Lau be Alicante, Spain ena ist kone kahanai ia noho siti dekenai lau tubu daekau. Egu famili maurina be namo lasi, unai dainai lau matamata neganai, lau be strit dekenai lau loaloa kava. Egu ruma badinai, taea workshop ta ia noho. Unuseniai ia gaukara tauna ta, José María be egu turana namona ai ia lao. Ia be hebogahisi tauna bona ia kamonai namonamo, egu famili korikori ai unai kara lau reaia. Herevana ena mauri lagani be ia bada, to hekwakwanai negadiai, ia be egu tadikaka korikori bamona.

José María be Iehova ena Witnes taudia ida Baibel ia stadilaia matamaia. Lau itaia ia be Baibel ia ura henia, bona nega haida lau ida Baibel ena hereva momokani ia herevalaia. Mai hemataurai ida ena hereva lau kamonai, to ia gwauraia gaudia lau laloa bada lasi. Lau be matamata dainai, lau be matamata taudia ese idia laloa gaudia sibona lau laloa bada. To, gabeai unai ia idau.

Lau ura lasi unai aksiden lau herevalaia momo, to do lau gwau lau be kavakava. Dina tamona lalonai egu mauri ia idau momokani. Lau be matamata bona goada, to aksiden lau abia neganai, karaharaga egu tauanina ibounai ia paralais bona hospital sibona dekenai lau noho. Unai lau abia dae be auka momokani. Bona sibona lau nanadaia, ‘Dahaka dainai lau mauri noho?’

José María be lau ia vadivadi henia, bona karaharaga emai gabu ai ia noho Iehova ena Witnes taudia edia kongrigeisen ia hadibaia hospital dekenai lau idia vadivadi henia totona. Edia vadivadi loulou karana ese egu kudouna ia hamarerea. ICU (intensive care unit) lau rakatania neganai, maoromaoro Baibel lau stadilaia matamaia. Danu, stadi amo lau diba dahaka dainai taunimanima idia hisihisi bona mase, bona dahaka dainai Dirava ese dika ia koua lasi. Bona Dirava ena gwauhamata vaira negana totona lau dibaia, unai negai tanobada ibounai be goevadae taudia ese do idia hahonua bona ta do ia gwau lasi: “Lau be gorere.” (Isaia 33:24) Egu mauri ai, nega ginigunana unai helaro namona lau dibaia.

Hospital lau rakatania neganai, egu Baibel stadi lau goadalaia. Wilsea ta lau gaukaralaia, bona Iehova ena Witnes taudia edia hebou haida lau lao, bona haroro gaukara lau karaia danu. November 5, 1988 ai, egu mauri lagani be 20 neganai, digu gauna (bathtub) lalonai bapatiso lau abia. Iehova Dirava ese lau ia durua lalohadai maorona lau abia  totona. To, egu tanikiu karana lau hahedinaraia totona dahaka do lau karaia?

Egu lalona lau hadaia, Iehova hesiai henia totona egu gorere ese lau do ia koua lasi. Lau ura lau goada. (1 Timoteo 4:15) Matamanai, ia auka badina egu famili be lau abia dae gaudia idia abia dae lasi. To tadikaka taihu idia noho, idia be lauegu famili bamona. Hanaihanai lau idia durua hebou lau lao, bona haroro gaukara lau karaia totona.

Lagani haida murinai, lau laloparara hora 24 lalonai ta ese lau ia naria be namo. Valencia dekenai diseibol taudia idia naria gabuna ta lau davaria, unai gabu ena daudau be kilomita 160 bamona Alicante amo. Unai be egu noho gabuna ai ia lao.

Ena be bedi ai lau hekure, to Iehova lau do hesiai henia noho. Gorere taudia dekenai idia henia moni bona heduru ma haida amo kompiuta ta bona mobael fon ta lau hoia, bona egu bedi badinai idia atoa. Daba ibounai, lau ia naria tauna lau hamaoroa egu kompiuta bona mobael fon do ia kehoa. Kompiuta gaukaralaia totona, joy-stick ta be egu aukina amo lau hamarerea bena kompiuta lau gaukaralaia. Danu, au maragina ta be egu uduna ai lau atoa. Unai au lau gaukaralaia kompiuta ena keyboard dekenai hereva lau taipia bona mobael ai namba lau presia totona.

Edena dala ai unai gaudia ese lau idia durua? Dala ta be jw.org Web sait bona Watchtower ONLINE LIBRARY lau gaukaralaia diba. Unai tulu namodia ese lau ia durua! Dina ta ta ai, hora momo lalonai Baibel idia herevalaia buka bona magasin lau stadilaia bona tahua gaukara lau karaia. Unai amo Dirava bona ena kara namodia lau dibaia noho. Nega haida sibona lau noho o lau lalomanoka neganai, hanaihanai iseda Web sait ese lau ia hagoadaia.

Egu kompiuta amo kongrigeisen tok lau kamonai diba bona hebou ai kahana haida lau karaia diba. Haere lau henia, guriguri, tok lau henia bona lau idia makaia dinana ai Gima Kohorona lau duahia. Herevana unai hebou lalonai lau noho lasi, to hebou ena kahana ta ta durua karana amo lau mamia lau be kongrigeisen lau durua.

Kompiuta bona mobael ese dala ia kehoa haroro gaukara lau durua totona. Momokani, lau gorere dainai ruma ta ruma ta haroro gaukara lau karaia be auka, Iehova ena Witnes taudia momo ese idia karaia bamona. To, unai ese lau ia koua lasi. Unai tulu ese lau ia durua ma haida dekenai egu abidadama lau gwauraia totona. Oibe, egu mobael amo herevahereva karana lau moalelaia bada, danu elda taudia ese lau idia noia egu mobael fon amo haroro gaukarana lau naria totona. Unai bamona lau karaia dainai, unai ese kongrigeisen lalonai idia noho gorere o buruka taudia ia durua bada.

 Kompiuta eiava mobael sibona amo lau haroro lasi. Dina ta ta ai egu tura namodia ese lau idia vadivadi henia. Edia varavara bona Baibel idia ura dibaia taudia idia mailaidia. Danu, nega haida lau idia noia edia turadia bona varavara taudia ida Baibel lau herevalaia totona. Nega haida ruma bese ta ta ese lau idia vadivadi henia bona edia ruma bese stadi be lau danu idia karaia. Lau moalelaia gauna be, natu maragidia be egu bedi badinai idia helai bona lau dekenai Iehova idia lalokau henia ena badina idia herevalaia.

Lau moale badina momo ese lau idia vadivadi henia. Nega momo egu daiutu be ia honu badina turadia be gabu idauidau amo idia mai lau idia itaia totona. Edia lalokau karadia dainai, lau noho gabuna ai idia gaukara taudia idia hoa. Dina ta ta lalonai Iehova lau tanikiu henia badina tanobada hegegemadai tadikaka oreana ida lau gaukara hebou diba.

Nega haida ta be lau ia hanamoa bona ia henanadai neganai, lau gwau: “Lau inai, lau do hekwarahi noho!” To, lau sibona lasi. Herevana iseda noho dalana be edena bamona o koua gaudia idia noho, Keristani taudia ibounai be ‘abidadama ena tuari namona idia tuarilaia’ noho. (1 Timoteo 6:12) Ena be nega haida ia auka to dahaka ese lau ia durua lagani momo lalonai lau haheauka totona? Dina ta ta ai Iehova lau guriguri henia bona ia lau tanikiu henia badina egu mauri be mai ena badina. Hari lau ura Dirava hesiai henia gaukarana lalonai lau bisi noho bona nega vaira ena helaro lau naria.

Nega momo paradaiso lau laloa, unai negai do lau heau bona roho lou diba. Nega haida egu turana José María ida ai hevaseha​—ia be polio gorere dainai ia raka diba lasi​—ai ruaosi be paradaiso ai do ai heau helulu. Bona lau nanadaia “Daika do ia kwalimu?” José María ena haere be: “Daika ia kwalimu be herevana. Paradaiso dekenai ita noho be gau badana unai amo do ita heau helulu diba.”

Lau paralais dainai gau momo lau karaia diba lasi. Lau diba egu matamata neganai kavakava karana ta lau karaia dainai hari lau be inai bamona. To, Iehova lau tanikiu henia badina lau ia rakatania lasi. Bona ia ese lau dekenai gau momo ia henia. Hegeregere, Keristani ruma bese badana, lau mauri noho, haida lau durua dainai lau moale, bona vaira nega ena helaro namona lau naria. Unai gau ibounai dainai lau gwau diba, Iehova ese lau dekenai gau momo ia henia.