Egu famili be ogogami taudia bona ai be Bolivia dekenai ai noho. Unai dainai egu kakana be iunivesiti do lau lao ena davana ia ura karaia neganai, unai ese dala ia kehoa mauri namona ai abia totona. To, lau be vanegai sibona lau bapatiso bona Iehova ena Witnes tauna ta ai lau lao, bona painia ta be lau ia boiria ia ida taoni maragina ta dekenai ai haroro totona. Unuseni lau lao bona huina utua dalana lau dibaia murinai, huina utua bisinesi ta lau hamatamaia, unai amo tauanina dalanai sibona lau naria diba. Taunimanima momo be Baibel stadi idia abia dae. Gabeai, egu gado kongrigeisen ta idia haginia bona unai kongrigeisen lau bamoa. Hari, lau be lagani 10 ful-taim hesiai gaukara lau karaia noho. Taunimanima ida sivarai namona be edia gado korikori ai ai stadilaia karana amo lau abia moalena be gaukara ma ta ese ia hereaia diba lasi.”

13. Dahaka dainai matamata negana be nega namona Iehova oi hesiai henia totona?

¹³ Oi matamata lalonai Iehova hesiai henia karana do oi moalelaia. (Hadibaia Tauna 12:1 duahia.) Namo lasi oi laloa moni gaukara ta oi abia guna be namo, bena gabeai Iehova do oi hesiai henia. Matamata negana be nega namona Iehova oi hesiai henia totona. Matamata taudia be ruma bese ena maduna momo idia huaia lasi, bona idia goada hesiai gaukara idauidau idia karaia totona. Oi do matamata lalonai oi ura Iehova totona dahaka do oi karaia? Reana oi ura do oi painia. Eiava, idau gado taudia edia teritori ai do oi haroro. Eiava, kongrigeisen ai emu hesiai gaukara oi habadaia. Herevana emu tahua gauna be dahaka, to sibona oi naria totona moni gaukara ta oi abia be namo. Unai dainai namona be sibona oi nanadaia: ‘Edena moni gaukara do lau abia hidi bona lagani hida treinini do lau karaia?’

14. Moni gaukara oi ura abia hidi neganai, dahaka gaudia oi naria namonamo be namo?

¹⁴ Ita herevalaia Baibel ena hakaua herevadia toi ese oi do idia durua moni gaukara maorona oi abia hidi totona. Reana emu tisa ese oi idia durua edena gaukara ta oi abia hidi totona. Eiava niuspepa ai gaukara haida oi itaia diba, o emu turadia ese oi idia hadibaia diba. Idia amo heduru oi abia diba, to namona be oi naria namonamo. Iehova idia lalokau henia lasi taudia ese emu kudouna ai tanobada ura henia karana idia atoa diba. (1 Ioa. 2:15-17) Tanobada ena gau namodia oi raraia neganai, emu kudouna idia veria diba.—Aonega Herevadia 14:15 duahia; Ier. 17:9.

15, 16. Daika ese oi ia durua diba Baibel ena hakaua herevadia hegeregerena, moni gaukara ta oi abia hidi totona?

¹⁵ Oi karaia diba moni gaukara oi davaria neganai, sisiba namona oi tahua be namo. (Aon. 1:5) Daika ese oi ia durua diba Baibel ena hakaua herevadia hegeregerena, moni gaukara ta oi abia hidi totona? Namona be Iehova bona oi idia lalokau henia taudia, bona emu mauri idia diba namonamo taudia oi kamonai henidia. Idia ese oi do idia durua, oi karaia diba bona oi karaia diba lasi gaudia oi lalopararalaia totona. Reana edia hereva dainai oi ese emu tahua gaudia do oi laloa namonamo lou. Bema emu tama sina be Iehova idia lalokau henia taudia, oi idia durua bada diba! Danu, kongrigeisen elda taudia ese oi dekenai sisiba namodia idia henia diba. Ma danu, painia bona loaloa naria taudia oi hereva henidia diba. Dahaka dainai ful-taim hesiai gaukara idia abia hidi? Edena dala ai painia gaukara idia hamatamaia, tauanina dalanai sibona idia naria, bona dahaka hahenamo idia davaria?—Aon. 15:22.

¹⁶ Oi idia diba namonamo taudia ese oi dekenai sisiba maorona do idia henia. Hegeregere, oi ura haisikuli oi rakatania bona painia gaukara oi hamatamaia, badina sikuli oi hesikulaia, a? Oi ia lalokau henia tauna be emu kara do ia lalopararalaia. Bona oi do ia hagoadaia sikuli oi rakatania lasi totona, badina sikuli amo haheauka karana do oi dibaia. Iehova ena hesiai gaukara lalonai, unai be mai anina bada.—Sal. 141:5; Aon. 6:6-10.

17. Edena bamona moni gaukara oi abia hidi lasi be namo?

¹⁷ Iehova idia hesiai henia taudia be hahetoho idauidau idia davaria diba, bona unai ese Iehova amo idia do ia hadaudaua. (1 Kor. 15:33; Kol. 2:8) Moni gaukara haida ese hahetoho badadia idia havaraia diba. Oi itaia haida be moni gaukara ta idia abia hidi dainai, “edia abidadama ia dika,” bouti be nadi ia botaia bamona, a? (1 Tim. 1:19) Aonega dalana be emu hetura karana Iehova ida ia hadikaia diba moni gaukarana oi abia hidi lasi.—Aon. 22:3.

18, 19. Bema ta ia mamia ia ura lasi Iehova ia hesiai henia, dahaka ia karaia be namo?

¹⁸ Bema mai emu ura ida Iehova oi hesiai henia, emu hesiai gaukara do oi moalelaia. Namona be oi karaia abia hidi ese dala do ia kehoa, inai mai anina bada negana ai mai moale ida Iehova oi hesiai henia totona.—Sal. 148:12, 13.

¹⁹ To, bema oi mamia oi ura lasi Iehova oi hesiai henia, dahaka oi karaia be namo? Gau badana be emu abidadama do oi hagoadaia noho. Aposetolo Paulo be Iehova ena hahenamo ia abia totona ia karaia gauna ia herevalaia. Ia gwau: “Bema umui be mai emui lalohadai idauna, Dirava ese umui dekenai lalohadai maorona do ia hahedinaraia. To guna ita goada ita lao noho hegeregerena, unai dala tamona ai ita raka namonamo noho be namo.” (Fili. 3:15, 16) Namona be Dirava ena lalokau bona sisiba namodia umui laloatao. Iehova sibona be hegeregere momokani oi do ia durua emu matamata negana lalonai, abia hidi maorodia oi karaia totona.