1, 2. Dahaka dainai Dirava ese hahine ena garana ia gimaia be namo?

BAIBEL lalonai idia torea peroveta herevana ginigunana be mai anina bada Iehova ena ura hagugurua totona. Dirava be Eden kontrakana ia gwauhamatalaia neganai, ia gwau: “Lau ese badu oi bona hahine ihuanai do lau atoa bona oiemu garana bona iena garana ihuanai.” Idia badu dikadika, a? Oibe. Iehova ia gwau: “Ia [hahine ena garana] ese emu [Satani ena] kwarana do ia haberoa bona oi ese iena aena geduna do oi haberoa.” (Gen. 3:15, BHḡ) Gaigai bona hahine be ta ta idia inai henia bada herea, unai dainai Satani be ia hekwarahi bada hahine ena garana ia hamasea totona.

² Unai dainai Salamo torea tauna be Dirava ena taunimanima totona, inai guriguri ia gwauraia: “Itaia, oi dekenai idia tuari henia gwauraia taudia, ese tuari totona idia toreisi noho. Oi idia badu henia taudia be idia dagedage noho. Oiemu bese taudia hadikaia totona, idia ese dala idia tahua noho. Oi ese oi naria noho taudia hadikaia totona, inai tau dikadia ese idia haboua noho. Idia ese inai bamona idia hereva noho, idia gwau, ‘Umui mai, unai bese do ita hadikaia ore.’” (Sal. 83:2-4) Namona be hahine ena garana do ia vara besena be Dirava ese ia gimaia, unai amo Satani ese do  ia hamasedia lasi. Unai karaia totona, Iehova ese kontraka ma haida ia karaia unai amo iena ura ia hagugurua diba.

3, 4. (a) Taravatu kontrakana be edena negai ia guguru matamaia, bona Israela taudia idia gwauhamata dahaka do idia karaia? (b) Dahaka dainai Dirava ese Taravatu kontrakana ia karaia?

³ Aberahamo, Isako bona Iakobo edia tubudia be idia momo herea idia lao neganai, Iehova ese bese badana ta ai ia halaodia—idaunegai Israela besena unai. Mose amo, Iehova ese unai bese ida kontraka ta ia karaia. Iehova ese Taravatu ia henidia bona idia gwau do idia badinaia. Unai kontraka be Taravatu kontrakana. Baibel ia gwau: “[Mose ese] gwauhamata taravatuna ena buka ia abia, Lohiabada ena oda hereva unai, bona Israela taudia edia vairana dekenai ia duahia hedinarai. Vadaeni idia gwau, ‘Lohiabada ena oda hereva ibounai do ai karaia, bona do ai kamonai henia.’ Gabeai Mose ese [idia bouboulaia boromakau edia] rara, disi lalonai gauna ia abia, Israela taudia edia latanai ia negea lao, ia gwau, ‘Inai rara ese Lohiabada ena gwauhamata taravatuna, umui danu ia karaia gauna ia hamomokania, inai buka ena hereva ibounai hegeregerena.’”—Eso. 24:3-8.

⁴ Taravatu kontrakana be lagani 1513 B.C.E. ai, Sinai Ororona dekenai ia guguru matamaia. Unai kontraka amo Iehova ese Israela besena be iena bese ai ia halaoa. Iehova be edia ‘Kota Biaguna bona edia King’ ai ia lao. (Isa. 33:22) Israela besena ena sivarai ese ia hahedinaraia, dahaka ia vara diba bema taunimanima be Dirava ena kara maoromaoro taravatudia idia badinaia eiava lasi. Taravatu ia gwau, idia ese kaivakuku tomadiho henia taudia do idia adavaia lasi, bona dirava idaudia do idia tomadiho henia lasi. Unai amo Aberahamo ena tubudia be do idia miro lasi.—Eso. 20:4-6; 34:12-16.

5. (a) Taravatu kontrakana ese Israela besena dekenai dahaka dala ia kehoa? (b) Dahaka dainai Dirava ese Israela ia dadaraia?

⁵ Taravatu kontrakana ese hahelaga taudia edia gaukara dalana ia herevalaia danu. Unai hahelaga taudia ese vaira nega ai taunimanima do idia durua hahelaga taudia ma haida idia laulaulaia. (Heb. 7:11; 10:1) Oibe, unai kontraka amo Israela besena be mai ena dala “hahelaga taudia” ai do idia lao totona. To, unai hahenamo abia totona, Israela taudia ese Iehova ena taravatu idia badinaia be namo. (Esodo 19:5, 6, BHḡ duahia.) To, Israela besena be unai bamona idia karaia lasi. Idia ese Aberahamo ena garana ena kahana ginigunana, Mesia, idia idia dadaraia. Unai dainai, Dirava ese idia ia dadaraia danu.

6. Taravatu ese dahaka ia hagugurua?

⁶ Israela besena be Dirava idia kamonai henia lasi dainai, idia be hahelaga taudia ai idia lao lasi. To, namo lasi ita gwau Taravatu kontrakana ena gaukara be ia guguru lasi. Dirava ese unai Taravatu ia karaia ena badina  be garana do ia gimaia bona taunimanima be Mesia dekenai do ia hakaua lao. Unai dainai, Keriso ia mai bona ia hedinarai neganai, Taravatu ena gaukara ia ore. Baibel ia gwau: “Keriso be Taravatu ena dokona.” (Roma 10:4) To, daidia be hahelaga taudia ai do idia lao? Iehova Dirava ese kontraka ma ta ia karaia bese matamatana ta ia haboua totona.

7. Iehova ese peroveta tauna Ieremia amo dahaka ia perovetalaia?

⁷ Taravatu kontrakana ia do ore lasi neganai, Iehova be peroveta tauna Ieremia amo ia gwau ia ese Israela besena ida “taravatu matamatana” ta do ia karaia. (Ieremia 31:31-33 duahia.) Unai “taravatu matamatana” be Taravatu kontrakana bamona lasi, badina ia lalonai kara dika gwauatao totona animal boubou do idia gabua lasi. To, edena dala ai Dirava ese edia kara dika do ia gwauatao?

8, 9. (a) Iesu ese ia bouboulaia rarana ese dahaka ia hagugurua? (b) Kontraka matamatana lalonai idia noho taudia be dahaka hahenamo do idia abia? (Laulau ginigunana itaia.)

⁸ Lagani momo murinai, Nisan 14, 33 C.E. ai, Iesu ese Lohiabada ena Anibou ia hamatamaia. Iesu ese wain kapusi ia abia bona iena aposetolo taudia 11 dekenai ia gwau: “Inai kapusi ese kontraka matamatana ia laulaulaia, egu rara dainai ia vara bona umui totona do ia bubua.” (Luka 22:20) Mataio bukana ese Iesu be wain ia herevalaia dalana be inai bamona ia gwauraia: “Inai be egu rara, ia be ‘kontraka ena rara’ ia laulaulaia, taunimanima edia kara dika gwauatao totona do ia bubua.”—Mat. 26:27, 28.

⁹ Iesu ese ia bouboulaia rarana ese unai kontraka matamatana ia hamomokania. Danu, iena rara be nega tamona ia bouboulaia, bona unai ese dala ia kehoa Dirava ese taunimanima momo edia kara dika do ia gwauatao ela bona hanaihanai. Iesu be unai kontraka matamatana henunai ia noho lasi. Ia be goevadae tauna dainai, Dirava ese ena dika do ia gwauatao lasi. To, Dirava ese Iesu ia bouboulaia rarana ia gaukaralaia Adamu ena natudia edia kara dika ia gwauatao totona. Danu, Ia ese abidadama taudia haida be lauma helaga amo ia horodia bona iena “natudia” ai ia halaodia diba. (Roma 8:14-17 duahia.) Dirava ena matanai idia be kara dika taudia lasi, to idia be Iesu, Dirava ena Natuna goevadaena bamona. Unai horoa taudia be “Keriso ida ahuna do [idia] abia hebou,” bona idaunegai Israela besena ese idia haboioa hahenamona do idia abia, anina be “hahelaga taudia” ai do idia lao. Aposetolo Petero be “Keriso ida ahuna do [idia] abia hebou” taudia ia herevalaia ia gwau: “Umui be ‘abia hidi besena, king gaukara umui karaia hahelaga taudia, bese helagana, bona Dirava ena taunimanima korikoridia.’ Vadaeni dibura amo ena diari namo herea dekenai umui ia boiria tauna ena ‘kara hereadaedia be gabu ibounai dekenai umui gwauraia hedinarai be namo.’” (1 Pet. 2:9) Oibe, unai kontraka matamatana be mai anina bada! Iesu ena murinai idia raka taudia dekenai maoro ia henia, Aberahamo ena garana ena kahana iharuana ai idia lao totona.

10. Kontraka matamatana be edena negai ia guguru matamaia, bona dahaka dainai guna ia guguru lasi?

¹⁰ Kontraka matamatana be edena negai ia guguru matamaia? Ia be Lohiabada ena Anibou idia karaia negana ai ia matamaia lasi. Dahaka dainai? Badina ia guguru totona, Iesu ese ena rara do ia bouboulaia bona guba ai Iehova vairanai do ia hedinarai. Unai sibona lasi, to lauma helaga be “Keriso ida ahuna do [idia] abia hebou” taudia latanai do ia diho guna. Unai dainai, Pentekoste 33 C.E. ai, Iesu ena murinai idia raka abidadama taudia be lauma helaga ese ia horodia negana ai, Kontraka matamatana ia guguru matamaia.

11. Edena dala ai kontrakana matamatana ese dala ia kehoa Israela bona Idau Bese taudia be lauma Israela ai idia lao totona, bona edia namba be hida?

 ¹¹ Ena be Ieremia amo Iehova ia gwau ia ese Israela besena ida kontrakana matamatana ta do ia karaia, to Taravatu kontrakana ia “hadokoa” lasi ela bona kontrakana matamatana ia guguru matamaia. (Heb. 8:13) Unai ia vara neganai, Dirava ese Israela taudia bona Idau Bese taudia be maka tamona ai ia kara henidia diba, badina edia “kopina utua karana be kudouna ai, unai be lauma helaga amo ia vara, to idia torea taravatuna amo ia vara lasi.” (Roma 2:29) Idia ida kontraka matamatana ia karaia neganai, Dirava ese iena “taravatu be edia lalona ai do [ia] atoa, bona edia kudouna ai do [ia] torea.” (Heb. 8:10) Unai kontrakana matamatana lalonai idia noho taudia edia namba be 144,000 bona idia be bese matamatana ta—“Dirava ena Israela,” o lauma Israela.—Gal. 6:16; Apok. 14:1, 4.

12. Taravatu kontrakana bona kontraka matamatana be edena dala ai idia hegeregere?

¹² Taravatu kontrakana bona kontraka matamatana be edena dala ai idia hegeregere? Taravatu kontrakana be Iehova bona Israela bese korikorina huanai; bona kontraka matamatana be Iehova bona lauma Israela huanai. Taravatu kontrakana lalonai Mose be huanai ia gini tauna; bona kontraka matamatana lalonai Iesu be huanai ia gini tauna. Taravatu kontrakana be animal ena rara ese ia hagugurua, bona kontraka matamatana be Iesu ese ia bouboulaia rarana ese ia hagugurua. Bona Israela besena be Mose ese Taravatu kontrakana henunai ia gunalaidia hegeregerena, kontraka matamatana henunai idia noho taudia be Iesu, kongrigeisen ena Kwarana, ese ia gunalaidia.—Efe. 1:22.

13, 14. (a) Edena dala ai kontraka matamatana be Basileia ia herevalaia? (b) Lauma Israela taudia be Keriso ida guba ai idia lohia totona, dahaka ia vara be namo?

¹³ Kontraka matamatana be Basileia ia herevalaia, badina ia amo bese helagana ta ia vara, bona unai taudia be guba Basileia lalonai king bona hahelaga taudia ai do idia lao. Unai bese be Aberahamo ena garana ena kahana iharuana. (Gal. 3:29) Unai dainai, kontraka matamatana ese ia hamomokania, Aberahamo kontrakana be do ia guguru.

¹⁴ Kontraka matamatana amo bese helagana ta, lauma Israela ia vara, bona unai kontraka ese idia dekenai maoro ia henia “Keriso ida ahuna do [idia] abia hebou” totona. To, edena dala ai horoa taudia be guba ai Keriso ida king bona hahelaga taudia bamona do idia lohia? Kontraka ma ta ese unai ia hagugurua.

15. Iesu be iena abidadama aposetolo taudia ida edena kontraka ia karaia?

¹⁵ Iesu ese Lohiabada ena Anibou ia hamatamaia murinai, iena abidadama aposetolo taudia ida kontraka ta ia karaia. Unai be Basileia kontrakana. (Luka 22:28-30 duahia.) Kontraka haida lalonai Iehova ese ma haida ida gwauhamata ia karaia, to inai kontraka be Iesu bona horoa taudia huanai. Iesu ia gwau, “Egu Tamana be lau ida Basileia ta totona kontraka ia karaia hegeregerena” neganai, ia be Iehova ese ia ida ia karaia kontrakana ia herevalaia. Unai be “hahelaga tauna ela bona hanaihanai, Melekisedeka bamona” kontrakana.—Heb. 5:5, 6.

16. Basileia kontrakana ese horoa Keristani taudia dekenai edena dala ia kehoa?

¹⁶ Iesu be ‘hahetoho ia davaria negadiai,’ ena abidadama aposetolo taudia 11 be ‘ia idia rakatania lasi.’ Basileia kontrakana ese maoro ia henidia guba ai Iesu ida king bamona terona ai do idia helai, bona hahelaga gaukara do idia karaia. To, unai aposetolo taudia 11 sibona ese unai hahenamo do idia abia lasi. Iesu be matahanai ta amo aposetolo Ioane dekenai ia hedinarai, ia gwau: “Ia kwalimu tauna dekenai maoro do lau henia, lau ida egu terona latanai do ai helai, lau danu be lau kwalimu bona egu Tamana ida  ena terona latanai lau helai hegeregerena.” (Apok. 3:21) Unai dainai, Iesu ese Basileia kontrakana be 144,000 horoa Keristani taudia ida ia karaia. (Apok. 5:9, 10; 7:4) Unai kontraka ese gwaumaoro ia henia idia be Iesu ida guba ai idia lohia totona. Unai be hegeregere, kekeni ta be king ta ia adavaia bona ia be maoro ia abia king ida ia lohia hebou totona. Oibe, Baibel ese horoa Keristani taudia ia gwauraia Keriso ena “headava matamata hahinena,” eiava Keriso ese do ia adavaia “kara goeva rami-hebou kekenina.”—Apok. 19:7, 8; 21:9; 2 Kor. 11:2.

17, 18. (a) Ita herevalaia vadaeni kontraka siks edia anina mani oi gwauraia. (b) Dahaka dainai Basileia ena helaro ita abidadama henia diba?

¹⁷ Inai atikol rua lalonai ita stadilaia kontraka ibounai ese Basileia ena gaukara idia guguru daladia idauidau idia hahedinaraia. (Hereva ladana, “Dirava ese Ena Ura Do Ia Hagugurua Dalana,” rau 12 ai itaia.) Unai ese ia hamomokania Basileia be taravatu hegeregerena ia gini bona Dirava ena ura be do ia guguru. Unai ese eda abidadama Mesia Basileiana dekenai ia hagoadaia, badina Dirava ese unai Basileia amo iena ura tanobada bona taunimanima totona do ia hagugurua.—Apok. 11:15.

¹⁸ Ita diba momokani Basileia sibona ese taunimanima edia hekwakwanai ibounai do ia haorea. Bona ita abia dae Dirava ena Basileia sibona ese taunimanima dekenai hahenamo do ia mailaia ela bona hanaihanai. Unai dainai, namona be ma haida dekenai unai mai anina bada hereva momokanidia do ita harorolaia goadagoada!—Mat. 24:14.