TA ESE Kingsley ena pagana ia pataia murinai, ena Baibel duahiduahi ia matamaia​—⁠Tiokratik Haroro Sikuli ai unai be ena tok ginigunana. Ia ese hereva ibounai ia gwauraia namonamo bona ta ia reaia lasi. To, dahaka dainai ena Baibel ia itaia lasi?

Kinglsey be Sri Lanka dekenai ia noho, bona ia be matakepulu tauna. Danu, ia be taia kudima bona wilsea ai ia helai. Edena dala ai Iehova ia dibaia? Bona edena bamona Tiokratik Haroro Sikuli ai ia vareai? Mani ena sivarai lau gwauraia.

Nega ginigunana Kingsley lau davaria neganai, lau hoa badina ia ura dikadika Baibel ena hereva momokani do ia dibaia. Guna ia be Witnes taudia haida ida Baibel ia stadilaia, bona ena buka​—⁠Diba ese Mauri Dekenai Ita Ia Hakaua Lao​—⁠Braille gauna, be ia dika vadaeni. * Lau noia ena stadi do ai karaia lou bona unai ia abia dae, to hekwakwanai be rua.

Ginigunana be, Kingsley be sibona ia noho lasi to ia be buruka taudia bona diseibol taudia idia naria gabunai ia noho. Unuseniai rege be bada bona Kingsley ena kamonai karana be dika dainai, lau hereva badabada. Unai dainai, wiki ta ta ai, ai herevalaia gaudia be unai ruma ai idia noho taudia ese idia kamonaia diba!

 Iharuana be, Kingsley be stadi ai ia dibaia gau matamata haida sibona ia duahia bona lalopararalaia. Emai stadi ai moalelaia totona, Kingsley ia hegaegae namonamo. Ia ese stadi bukana ia duahia loulou, ena Braille Baibel ai siri ia duahia, bona sibona ena hereva amo haere ia gwauraia. Unai ese Kingsley ia durua bada. Stadi negana ai, Kingsley be ena aena ia lokua, geda latanai ia helai, bona ia hegaegaelaia gaudia be mai moale ida ia herevalaia. Bena wiki ta lalonai nega rua ai stadi bona hora rua lalonai ai karaia!

Kingsley ia ura bada hebou totona Kingdom Hall dekenai ia lao, to unai be auka. Ta ese wilsea amo ia do ia kokia bena ia durua motuka dekenai ia guia bona Kingdom Hall ai ma ta ese ia durua be namo. To, kongrigeisen ai tadikaka ta ta be mai edia nega ia idia durua totona, bona idia dekenai unai be hahenamo ta. Hebou ai, spika ta be Kingsley ena taiana badinai idia atoa, unai amo ia kamonai namonamo, bona ia haere diba!

Kingsley be nega daudau ia stadi murinai, ena lalona ia hadaia Tiokratik Haroro Sikuli ai ia vareai totona. Wiki rua idia do noho neganai, lau nanadaia ia be ena Baibel duahiduahi ia hegaegaelaia vadaeni eiava. Kingsley be maoromaoro ia gwau: “Oibe Tadikaka, nega 30 lau praktis.” Ia lau hanamoa bona lau noia ena Baibel do ia duahia lou, lau kamonai totona. Ena Baibel ia kehoa, ena imana be Braille toretore dekenai ia atoa, bena ia duahia matamaia. To, lau itaia ena imana be Braille toretore ia badinaia lasi. Oibe, Kingsley be ia duahia siri ibounai ia laloatao!

Lau hoa bona egu matana ranu ia diho. Kingsley lau nanadaia, edena bamona siri ibounai ia laloatao bema ia be nega 30 sibona ia praktis. Ia gwau: “Lasi, lau be dina ta ta ai nega 30 lau praktis.” Kingsley be hua ta lalonai, dina ta ta ai ena geda dekenai ia helai, bona ia praktis loulou ela bona ia manada.

Kingsley ena tok henia dinana ia ginidae. Iena tok ia henia murinai, kongrigeisen taudia ibounai be edia imana idia patapataia, bona ena hekwarahi dainai momo be edia matana ranu ia diho. Pablisa ta be guna ia gari dainai sikuli dekenai tok henia karana ia hadokoa, to hari ia ura sikuli dekenai ia vareai lou. Ia gwau: “Bema Kingsley ia karaia diba, vadaeni lau karaia diba!”

September 6, 2008 ai, Kingsley be lagani toi Baibel ia stadilaia murinai, Iehova dekenai ena mauri ia gwauhamatalaia bona ia bapatiso. Kingsley be Iehova ia badinaia ela bona May 13, 2014 ai ia mase, to ia diba tanobada Paradaiso ai do ia gorere lasi bona mai goada ida Iehova do ia hesiai henia lou. (Isa. 35:5, 6)​—⁠Paul McManus ese ia sivarailaia.