EAST Africa ai, momo be unai hereva idia diba, bona tano momo ai taunimanima ese unai lalohadai idia abia dae. Emu turana o ma haida amo moni oi abitorehai neganai, unai bamona oi laloa, a? Ena be nega haida ita laloa unai be namo, to unai be lalohadai maorona, a? Abitorehai ena dika haida be dahaka?

Swahili edia hereva ma ta ese abitorehai ena dika ia hahedinaraia. Ia gwau: “Abitorehai bona henitorehai ese hetura karana ia hadikaia.” Momokani, abitorehai ese taunimanima edia hetura ia hadikaia. Herevana lalohadai maorona oi abia bona oi palani namonamo, to nega haida emu lalohadai hegeregerena ia vara lasi. Hegeregere, bema abitorehai oi haloua haraga lasi, vadaeni henitorehai tauna ia badu diba. Reana henitorehai tauna bona abitorehai tauna huanai hepapahuahu do ia vara, bena edia famili idia hereva heheni lasi. Abitorehai ese hekwakwanai ia havaraia diba dainai, namo lasi ita laloa abitorehai ese moni ena hekwakwanai do ia hanamoa haraga, to bema dala ma ta be lasi unai ita lalohadailaia.

Moni abitorehai karana ese ta ena hetura karana Dirava ida ia hadikaia diba. Edena dala ai? Baibel ia gwau kara dika tauna ia diba ena abitorehai ia henia lou be namo, to ia ura lasi karaia. (Salamo 37:21) Danu, ia hahedinaraia “abiatorehai tauna ese, heniatorehai tauna ena hesiai gaukara ia karaia.” (Aonega Herevadia 22:7) Namona be abitorehai tauna ia diba, ia be mai ena maduna henitorehai tauna ena moni ia haloua. Africa taudia edia hereva ma ta ia gwau: “Bema ta amo oi abitorehai, iena hesiai tauna ai do oi lao.” Anina be abitorehai tauna ia ura karaia gaudia be do ia karaia diba lasi.

Unai dainai ta ia abitorehai neganai, namona be ia haloua haraga. Bema lasi, hekwakwanai do idia vara. Bema ta ena abitorehai be bada, do ia lalometau, mahuta namonamo lasi, moni gaukara dekenai nega bada do ia haorea, adavana ida do idia  heai, ruma bese do ia parara, bona do idia kota henia o dibura ruma ai do idia atoa. Roma 13:8 ia gwau: “Namo lasi umui be mai emui abitorehai ma ta dekenai, to umui lalokau heheni.”

Unai badina idauidau dainai, namona be moni abitorehai karana dekenai ita naria namonamo. Aonega karana be ita henanadai: Badina namona ta dainai ita ura abitorehai, a? Ita abitorehai badina ita ura eda ruma bese ita naria, a? Eiava ita mataganigani, reana ita ura taga tauna bamona ita noho, a? Namona be ita dekenai idia noho gaudia ita gaukaralaia, unai amo do ita abitorehai lasi.

Momokani, bema dika ta ia vara bona dala be lasi, ita abitorehai diba. Bema ta be lalona ia hadaia do ia abitorehai, namona be ia hahedinaraia ia be kara momokani tauna. Edena dala ai?

Namo lasi ita laloa ta be mai ena moni o kohu momo dainai ia sibona dekenai ita tabekau. Ita gwau lasi ia be taga tauna dainai, moni dalanai ita ia durua be namo. Danu, namo lasi ita laloa iena moni ita haloua haraga be anina lasi. Namo lasi mai edia moni o kohu taudia ita mama henidia.​—Aonega Herevadia 28:22.

Namona be emu abitorehai oi haloua haraga. Bema henitorehai tauna ese moni do oi haloua ena nega ia abia hidi lasi, namona be oi ese nega oi makaia bona unai oi badinaia. Emui gwauhamata be pepa ai umui torea, unai amo umui huanai daradara ia vara lasi. (Ieremia 32:9, 10) Namona be oi sibona ese emu abitorehai oi henia lou, unai amo oi tanikiu henia diba. Emu abitorehai oi haloua karana ese emui hetura karana ia hanamoa. Iesu ena Ororo Harorona ai ia gwau: “Namona be emui ‘oibe’ be oibe bona emui ‘lasi’ be lasi.” (Mataio 5:37) Danu, namona be inai hakaua herevana ita laloatao: “Gau ibounai umui ura taunimanima ese umui dekenai idia karaia hegeregerena, idia dekenai danu unai bamona do umui karaia.”​—Mataio 7:12.

Bema ita ura moni ita abitorehai, Baibel ena heduru herevana be inai: “Dirava badinaia karana lalonai gau momo do ita abia, bema ita abia dae ita dekenai idia noho gaudia be hegeregere.” (1 Timoteo 6:6) Anina be, ita abia dae ita dekenai idia noho gaudia be hegeregere, unai amo abitorehai dainai idia vara metau ita dadaraia. To, hari inai negai unai ita karaia be auka, badina momo idia ura gau momo idia abia haraga. Unai dainai “Dirava badinaia karana” ita hahedinaraia be gau badana. Edena dala ai?

Hegeregere, Asia ai Keristani headava tau bona hahine ta ita laloa. Idia matamata neganai, idia ura ruma idia hoia diba taudia bamona idia karaia. Unai dainai, sibona edia moni bona banika bona varavara amo idia abitorehai monina amo ruma ta idia hoia. To daudau lasi, hua ta ta ai abitorehai idia henia lou ena maduna ia metau. Unai dainai, edia gaukara horadia idia habadaia to natudia totona nega be lasi. Tau ia gwau: “Lau lalohekwarahi, lalohisihisi bona lau mahuta namonamo lasi, toana be nadi metauna ta lau huaia.”

Unai negai, 1 Timoteo 6:6 ena hereva idia laloatao, bona edia lalona idia hadaia ruma idia hoihoilaia totona. Lagani rua lalonai edia abitorehai ibounai idia haloua. Edia ekspiriens amo dahaka idia dibaia? Idia gwau: “Bema Baibel ena hakaua herevadia ita badinaia, moni bona kohu dekenai lalohadai maorona do ita abia.”

Taunimanima momo be Swahili edia hereva, matamanai ia noho herevana, idia diba. To idia do abitorehai noho. Ita herevalaia vadaeni Baibel ena hakaua herevadia dainai, sibona ita nanadaia: Moni lau abitorehai be namo, a?