1. Nega momo taunimanima be edena hereva idia gwauraia?

 MOMO be inai hereva idia gwauraia: ‘Oi dekenai ia noho gauna oi laloa bada lasi ela bona ia boio.’ Nega haida unai bamona oi laloa, a? Bema ta be ia maragi neganai gau momo ia abia, nega haida unai do ia laloa bada lasi. Hegeregere, kohu momo ruma besena ai ia tubu daekau tauna be reana ia abia vadaeni gaudia momo do ia laloa bada lasi. Unai hegeregerena, matamata taudia edia diba be maragi dainai, mauri lalonai mai anina bada gaudia idia do lalopararalaia lasi.

2, 3. (a) Keristani matamata taudia ese dahaka idia dadaraia be namo? (b) Dahaka ese ita idia durua ita abia vadaeni gaudia ita laloa bada totona?

² Bema emu mauri lagani be 13 ia lao 19 huanai o 20 bamona, oi dekenai dahaka be mai anina bada? Tanobada taudia momo be kohu bona moni—pei namona, ruma namona, o elektronik gaudia matamatadia—idia laloa bada. To, bema unai gaudia ita laloa momo, mai anina bada gauna ta do ita reaia—unai be eda hetura karana Dirava ida. Madi, hari inai negai, taunimanima milioni momo be unai gauna idia tahua lasi. Matamata taudia e, bema emu tama sina be Keristani  taudia, namona be Dirava ena hereva amo oi idia hadibaia gaudia edia namo oi laloa bada. (Mat. 5:3) Bema unai gaudia oi laloa bada lasi, dika do oi davaria bona emu mauri lalonai unai do oi lalohisihisilaia.

³ To, unai oi hanaia diba. Dahaka ese oi do ia durua Dirava amo oi abia ahuna oi laloa bada totona? Namona be Baibel ena sivarai haida ita laloa, idia ese ita do idia durua Dirava amo ita abia ahuna ita laloa bada totona. Do ita herevalaia haheitalai ese matamata taudia sibona lasi to Keristani taudia ibounai do ia durua Dirava ese ia henia gaudia idia laloa bada totona.

4. Samuela Ginigunana 8:1-5 ese Samuela ena natudia be edena bamona ia herevalaia?

⁴ Do ita itaia Baibel sivaraidia ese do idia hahedinaraia, haida be Dirava ese ia henia ahuna namona idia laloa bada lasi. Peroveta tauna Samuela ia matamata neganai Iehova ia hesiai henia bona badinaia tauna ena ruma bese dekenai unai ia vara. (1 Sam. 12:1-5) Samuela be haheitalai namona ia hahedinaraia, iena natuna Ioela bona Abaisa ese idia tohotohoa neganai, namo idia davaria diba. To, unai idia laloa bada lasi bona kara dika idia karaia. Baibel ia gwau, idia be edia tamana bamona lasi, idia ese “kota biaguna gaukara idia hagagevaia.”​—1 Samuela 8:1-5 duahia.

5, 6. Iosaia ena natudia bona tubuna edia kara be edena bamona?

⁵ King Iosaia ena natudia danu be unai bamona. Iehova tomadiho henia karana dekenai Iosaia be haheitalai namona. Dirava ena Taravatu bukana idia davaria bona Iosaia dekenai idia duahia neganai, mai goada ida Iehova ena hadibaia herevadia ia badinaia. Ia ese Ierusalema ai kaivakuku bona meamea o babalau karadia ia haorea, bona taunimanima ia hagoadaia Iehova idia kamonai henia totona. (2 Kin. 22:8; 23:2, 3, 12-15, 24, 25) Iena natudia dekenai unai be ahuna namona! Iosaia ena natudia toi bona ena tubuna ta be king ai idia lao neganai, idia ta ese Iosaia ena kara ia tohotohoa lasi.

⁶ Iehoahasa ese ena tamana Iosaia ena king dagina ia abia, to “Lohiabada ena vairana dekenai kara dika ia karaia.” Iehoahasa be hua toi sibona ia lohia bena Aigupito edia Farao ese dibura ruma ai ia atoa, bona unuseniai ia mase. (2 Kin. 23:31-34) Bena iena tadina Iehoiakimi be lagani 11 ia lohia. Ia danu be ena tamana amo ia dibaia gaudia ia laloa bada lasi. Iehoiakimi ena kara dika dainai, Ieremia ese inai bamona ia perovetalaia: “Iehoiakimi do idia guria, be doniki do idia guria hegeregerena.” (Ier. 22:17-19) Iosaia ena natuna Sedekaia bona tubuna Iehoiakini danu be king dagina idia abia, to Iosaia ena kara maoromaoro daladia idia badinaia lasi.—2 Kin. 24:8, 9, 18, 19.

7, 8. (a) Edena dala ai Solomona be ena tamana amo ia dibaia gaudia ia laloa bada lasi? (b) Dirava amo idia abia ahuna idia laloa bada lasi taudia edia sivarai amo dahaka ita dibaia?

⁷ King Solomona be ena tamana, Davida, amo Iehova hesiai henia daladia ia dibaia, to gabeai unai ia laloa bada lasi. “Solomona ia buruka vadaeni neganai, iena adavana ese iena lalona idia veria, dirava idaudia dekenai, bona ia ese Lohiabada, iena Dirava, ia badinaia momokani lasi, iena tamana Davida ese ia badinaia bamona.” (1 Kin. 11:4) Unai dainai, Solomona be Iehova ena lalonamo ia haboioa.

⁸ Unai tatau ibounai be mai edia dala Iehova idia dibaia bona kara maoromaoro  idia karaia diba, to unai idia laloa bada lasi! To, Baibel negadiai bona hari matamata taudia ibounai be unai bamona lasi. Haheitalai namodia idia hahedinaraia matamata taudia haida mani ita herevalaia, Keristani matamata taudia ese idia tohotohoa totona.

9. Noa ena natudia be edena dala ai haheitalai namona idia hahedinaraia? (Laulau ginigunana itaia.)

⁹ Noa ena natudia be haheitalai namona. Edia tamana be Dirava ese ia hagania lagatoi ia karaia bona ena ruma bese ia hakaudia vareai. Noa ena natudia idia diba Iehova ena ura idia karaia be namo. Reana edia tamana ida idia gaukara hebou namonamo. Edia tamana idia durua lagatoi idia karaia, bena lagatoi lalonai idia vareai. (Gen. 7:1, 7) Dahaka dainai unai bamona idia karaia? Genese 7:3 ia gwau, idia ese animal idauidau be lagatoi lalonai idia hakaua vareai “do idia mauri . . . bona tanobada dekenai do idia vara lou totona.” Taunimanima danu idia mauri. Noa ena natudia be edia tamana amo idia dibaia gaudia idia laloa bada dainai, idia amo tanobada besena ia vara bona tanobada goevana ai tomadiho momokani idia haginia lou.​—Gen. 8:20; 9:18, 19.

10. Edena dala ai Heberu memero foa be idia dibaia hereva momokanidia idia laloa bada?

¹⁰ Lagani handred momo murinai, Heberu memero foa ese idia hahedinaraia idia dibaia vadaeni gaudia be mai anina bada. Lagani 617 B.C.E ai, Hananaia, Misaela, Asaraia, bona Daniela be Babulonia dekenai idia abia lao. Idia be mai edia hairai, bona aonega dainai Babulonia ena mauri dalana idia badinaia be auka lasi. To unai bamona idia karaia lasi. Edia kara amo idia hahedinaraia, edia tama sina ese idia hadibaia gaudia idia laloatao. Idia dibaia gaudia idia badinaia dainai Dirava ese ia hanamodia.​—Daniela 1:8, 11-15, 20 duahia.

11. Edena dala ai Iesu ese ia dibaia gaudia amo ma haida ia durua?

¹¹ Iesu be haheitalai namona, badina Tamana amo ia dibaia gaudia ia laloa bada bona ia moalelaia. Unai kara be inai hereva amo ia hamomokania: “Tamana ese lau ia hadibaia hegeregerena, unai gaudia lau herevalaia.” (Ioa. 8:28) Bona ia ura ia dibaia gaudia amo ma haida ia durua. Hutuma ia hamaoroa: “Taoni ma haida dekenai danu Dirava ena Basileia ena sivarai namona lau harorolaia be namo, unai badina totona Dirava ese lau ia siaia.” (Luka 4:18, 43) Iena kamonai taudia ia hadibaia idia be “tanobada ena lasi,” badina tanobada taudia ese Dirava amo ia mai hereva momokanidia idia laloa bada lasi.—Ioa. 15:19.

12. (a) Hari edena dala ai 2 Timoteo 3:14-17 be matamata taudia momo dekenai ia guguru? (b) Keristani matamata taudia ese edena henanadai idia laloa be namo?

¹² Ita herevalaia vadaeni matamata taudia bamona, reana emu tama sina be Iehova Dirava idia badinaia taudia. Bema oibe, Baibel ese Timoteo dekenai ia herevalaia gaudia be oi dekenai ia vara danu. (2 Timoteo 3:14-17 duahia.) Emu tama sina amo Dirava momokanina bona ia hamoalea daladia “oi dibaia.” Reana oi beibi negana amo emu tama sina ese oi idia hadibaia. Unai ese oi dekenai “aonega ia henia bona Keriso Iesu abidadama henia karana amo hahemauri oi abia,” bona oi ia durua oi “noho hegaegae” Dirava ena hesiai gaukara oi karaia totona. Henanadai badana be inai:  Oi abia vadaeni gaudia oi laloa bada, a? Anina be sibona emu kara oi tahua. Inai bamona henanadai oi laloa: ‘Idaunegai bona hari idia noho abidadama witnes taudia huanai lau noho karana be edena bamona lau laloa? Dirava ena turana edia huanai lau noho karana be edena bamona lau laloa? Hereva momokani lau diba ena hahenamo lau laloa bada, a?’

13, 14. Keristani matamata taudia haida be dahaka hahetoho idia davaria, to dahaka dainai idia moru be aonega karana lasi? Haheitalai ta gwauraia.

¹³ Matamata taudia haida be hari hereva momokani ena namo bona Satani ena tanobada ena dika edia idau idia lalopararalaia lasi, ena be edia tama sina be Keristani taudia. Haida idia ura tanobada ena mauri dalana idia tohoa. To motuka ena vairanai do oi gini badina oi ura motuka ese ta ia bampaia ena hisihisi oi mamia be aonega karana, a? Lasi! Unai hegeregerena, namo lasi inai tanobada ena “kara dikadia” ita tohoa, ena hisihisi ita mamia totona.​—1 Pet. 4:4.

¹⁴ Asia ai ia noho matamata tauna, Gener, be Keristani ruma bese lalonai ia tubu. Ena mauri lagani be 12 neganai bapatiso ia abia. To, gabeai tanobada ena mauri dalana ese ena lalona ia veria. Ia gwau: “Lau ura tanobada ena ‘ura kwalimu’ lau tohoa.” Gener be mauri dala rua ia badinaia. Ena mauri lagani be 15 neganai, ena tura dikadia edia kara ia tohotohoa. Idia bamona ia inuinu kekero bona hereva dikadia ia gwauraia. Gener be nega momo ena turadia ida snooker gadara bona kompiuta ai dagedage gadara idia karaia dainai, ruma dekenai ia lao leiti. To gabeai, ia laloparara tanobada ena veria gaudia ese moale korikori idia havaraia lasi. Unai be anina lasi mauri dalana. Ena be kongrigeisen dekenai ia giroa, to ia gwau: “Hekwakwanai momo lau do davaria noho, to Iehova ese ia henia hahenamo be momo herea.”

15. Matamata taudia, edia tama sina be Keristani taudia lasi, ese dahaka idia laloa be namo?

¹⁵ Momokani, kongrigeisen lalonai idia noho matamata taudia haida edia tama sina be Keristani taudia lasi. Bema oi be idia ta, hari oi abia hahenamo namona oi laloa, badina Havaraia Tauna oi diba bona oi hesiai henia noho! Tanobada dekenai taunimanima bilioni momo idia noho. To, Iehova ese oi ia veria mai  bona oi dekenai hereva momokani ia hadibaia be hahenamo badana! (Ioa. 6:44, 45) Hari, taunimanima 1,000 amo tamona be hereva momokani ena diba maoromaoro ia abia, bona oi be idia ta. Unai ese ita ibounai ia hamoalea, herevana edena dala ai hereva momokani ita dibaia. (1 Korinto 2:12 duahia.) Gener ia gwau: “Lau be anina lasi tauna, edena bamona iunives ibounai ena Biaguna, Iehova, be egu turana?” (Sal. 8:4) Keristani taihu ta ia gwau: “Stiuden idia moale bema edia tisa ese idia ia diba. Hadibaia Tauna Badana, Iehova, ese ita ia dibaia karana be hahenamo badana!”

16. Hari Keristani matamata taudia ese dahaka abia hidi maorona idia karaia be namo?

¹⁶ Oi abia hahenamo namona oi laloa neganai, emu lalona oi hadaia kara maoromaoro idia karaia taudia oi bamoa be namo. Unai amo, Dirava idia hesiai henia abidadama taudia oi badinaia diba. Namo lasi tanobada idia badinaia matamata taudia oi bamoa bona dokonai dika oi davaria.—2 Kor. 4:3, 4.

17-19. Dahaka dainai tanobada amo oi idau be aonega karana?

¹⁷ Momokani, tanobada amo ita idau be mai ena hekwarahi. To, ita idau neganai unai be aonega karana. Inai haheitalai laloa: Olympic gadara ia karaia tauna ia kwalimu totona, iena turadia amo ia idau be namo. Iena nega bona goada idia haorea kava gaudia momo ia dadaraia be namo, badina unai gaudia ese ena treinini karana idia hadikaia diba. Ma danu, iena turadia amo ia idau dainai, ena nega be hegeregere ia treinini momo bona ena tahua gauna ia abia.

¹⁸ Tanobada ena mauri dalana be do ia noho daudau lasi. To tanobada amo ita idau bona ena kara dikadia ita dadaraia neganai, ‘mauri korikorina ita dogoatao auka’ diba. (1 Tim. 6:19) Matamanai ita herevalaia taihu, ia gwau: “Bema oi abia dae gaudia oi badinaia, dokonai do oi moale bada. Unai ese ia hahedinaraia, oi hegeregere Satani ena tanobada oi dadaraia totona. Gau badana be, Iehova Dirava oi hamoalea dainai, Ia be oi dekenai ia moale! Unai neganai do oi moale badina tanobada amo oi idau!”

¹⁹ Bema hari oi abia gaudia sibona oi laloa, emu mauri be anina lasi. (Had. 9:2, 10) Bema oi be matamata bona emu mauri ena anina oi laloa noho, ‘namo lasi oi be tanobada taudia bamona,’ to mauri korikorina oi badinaia be namo.—Efe. 4:17; Mal. 3:18.

20, 21. Bema abia hidi maorona ita karaia, dahaka do ia vara, bona dahaka ita karaia be namo?

²⁰ Bema abia hidi maorona ita karaia, hari eda mauri do ita moalelaia bona Dirava ena tanobada matamatana ai do ita mauri hanaihanai. Vaira neganai hahenamo namodia be momo herea. (Mat. 5:5; 19:29; 25:34) To, Dirava ese unai gaudia be ita do ia henia kava lasi. Ia ura gau ta ita karaia. (1 Ioane 5:3, 4 duahia.) Hari, mai abidadama ida ia ita hesiai henia be gau badana!

²¹ Dirava ese ita dekenai gau momo ia henia be hahenamo badana! Iena Hereva amo diba maoromaoro ita abia bona iena sivarai momokanina bona ena ura ita lalopararalaia namonamo. Ita moale badina iena ladana ita huaia bona iena Witnes taudia ai ita lao. Dirava ia gwauhamata ita do ia durua. (Sal. 118:7) Namona be ita ibounai, herevana matamata o buruka, ese Dirava ia henia ahuna ita laloa bada bona ita ura “hairai ia noho ela bona hanaihanai” be Iehova dekenai ita henia​.—Roma 11:33-36; Sal. 33:12.