LAU be September 7, 1950 ai, Brooklyn ena Betele ai lau vareai. Unai nega ai, tano idauidau amo idia mai tadikaka taihu 355, edia mauri lagani be 19 ia lao 80, be Betele ai idia gaukara. Idia momo be horoa taudia.

Egu sinana ese lau ia durua eda “moale Diravana” lau hesiai henia totona. (1 Tim. 1:11) Lau be mero maragi neganai, egu sinana be Iehova ia hesiai henia matamaia. July 1, 1939 ai, egu mauri lagani be 10 neganai, Columbus, Nebraska, U.S.A ena sekit hebouhebou dekenai lau bapatiso. Ai rentaia ruma ta dekenai tadikaka taihu handred bamona ai hebou tadikaka Joseph Rutherford ena tok ladana, “Fascism Eiava Ura Kwalimu” ai kamonai totona. Tok ai kamonai noho lalonai hutuma be murimuri ai idia haboua. Bena idia vareai, emai hebou idia hadikaia bona taoni amo ai idia lulua. To, taoni murimurina ai, tadikaka ta ena farm dekenai ai hebou bona program ena kahana orena ai kamonai. Unai dainai, egu bapatiso ena deit lau laloa boio lasi!

Egu sinana be ia gaukara goada lau ia durua hereva momokani ai lau tubu daekau totona. Ena be egu tamana be tau namona, to ia be tomadiho karadia bona Dirava lau tura henia karana ia laloa lasi. To, egu sinana bona Witnes taudia ma haida Omaha Kongrigeisen ai ese lau idia durua.

Haisikuli lau haorea gwauraia neganai, egu mauri ai do lau karaia gauna lau abia hidi. Holidei ta ta lalodiai, egu mauri lagani tamona taudia ida heduru painia lau karaia.

Gilead Sikuli ena klas namba seven amo idia gradueit singul tadikaka rua, John Chimiklis bona Ted Jaracz be emai gabu idia mai loaloa naria gaukara karaia totona. Lau hoa badina edia mauri lagani be 20 bamona sibona. Unai neganai, egu mauri lagani be 18 sibona bona kahirakahira haisikuli do lau haorea. Lau laloatao Tadikaka Chimiklis ese lau ia nanadaia, egu mauri lalonai dahaka do lau karaia. Lau hamaoroa neganai, ia gwau: “Maoro, ful-taim hesiai  gaukara oi karaia be namo. Oi diba lasi dahaka hahenamo do oi davaria.” Unai hagoadaia hereva bona edia haheitalai namona ese lau ia durua bada. Unai dainai, haisikuli lau haorea murinai, lagani 1948 ai lau painia matamaia.

July 1950 ai, lau bona egu tama sina be Yankee Stadium, New York City dekenai idia karaia intanesinol hebouhebou ta dekenai ai lao. Unai hebouhebou ai, Betele gaukara idia ura karaia taudia edia hebou dekenai lau lao. Betele aplikeisen ta lau henia bona lau gwau lau ura unuseniai do lau gaukara.

Ena be egu tamana ese ruma ai lau noho bona painia gaukara lau karaia ia koua lasi, to ia laloa egu daiutu bona aniani ena davana lau henia be namo. Unai dainai, August ai moni gaukara tahua totona lau lao neganai, leta udaia mauana lau sekea guna. Lau totona Brooklyn amo idia siaia revareva ta lau davaria. Tadikaka Nathan H. Knorr ese unai revareva ia sainia bona ia gwau: “Emu Betele aplikeisen ai abia vadaeni. Lau laloparara oi ura Betele ai oi gaukara ela bona hanaihanai. Unai dainai, lau ura September 7, 1950 ai, Betele oi mai, ia be 124 Columbia Heights, Brooklyn, New York dekenai.”

Adorahi ai egu tamana be gaukara amo ia giroa mai neganai, lau hamaoroa lau be gaukara ta lau davaria vadaeni. Ia gwau: “Namo herea, edeseniai do oi gaukara?” Lau haere: “Brooklyn Betele, bona hua ta ta ai egu pei be $10.00.” Ia hoa to ia gwau, bema unai gaukara lau abia hidi, namona be lau hekwarahi lau hagugurua totona. Daudau lasi murinai lagani 1953 ai, Yankee Stadium ena hebouhebou ai egu tamana ia bapatiso!

Lau moale badina egu painia turana Alfred Nussrallah be Betele dekenai idia boiria danu, bona ai ruaosi ai lao hebou. Gabeai ia headava bona ena adavana Joan ida Gilead dekenai idia lao. Unai murinai, idia lao Lebanon ai misinari gaukara idia karaia, bena United States ai loaloa naria gaukarana idia karaia.

Egu gaukara ginigunana be Bindery dekenai, buka lau turia hebou. Lau turia hebou buka ginigunana be, What Has Religion Done for Mankind? Hua eit murinai, lau be Haroro Naria Dipatmen ai idia atoa bona Tadikaka Thomas J. Sullivan henunai lau gaukara. Ia be lagani momo lalonai orea totona ia gaukara bona Dirava amo diba ia abia dainai, lau moale ia ida lau gaukara hebou.

Lagani toi Haroro Naria Dipatmen dekenai lau gaukara murinai, faktori ovasia Max Larson ese lau ia hamaoroa Tadikaka Knorr ia ura lau do ia itaia. Lau laloa kerere ta lau karaia. To lau lalohekwarahi lasi, badina Tadikaka Knorr ese lau ia nanadaia bema lau be gabeai Betele do lau rakatania eiava lasi. Ia ura nega sisina lalonai ta be ena ofesi dekenai do ia gaukara, unai dainai lau ia nanadaia bema unai gaukara lau karaia diba. Lau hamaoroa lau be palani lau karaia lasi Betele rakatania totona. Unai murinai, lau be lagani 20 lalonai iena ofesi dekenai lau gaukara.

Nega momo lau gwau Tadikaka Sullivan, Knorr, Milton Henschel, Klaus Jensen, Max Larson, Hugo Riemer, bona Grant Suiter amo lau abia diba ena davana lau karaia diba lasi. a

 Unai tadikaka idia hegaegae namonamo orea ena gaukara idia karaia totona. Hegeregere, Basileia ena gaukara be gabu momo ai idia karaia totona, tadikaka Knorr be ia gaukara goadagoada bona ia laga-ani lasi. Danu, iena ofesi ai idia gaukara taudia be mai gari lasi ida ia idia hereva henia diba. Ena be gau ta dekenai emai lalohadai be idau, to ai herevalaia neganai ia kamonai.

Nega ta Tadikaka Knorr ese lau ia sisiba henia gaukara maragidia do lau karaia namonamo be gau badana. Hegeregere, lau ia hamaoroa ia be faktori ovasia neganai, Tadikaka Rutherford ese ia rini henia bona ia gwau: “Tadikaka Knorr e, faktori amo aniani totona oi mai neganai, pensolo raba haida oi abia mai. Egu teibolo ai oi atodia.” Tadikaka Knorr ia gwau maoromaoro ia lao raba ia abidia bona ena poketi dekenai ia udaia. Bena dina tubua ai Tadikaka Rutherford ena ofesi dekenai ia abidia lao. Unai be gau maragina, to Tadikaka Rutherford ia durua bada. Bena Tadikaka Knorr be lau ia hamaoroa: “Lau ura daba iboudiai pensolo haida edia matana oi karaia bona egu teibolo ai oi atodia.” Lagani momo lalonai, lau be unai bamona lau karaia.

Nega momo Tadikaka Knorr ia gwau, ai dekenai gaukara ta idia henia neganai ai kamonai namonamo be gau badana. Nega ta, ia be lau dekenai gaukara ta ia henia bona karaia dalana ia gwauraia, to lau kamonai namonamo lasi. Unai dainai ia lau hahemaraia bada. Egu hemami ia dika dainai revareva kwadogina ta amo lau hadibaia egu kerere dainai lau sori bada, bona lau laloa iena ofesi amo lau idia kokia be namo. Gabeai, Tadikaka Knorr ia mai bona ia gwau: “Robert, emu revareva lau duahia. Oi be kerere oi karaia. To, oi lau sisiba henia bona lau diba gabeai unai bamona do oi karaia lasi. Namona be ita gaukara noho.” Iena hebogahisi karana lau laloa bada.

Lagani eit Betele ai lau gaukara murinai, lau laloa Betele do lau rakatania lasi. To, unai ia idau. Lagani 1958 ai, Yankee Steidiam bona Polo Grounds edia intanesinol hebouhebou dekenai Lorraine Brookes lau itaia. Guna, lagani 1955 ai, ia be Montreal, Canada ai ia painia neganai ai hedavari. Iena ura be ful-taim hesiai gaukara do ia karaia, bona herevana Iehova ena orea ese edeseni idia siaia, do ia lao sibona. Unai ese egu lalona ia veria. Lorraine ena tahua gauna be Gilead Sikuli dekenai do ia lao. Lagani 1956 ai, ena mauri lagani be 22 neganai, ia idia boiria Gilead Sikuli ena klas namba 27 do ia lao totona. Ia gradueit murinai, idia siaia Brazil ai misinari gaukara ia karaia totona. Bena lagani 1958 ai lau bona Lorraine ai hedavari lou, bona lau noia lau ia adavaia totona bona ia abia dae. Palani ai karaia vaira lagani ai do ai headava bona misinari gaukara ai karaia.

 Tadikaka Knorr dekenai egu palani lau herevalaia neganai, ia gwau namona be lagani toi do ai naria, bena do ai headava, unai amo Brooklyn Betele ai ai noho diba. Unai negai, headava matamata taudia be Betele ai idia noho totona, namona be idia ta be lagani 10 o ma haida Betele ai ia gaukara bona ma ta be lagani toi do ia gaukara. Unai dainai, ai do headava lasi neganai, Lorraine be Brazil Betele ai lagani rua bona Brooklyn Betele ai lagani ta ia gaukara.

Ai maoheni bona lagani rua lalonai ta ta dekenai revareva sibona ai torea. Unai negai telefon amo oi rini ena davana be bada bona e-mail be lasi! September 16, 1961 ai, ai headava bona Tadikaka Knorr ese tok ia henia. Momokani, toana be ai maoheni bona lagani rua ai naria be daudau herea. To hari, ai be lagani 50 ai headava vadaeni bona emai headava maurina ai moalelaia bada!

Lagani 1964 ai, lau be zoun naria tauna ai lau lao bona tano idauidau lau vadivadi. Unai negai, zoun naria taudia be edia adavadia ese idia bamoa lasi. To, lagani 1977 ai unai idia haidaua bona edia adavadia ese idia bamoa. Unai lagani ai, lau bona Lorraine ese Grant bona Edith Suiter ai bamoa, bona Germany, Austria, Greece, Cyprus, Turkey, bona Israel edia brens ofesi ai vadivadi henidia. Lau ese tano ibounai 70 lau vadivadi vadaeni.

Lagani 1980 ai, Brazil ai vadivadi neganai, Belem siti dekenai ai lao; guna Lorraine be unuseniai misinari gaukara ia karaia. Danu, Manaus tadikaka taihu ai vadivadi henia. Tok ta ai kamonai lalonai, ai itaia steidiam ai orea ta be sibona idia helai bona Brazil taudia edia kara, hegeregere taihu ta ta be edia medena idia kisi henia bona tadikaka idia sekehani karana idia karaia lasi. Dahaka dainai?

Idia be Amazon ena uda badana lalonai lepera taudia edia gabu amo idia mai Witnes tadikaka taihu. Edia gorere dainai, idia ura lasi hebouhebou idia mai taudia ma haida edia badinai idia helai. To, edia abidadama ese emai kudouna ia hamarerea, bona edia moale vairadia do ai laloaboio lasi! Isaia ena hereva be ia momokani, ia gwau: “Egu hesiai taudia ese ane do idia abia, edia moale be bada dainai.”​—⁠Isa. 65:14.

Nega momo lau bona Lorraine be lagani 60 mai kahana lalonai Iehova ai hesiai henia negadia ai laloa lou. Ai moale badina Iehova ena orea ena hakaua dalana ai badinaia bona hahenamo ai davaria. Ena be hari tano idauidau ai lau loaloa diba lasi, to dina ta ta ai Kodineita Edia Komiti bona Hesiai Komiti ida lau gaukara, unai amo Hakaua Oreana lau durua. Lau moale badina unai dala maragina amo tanobada ibounai tadikaka oreana lau durua. Ai hoa badina ai itaia matamata taudia momo be ful-taim hesiai gaukara lalonai idia vareai, bona Isaia hegeregerena idia gwau: “Lau be inai, . . . Lau do oi siaia!” (Isa. 6:8) Unai matamata taudia lau itaia neganai, guna lau ia hagoadaia sekit naria tauna ta ena hereva lau laloa lou, ia gwau: “Ful-taim hesiai gaukara oi karaia be namo. Oi diba lasi dahaka hahenamo do oi davaria.”