Matamata Taudia Edia Henanadai

Edena Dala Ai Nega Ginigunana Lau Idia Lalonamo Henia Diba?

“Inai intaviu dekenai hereva maorodia sibona lau gwauraia! Egu bosi ai do ia lao tauna ia itaia lau be lau gari lasi. Iduara amo lau vareai neganai, iena ladana korikori lau gwauraia. Lau diba momokani, inai gaukara totona lau do ia abia hidi!”

“Inai be unai tau matamata ena gaukara pepadia, a? Ia do lau abia hidi lasi! Ia do gaukara lasi neganai, iena kara be namo lasi dainai, inai gaukara ia abia murinai, ena kara do ia haidaua, a?”

Inai laulau oi itaia, bona ataiai idia noho herevadia duahia. Bosi ese inai mero do ia lalonamo henia lasi ena badina toi oi itaia diba, a?

1 ․․․․․

2 ․․․․․

3 ․․․․․

● Haere be henunai

1. Inai tau matamatana be intaviu totona dabua maorodia ia karaia lasi. 2. Iena hereva (bosi ena ladana korikori ia gwauraia) amo hemataurai ia hahedinaraia lasi. 3. Ena kara amo ia hemataurai lasi.

 MANI oi laloa, oi be nega ginigunana aniani ta oi ania. Miniti hida murinai unai aniani ena mamina do oi ura henia? Reana nega ginigunana ena mamina oi abia murinai, do oi diba bema unai aniani do oi haorea eiava lasi.

Unai hegeregerena, nega ginigunana ta oi hedavari henia neganai, unai ia vara danu. Miniti haida murinai, do oi diba ia be edena bamona tauna. Bona mani inai ita laloa: Ia danu do ia itaia oi be edena bamona tauna.

Oi be moni gaukara, turana ta eiava adavana ta oi tahua, a? Oi kwalimu totona, nega ginigunana haida ese oi idia lalonamo henia be gau badana. Mani dala toi ita itaia, unai amo nega ginigunana oi do idia hedavari henia taudia ese oi idia lalonamo henia diba.

1. Emu Toana

Taunimanima be oi dekenai idia itaia gauna ginigunana be emu toana, unai amo idia diba oi be edena bamona tauna. To momo be unai idia laloa bada lasi. Kekeni matamata, Clarissa a ia gwau, “Aniani gabuna ta dekenai oi lao neganai, oi diba lasi bema taunimanima be dabua namona eiava dikana do idia hahedokilaia!”

Oibe, oi karaia dabua be oi lao henia hebouna totona ia maoro be namo. Hegeregere, moni gaukara totona oi karaia dabua be digudigu totona do oi karaia lasi! To bema dabua maorona oi karaia lasi, be edena bamona? Gau badana be dabua maorodia oi abia hidi. Bema oi daradara, vadaeni emu gabu ai idia karaia momo dabua oi karaia.

INAI OI LALOATAO! X-ray laulauna ese tauanina lalonai idia noho gaudia ia hahedinaraia, unai hegeregerena dabua bona tauanina ena toana ese emu lalona ai idia noho gaudia ia hahedinaraia.

“Bema taunimanima be hebou ta dekenai dabua idau hereana idia karaia, lau ura lasi idia lau hedavari henia. Edia dabua bona toana ese edia ladana ia hadikaia, bona idia dekenai unai sibona lau laloa.”​—Diane.

Baibel ia gwau, ‘mai hemataurai ida dabua namona do oi hahedokilaia,’ unai amo “laloa maoromaoro” oi hahedinaraia.​—1 Timoteo 2:9.

Sibona oi nanadaia: ‘Lau be mai hemataurai ida dabua lau hahedokilaia, a? Egu dabua hahedokilaia dalana dainai, gaukara totona lau do ia abia tauna, turana, o adavana do ia gwau lau “laloa maoromaoro” lasi, a?’

Heduru herevana: Dabua maorona ia hahedokilaia tauna o hahinena amo heduru oi tahua.

2. Oiemu Hereva

Emu hereva amo oi hahedinaraia oi manau eiava oi hekokoroku, oi ura gau ta oi abia haraga eiava oi naria. Bema oi ura nega ginigunana  mero o kekeni ta ese oi ia lalonamo henia, unai gaudia oi laloatao be namo. Kekeni ta, Valerie, ia gwau, “Mero ta lau hereva henia bona sibona ia herevalaia momo neganai, unai lau moalelaia lasi.” Ma ia gwau, “Memero haida be maoromaoro idia ura oi idia dibaia namonamo. Unai lau haheaukalaia diba lasi bona kekeni be unai bamona memero amo idia raka siri.”

INAI OI LALOATAO! Emu hereva dalana amo emu kara korikori do ia hedinarai, unai dainai emu hereva dalana oi naria namonamo!

“Mero ta lau hedavari henia bona ena kara korikori ia hahedinaraia neganai, unai lau moalelaia. To bema do ia herevalaia gaudia ia lalohadailaia momo, vadaeni ia gwauraia lasi be namo.”​—Selena.

Baibel ia gwau: “Oi hereva momo neganai, hereva kererena do oi gwauraia. Unai dainai oi aonega bona emu hereva dalana oi naria.”​—Aonega Herevadia 10:​19, Contemporary English Version.

Sibona oi nanadaia: ‘Edena bamona lau diba bema lau hereva momo eiava lasi? Egu hereva amo haida do idia hoa eiava idia do lau habadua, a?’

Heduru herevana: Idia herevahereva namonamo taudia edia hereva daladia oi itaia. Idia hereva daudau totona, dahaka idia herevalaia? Unai bamona dala oi gaukaralaia diba, a?

3. Emu Kara

Taunimanima idia gwau, hereva be mai anina bada lasi, to kara be mai anina bada. Hegeregere, bema emu kara be namo, vadaeni unai ese ia hahedinaraia oi be ma haida oi matauraia. Adavana namona ta oi tahua neganai, unai kara oi laloatao. Carrie ia gwau, “Gau maragidia oi karaia hegeregere, ta totona iduara oi kehoa be hemataurai karana. Unai be vaia taunimanima ese idia karaia kara namodia.”

INAI OI LALOATAO! Emu kara amo taunimanima do idia diba oi be kara namo tauna eiava lasi. (Aonega Herevadia 20:11) Emu kara amo taunimanima ese oi be edena bamona idia laloa?

“Lau laloa kamonai namonamo karana be mai anina bada. Danu, kara namona ta be inai, bema ta be gau ta ia herevalaia neganai, ena hereva oi utua lasi.”​—Natalia.

Baibel ia gwau: “Umui ura taunimanima ese umui dekenai idia karaia hegeregerena, idia dekenai danu unai bamona do umui karaia.”​—Luka 6:31.

Sibona oi nanadaia: ‘Hemataurai karadia lau hahedinaraia, a? Ma haida lau laloa bada, a? Lau kara momokani, a? Nega korikori ai lau ginidae, a?’

Heduru herevana: Oi ura lao gabuna ta dekenai oi lao totona, miniti 10 do lasi neganai oi lao, unai amo hekwakwanai idia vara neganai, do oi leiti lasi. Namo lasi nega ginigunana ai emu kara amo oi hahedinaraia, oi be leiti momo tauna!

Inai oi laloa namonamo: Kara namo hahedinaraia totona, namo lasi mai koikoi ida emu kara korikori oi hunia. (Salamo 26:4) To, bema oi ura ladana namona oi abia, vadaeni kara namodia oi manadalaia bona unai oi hahedinaraia. (Kolose 3:​9, 10) Unai oi karaia neganai, namona be oi laloatao, emu kara ese do ia hahedinaraia oi be edena bamona merona o kekenina. Emu toana, hereva, bona kara oi naria namonamo, unai amo haida ese nega ginigunana oi idia hedavari henia neganai, oi do idia lalonamo henia!

“Memero Kekeni Edia Henanadai” edia hereva ma haida, English gado ai be inai Web sait www.watchtower.org/ype dekenai oi itaia diba.

[Futnout]

[Maua/Foto Rau Ai 19]

EMU TURADIA EDIA HEREVA

“Hetura karadia lalonai, laloa maoromaoro karana oi hahedinaraia be gau badana. Egu turadia ese egu kara idia hanamoa eiava hadikaia diba, unai dainai lau hekwarahi egu kara idia hadikaia lasi taudia lau tahua.”

“Emu hairai o emu moni dainai turadia do oi davaria lasi, to oi hahedinaraia karadia dainai turadia oi davaria diba!”

[Foto]

Sier

Ashley

[Maua/Foto Rau Ai 19]

TAUNIMANIMA ESE OI IDIA LALOATAO DALADIA . . .

● Kiri toana hahedinaraia

● Imana oi udeudea

● Goeva karana

● Ta ena matana oi itaia

[Maua/Foto Rau Ai 20]

INAI OI KARAIA LASI!

Oi hereva, TO iena hereva oi utua lasi

Oi henanadai, TO gau ibounai henanadailaia lasi

Turana bamona oi hereva henia, TO oi hauraia kava lasi

Mai gari lasi ida oi hereva, TO oi hekokoroku lasi

[Maua Rau Ai 20]

EMU TAMA SINA OI NANADAIA DIBA

Oi matamata neganai, nega ginigunana oi idia lalonamo henia totona, dahaka oi karaia?