1, 2. (a) Idaunegai Israela ai mamoe naria tauna ena gaukara haida be dahaka? (b) Edena dala ai tama sina be mamoe naria taudia bamona?

 IDAUNEGAI Israela hanuana ai, mamoe naria taudia be gaukara aukana idia karaia. Idia be siahu bona keru negadiai idia gaukara, bona henaohenao taudia bona dagedage animal amo edia mamoe idia gimaia. Edia mamoe idia sekea namonamo bona gorere o bero mamoe idia durudia. To, nega bada be mamoe maragidia idia naria, badina edia tauanina be ia goada lasi.—Gen. 33:13.

² Keristani tama sina be mamoe naria taudia bamona, badina idia ese mamoe naria tauna ena kara namodia haida idia hahedinaraia danu. Edia maduna be edia natudia dekenai ‘Iehova ena matahakani bona sisiba do idia hadibaia.’ (Efe. 6:4) Unai be gaukara aukana, a? Oibe! Badina hanaihanai, natudia be sibodia edia ura bona Satani ena tarapu idauidau ese edia lalona ia veria. (2 Tim. 2:22; 1 Ioa. 2:16) Bema oi be mai emu natudia, edena bamona do oi durudia? Mani emu natudia do oi durua daladia toi ita herevalaia: (1) Idia oi diba namonamo, (2) oi ubudia, bona (3) oi hakaudia.

3. Tama sina be edena dala ai edia natudia do idia diba namonamo?

³ Mamoe naria tauna namona ese ena mamoe ta ta ia sekea namonamo, unai amo do ia diba idia gorere o lasi. Laulau dalanai emu natudia dekenai unai bamona oi karaia diba. Baibel ia gwau: “Oiemu mamoe serina edia noho dalana do oi diba namonamo.” (Aon. 27:23, BHḡ) Unai oi karaia totona, namona be emu natudia edia kara, lalohadai bona hemami oi laloa. Edena dala ai unai oi karaia diba? Dala namona ta be hanaihanai idia ida oi herevahereva.

4, 5. (a) Edena dala ai emu natuna oi durua diba oi ida ia herevahereva totona? (Laulau ginigunana itaia.) (b) Oi be dahaka oi karaia unai amo dala oi kehoa emu natudia be oi ida idia herevahereva totona?

⁴ Tama sina haida idia itaia, edia natudia be mero o kekeni badadia ai idia lao neganai, idia ida idia herevahereva be auka. Badina natudia idia ura lasi edia lalohadai o hemami idia gwauraia hedinarai. Bema emu natudia be unai bamona, dahaka oi karaia diba? Namo lasi idia oi doria, nega daudau lalonai gau momo umui herevalaia totona. To, nega namodia idauidau umui gaukaralaia idia umui hereva henia totona. (Deu. 6:6, 7) Namona be palani oi karaia gau ta umui karaia hebou totona. Hegeregere, umui raka hebou, motuka amo gabu ta umui lao, umui gadara hebou o ruma gaukarana ta umui karaia hebou. Unai bamona negadiai, memero kekeni be edia lalona ai idia noho gaudia idia gwauraia hedinarai diba.

⁵ To, dahaka oi karaia diba bema emu natuna ia ura lasi ia herevahereva? Reana dala idauna ta oi tohoa diba. Hegeregere, oi nanadaia lasi sikuli be edena bamona, to oi ese unai dina ai oi karaia gaudia oi herevalaia. Bena reana ia ese sikuli ai idia vara gaudia do ia herevalaia. Eiava bema oi ura iena lalohadai gau ta dekenai oi diba, namona be oi nanadaia iena turadia edia lalohadai unai gauna dekenai be dahaka. Bena emu natuna oi nanadaia, iena turadia dekenai dahaka sisiba do ia henia.

6. Edena dala ai natudia do idia mamia, idia do oi kamonai bona badu henia lasi?

⁶ Momokani, bema oi ura emu natudia be oi ida do idia herevahereva, namona be idia mamia oi be edia hereva do oi kamonai bona do oi badu henidia lasi. Bema tama sina be idia bisi bona edia natudia totona nega idia atoa lasi, natudia be idia dekenai edia hekwakwanai do idia gwauraia hedinarai lasi. Emu natudia be oi dekenai idia mai totona, dahaka oi karaia diba? Namo lasi oi gwau: “Lau oi hereva henia diba,” badina unai be hegeregere lasi. Namona be emu natudia idia mamia oi idia hereva henia neganai, do oi badu lasi bona idia herevalaia gauna do oi laloa bada. Tama sina momo be unai bamona idia karaia. Hegeregere, mauri lagani 19 kekenina, Kayla ia gwau: “Egu tamana dekenai gau idauidau lau herevalaia diba. Ia be egu hereva ia utua lasi bona lau ia kota henia lasi, to ia kamonai sibona. Bena gabeai sisiba namona ia henia.”

7. (a) Tama sina be edena dala maorona ai natudia ida boifren o gelfren karana idia herevalaia diba? (b) Tama sina ese edena dala ai natudia idia habadua diba?

⁷ Reana nega haida emu natudia ida mai anina bada gaudia, hegeregere boifren o gelfren karana umui herevalaia be auka. To, umui herevahereva neganai, namona be idia dekenai mero o kekeni tura henia dalana maorona umui hadibaia, namo lasi umui sisiba auka henidia sibona. Mani inai haheitalai oi laloa: Reana aniani gabuna ta dekenai oi lao aniani totona. To, aniani lista ai idia torea aniani ibounai badinai be inai hadibaia hereva idia torea: “Oi ania neganai emu bogana do ia hisihisi.” Reana, oi be unai aniani rumana do oi rakatania bona gabu ma ta dekenai do oi lao, ani? Emu natudia be unai bamona idia karaia diba. Hegeregere, bema oi dekenai heduru totona idia mai, to emu “aniani lista” ai be sisiba aukadia  sibona idia noho, oi do idia rakatania. (Kolose 3:21 duahia.) Namona be heduru daladia bona sisiba namodia oi henia. Taihu matamata ta Emily, ia gwau: “Egu tama sina be lau dekenai mero ta tura henia karana idia herevalaia neganai, lau idia gwau henia lasi. To, idia ese mero ta ena kara lau dibaia bona adavana ta do lau davaria ena moale idia herevalaia. Unai dainai, idia dekenai mai gari lasi ida egu hemami lau herevalaia diba. Momokani, lau ura idia dekenai egu hetura karadia lau herevalaia, lau ura lasi gau ta lau hunia.”

8, 9. (a) Dahaka namo do ia vara bema emu natudia edia hereva oi utua lasi? (b) Emu natudia edia hereva oi kamonai dainai, dahaka namo umui davaria vadaeni?

⁸ Kayla ena hereva bamona, bema oi ese emu natudia oi kamonai henia namonamo, do idia ura oi dekenai do idia mai. (Iamesi 1:19 duahia.) Adavana lasi sina ta, Katia ia gwau: “Guna, lau be egu natuna kekeni dekenai lau haheauka lasi. Ia hereva noho lalonai ena hereva lau utua, badina lau hesiku o lau ura lasi lau kamonai. To, hari egu kara lau haidaua dainai, ia danu ena kara ia haidaua. Hari, ai be tura namodia.”

⁹ Tama ta ladana Ronald be iena natuna kekeni ida unai bamona hekwakwanai ia davaria danu. Ia gwau: “Egu natuna ia gwau ia be ena sikuli merona ta ia ura henia neganai, lau badu dikadika. To gabeai, Iehova ese mai haheauka bona manau ida ena hesiai taudia ia kara henidia dalana lau laloa lou. Bona lau laloparara, namona be nega lau henia egu natuna ena hemami ia gwauraia hedinarai totona, bena gabeai do lau sisiba henia. Unai bamona lau karaia dainai lau moale! Unai be nega ginigunana egu natuna ena hemami lau lalopararalaia. Gabeai, mai gado namo ida lau hereva henia diba. Bona lau hoa badina ia be egu sisiba ia abia dae. Bona mai ena lalona ibounai ida ia gwau iena kara do ia haidaua.” Bema hanaihanai emu natudia ida oi herevahereva, edia lalohadai bona hemami do oi diba. Unai amo edia mauri lalonai abia hidi idia karaia neganai, oi be mai emu dala idia oi hakaua totona. a

10, 11. Edena dala ai emu natudia oi durua diba Dirava idia rakatania lasi totona?

¹⁰ Mamoe naria tauna namona ia diba iena mamoe ta be mamoe serina amo ia boio diba. Reana ia be gabu idauna dekenai ia noho ava namodia ania totona ia lao, bena gabu sisina daudau ai idia noho ava dekenai ma ia lao ela bona mamoe serina amo ia boio. Unai hegeregerena, natu ta be hereva momokani ena dala  ia rakatania matamaia diba, badina tura dikadia ia bamoa o moale karana dikana ta lalonai ia vareai. (Aon. 13:20) Unai ia vara lasi totona, edena dala ai emu natuna oi durua diba?

¹¹ Emu natudia oi hadibaia lalonai, bema edia manoka karana ta oi itaia, karaharaga oi durudia be namo. Oi durudia edia Keristani kara namodia idia goadalaia totona. (2 Pet. 1:5-8) Ruma bese tomadiho negana be nega namona unai oi karaia totona. October 2008 Basileia Gaukara pepana ia gwau: “Ruma bese kwaradia e, Iehova ena vairanai emui maduna be hanaihanai ruma bese stadi umui karaia be namo.” Oi ese ruma bese ena tomadiho negana oi gaukaralaia namonamo emu natudia oi durua totona, a? Emu natudia do idia moale, bema idia itaia oi ese nega oi atoa idia oi durua, Dirava idia tura henia namonamo totona.—Mat. 5:3; Fili. 1:10.

12. (a) Matamata taudia haida be edena dala ai famili stadi karana amo namo idia davaria? (Maua ladana “ Idia Moalelaia” itaia danu.) (b) Edena dala ai oi be famili stadi amo namo oi davaria?

¹² Kekeni matamata, Carissa ia hahedinaraia Ruma Bese ena Tomadiho negana ese iena famili ia durua bada. Ia gwau: “Lau moale badina ai helai bona ai herevahereva hebou. Unai ai karaia neganai, emai hetura karana ai hagoadaia bona memori namodia ai karaia. Egu tamana be hanaihanai Ruma Bese ena Tomadiho ia karaia. Lau ia hagoadaia badina lau itaia ia dekenai unai be mai anina bada gauna, bona unai ese lau ia durua emai famili stadi negana lau laloa bada totona. Unai dainai ia lau matauraia, badina ia be egu tamana bona egu abidadama ia hagoadaia tauna.” Taihu matamata Brittney ia gwau: “Ruma Bese ena Tomadiho negana ese lau ia durua egu tama sina lau tura henidia namonamo totona. Lau ia hadibaia egu tama sina idia ura egu hekwakwanai idia diba bona lau idia durua. Emai famili ia durua ai lalotamona bona ta ta ai tura henia totona.” Oibe, famili stadi karana amo emu natudia be Baibel amo oi ubudia neganai, oi be mamoe naria tauna namona. b

13. Edena dala ai natuna ta ita durua diba Iehova ia hesiai henia totona?

¹³ Mamoe naria tauna namona be ena itotohi ia gaukaralaia mamoe ia hakaua bona gimaia totona. Iena gaukara badana ta be “rei namona gabudia” dekenai idia do ia hakaua lao. (Ese. 34:13, 14.) Tama sina e, umui be unai bamona umui karaia danu, a? Oi ura emu natudia do oi hakaua mai Iehova idia hesiai henia totona. Oi ura emu natudia be Salamo torea tauna bamona do idia gwau: “Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia noho.” (Sal. 40:8) Unai bamona idia laloa matamata taudia be Iehova dekenai edia mauri do idia gwauhamatalaia bona do idia bapatiso. Gau badana be diba maorona idia abia murinai, unai abia hidi badana idia karaia, bona mai edia lalona ibounai ida idia ura Iehova idia hesiai henia.

14, 15. (a) Tama sina be dahaka idia karaia be namo? (b) Dahaka dainai matamata taudia be tomadiho momokani idia daradaralaia diba?

¹⁴ To, bema emu natudia be Iehova idia tura henia lasi, bona idia laloa Iehova ena Witnes taudia be hereva momokani idia hadibaia lasi be edena bamona? Namona be oi hekwarahi idia oi hadibaia mai edia kudouna ibounai ida Iehova Dirava do idia lalokau henia, bona Iena kara namodia idia laloa bada totona. (Apok. 4:11) Unai murinai, idia sibona ese Dirava do idia tomadiho henia ena abia hidi do idia karaia diba.

¹⁵ To, bema emu natudia be mai edia daradara gaudia, namona be oi haheauka bona oi hakaudia noho. Edena bamona idia do oi naria bona durua, bena do idia laloparara Iehova tomadiho henia karana be mauri dalana hereadaena,  bona idia dekenai moale do ia mailaia diba? Namona be idia daradaralaia gauna ena badina oi tahua. Hegeregere, emu natuna mero be Baibel ena hahediba herevadia ia abia dae lasi, eiava ia hemarai ena turadia vairanai hereva momokani ia herevalaia totona, a? Emu natuna kekeni be Dirava ena taravatu ia badinaia ena namo ia daradaralaia, eiava ena turadia ese idia dadaraia dainai ia lalohisihisi, a?

16, 17. Edena dala ai tama sina ese natudia idia durua diba idia sibona ese Iehova idia tura henia totona?

¹⁶ Herevana dahaka dainai emu natudia idia daradara, to oi ese idia oi durua diba unai daradara idia kokia totona. Edena dala ai? Tama sina momo idia davaria inai henanadai ese edia natudia ia durua edia lalohadai idia gwauraia totona: “Keristani maurina oi badinaia be auka lasi o mai ena hekwarahi? Oi laloa Keristani maurina ena namo be dahaka? Iehova oi hesiai henia totona dahaka gaudia do oi dadaraia? Oi laloa hari bona gabeai do ita abia hahenamo ese do oi dadaraia gaudia idia hereaia, a? Edena dala ai?” Tama sina e, namo lasi oi be pulisi tauna ta bamona emu natuna oi nanadaia, to mai hemataurai ida oi hereva henia. Ia ida Mareko 10:29, 30 oi duahia. Matamata taudia haida be lista rua dekenai edia lalohadai idia torea—kahana ta be do idia dadaraia gaudia bona kahana ta be hahenamo gaudia. Tama sina bona natudia be lista ai idia noho gaudia idia duahia neganai, hekwakwanai gaudia idia lalopararalaia diba, bona idia gaukara hebou unai gaudia idia hamaoromaoroa totona. Bema ita be kamonai taudia ida Baibel Hadibaia bona “Dirava Ena Lalokau” bukana ita stadilaia, namona be eda natudia ida ita stadilaia danu. Oi be unai bamona oi karaia, a?

¹⁷ Idia tubu daekau neganai, emu natudia sibona ese abia hidi do idia karaia Iehova do idia hesiai henia o lasi. Namo lasi oi laloa oi ese Dirava oi tomadiho henia dainai, emu natudia danu be unai bamona do idia karaia. Idia sibona ese Iehova idia tura henia be gau badana. (Aon. 3:1, 2) Bema natu ta be unai ia karaia lasi, reana oi durua inai henanadai haida ia laloa totona: “Edena bamona lau diba Dirava be ia noho momokani? Edena bamona lau diba Iehova be lau ia laloa bada? Dahaka dainai lau abia dae momokani Iehova ena taravatu be egu namo totona?” Tama sina e, namona be mamoe naria tauna namona bamona mai haheauka ida emu natuna o natudia oi durua, bena idia sibona ese do idia itaia Iehova tomadiho henia karana be mauri dalana hereadaena. c—Roma 12:2.

18. Edena dala ai tama sina ese Mamoe Naria Tauna Badana idia tohotohoa diba?

¹⁸ Keristani taudia momokanidia ibounai idia ura Mamoe Naria Tauna Badana idia tohotohoa. (Efe. 5:1; 1 Pet. 2:25) To, gau badana be tama sina ese edia mamoe—edia lalokau natudia unai—edia noho do idia diba namonamo, bona do idia hekwarahi Iehova ese ia hegaegaelaia hahenamo dekenai edia natudia idia hakaua lao totona. Oibe, tama sina e, namona be hanaihanai Iehova ena dala ai emui natudia umui hadibaia!