Haida be Pefium ena bonana idia ura henia lasi badina unai ese idia dekenai dika ia havaraia diba. To unai idia koua be auka, badina dina ta ta ai taunimanima idauidau idia hedavari henia. Haida idia henanadai bema namo tadikaka taihu be Keristani hebou maragidia bona badadia ai pefium idia gaukaralaia lasi.

Momokani, ita ura lasi ma haida edia hebou lao henia karana ita hadikaia. Ita ibounai ita ura Keristani heboudia amo goada ita abia. (Heb. 10:24, 25) To, bema ta be pefium ena bonana dainai ena hebou lao henia karana ia hadikaia, namona be elda taudia ida unai ia herevalaia. Ena be Baibel ese unai ia taravatua lasi, to namona be elda taudia ese heduru hereva haida amo kongrigeisen taudia idia durua ma haida ese idia davaria hekwakwanai idia lalopararalaia totona. Kongrigeisen taudia edia noho dalana hegeregerena, elda taudia ese Hesiai Hebou ena durua hereva kahana dekenai guna idia halasia hereva haida idia herevalaia diba. Eiava idia laloa namonamo guna bena hadibaia hereva amo unai idia herevalaia. * To, namo lasi unai bamona hadibaia hereva idia gwauraia loulou. Hanaihanai kamonai matamata taudia bona vadivadi taudia be iseda hebou idia mai bona unai hekwakwanai idia diba lasi, danu ita ura idia moale. Namo lasi ta be pefium ia gaukaralaia dainai ita hahemaraia.

Bema haida be pefium ena bonana idia ura henia lasi, bona bema hegeregere, elda oreana ese Kingdom Hall ai helai gabuna ta idia abia hidi diba, unai bamona taudia idia helai totona. Hegeregere, Kingdom Hall ena murina kahana daiutu ai idia helai diba bona hebou ena hereva idia kamonai. To bema unai hekwakwanai idia hamaoromaoroa diba lasi, vadaeni kongrigeisen ese unai bamona taudia totona hebou ena tok idia rekodia eiava telefon amo hebou ena tok idia kamonai diba; buruka o gorere badana idia abia taudia totona idia karaia bamona.

Vanegai laganidia ai, Iseda Basileia Gaukara ese tadikaka bona taihu ia hagoadaia rijinol hebouhebou idia lao neganai, pefium ena bonana idia ura henia lasi taudia edia namo idia laloa be namo. Rijinol hebouhebou gabudiai tadikaka taihu idia koua lasi pefium idia gaukaralaia totona, unai dainai tadikaka taihu ese pefium idia gaukaralaia neganai namona be ma haida idia laloa danu. To, namo lasi kongrigeisen heboudia dekenai unai bamona dala be taravatu ta bamona umui halaoa.

Ita be goeva lasi taudia bona inai tanobada dikana ai ita noho dainai, hisihisi idauidau ita davaria. To, ita moale bema haida ese ita idia durua eda hisihisi ita hanaia totona! Haida be edia lalona idia hadaia pefium do idia gaukaralaia lasi, unai amo tadikaka taihu be hebou idia lao diba. To, lalokau dainai unai bamona ita karaia diba.

Baibel idia duahia taudia momo be Pontio Pilato idia diba, badina ia ese Iesu ia kota henia. (Mat. 27:1, 2, 24-26) Danu, iena ladana be hari idia noho histori buka haida dekenai nega momo ia hedinarai. Buka ta (The Anchor Bible Dictionary) ese ia hahedinaraia, idaunegai toretoredia ese ia idia sivarailaia “momo, to Iudea ena Roma gavana haida bamona lasi.”

Histori ia torea Iuda tauna, Josephus ena toretore lalonai Pilato ena ladana be nega momo ia hedinarai. Josephus be Pilato ena negai idia vara gaudia toi ia herevalaia, unai amo Pilato ese Iuda taudia ia lohiaia neganai ia davaria hekwakwanai ia hahedinaraia. Ia vara gauna namba foa be histori torea Iuda tauna Philo ese ia torea. Roma toretore tauna Tacitus ese Roma edia lohia taudia edia histori ia torea neganai, ia hahedinaraia Tiberius ena lohia neganai Pontio Pilato ese oda ia henia Iesu idia hamasea totona.

Lagani 1961 ai, Caesarea, Israel dekenai, akioleji taudia haida ese idaunegai Roma gadara gabuna ai nadi palakapalaka ta mai ena toretore idia davaria. Unai nadi ai Pilato ena ladana be Latin toretore ai ia hedinarai. Unai nadi ai toretore be kahana haida sibona ia hedinarai (laulau itaia), iena anina be inai: “Tiberia tauna Pontio Pilato, Iuda edia gavana, ese dirava dekenai (inai) ia hahelagaia.” Unai toretore ese ia herevalaia ruma badana be Roma ena Lohia Tauna Tiberio hanamoa totona idia haginia dubu.