IESU ena toreisi lou be idaunegai ia vara gauna ta sibona lasi, to hari inai negai ia be mai anina bada. Aposetolo Paulo ese unai ia hahedinaraia, ia gwau: “Keriso be mase amo ia toreisi lou, ia be mase lalonai idia mahuta taudia amo ia toreisi lou tauna ginigunana. Badina tau tamona amo mase ia vara, unai hegeregerena tau tamona amo mase taudia do idia toreisi lou. Adamu amo taunimanima ibounai idia mase noho, unai hegeregerena Keriso amo taunimanima ibounai be mauri do idia abia.”​—1 Korinto 15:20-22.

Nisan 16, 33 C.E. ai, Dirava ese Iesu ia hatorea isi lou. Lagani ta ta ai, Iuda taudia be unai dina ai edia uma ena anina ginigunadia idia abia lao Ierusalema ena dubu helaga dekenai, bona Iehova Dirava vairanai idia bouboulaia. Paulo ia gwau Iesu be mase amo ia toreisi lou tauna ginigunana, unai ese ia hahedinaraia ma haida be mase amo do idia toreisi lou.

Paulo be Iesu ena toreisi lou ese ia havaraia gauna ia herevalaia danu, ia gwau: “Tau tamona amo mase ia vara, unai hegeregerena tau tamona amo mase taudia do idia toreisi lou.” Adamu amo kara dika ita abia hanai dainai ita ibounai ita mase. To, Iesu be ena mauri davalaia boubouna amo dala ia kehoa taunimanima do idia toreisi lou, bona kara dika bona mase amo ia ruhadia. Paulo ese Roma 6:23 ai unai ia herevalaia namo herea, ia gwau: “Kara dika ena davana be mase, to Dirava ese Keriso Iesu iseda Lohiabada amo ia henia harihari gauna be mauri hanaihanai.”

Iesu sibona ese ena mase bona toreisi lou karana ena namo ia herevalaia. Ia gwau: “Taunimanima ena Natuna danu be do idia abia isi, unai amo ia idia abidadama henia taudia ibounai ese mauri hanaihanai do idia abia. Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.”​—Ioane 3:14-16.

Mani oi laloa, taunimanima be mauri hanaihanai do idia abia. Taitai bona hisihisi be do idia ore! (Apokalupo 21:3, 4) Unai be helaro namona, ani? Diba bada tauna ta ia gwau: “Gara gabuna ita itaia neganai, ita diba eda mauri be ia kwadogi, to toreisi lou sivaraina ese ia hahedinaraia, mase be do ia noho daudau lasi.” Oibe, Iesu ena toreisi lou dainai mauri hanaihanai do ita abia!