Lau be Los Angeles, California, U.S.A., dekenai lau tubu daekau. Unai gabu ai, raskol oreadia be momo bona drag dikadia idia gaukaralaia. Egu tama sina edia natudia be siks, bona idia siks amo lau be iharuana.

Ai maragi negana amo egu sinana ese Evangelical dubu dekenai ai ia abia lao. To egu mauri lagani be 13 bona 19 huanai neganai, lau be mauri dala rua lau badinaia. Sunday ai lau be dubu ena ane abia grup ida ane lau abia. To wiki lalonai pati gabudia lau lao, drag lau abia, bona matabodaga karadia lau karaia.

Lau be badu haraga tauna. Lau badu neganai, egu badinai idia noho gaudia lau gaukaralaia ta lau heatu henia totona. Dubu dekenai lau dibaia gaudia ese lau ia durua lasi. Hanaihanai lau gwau, “Dika ena davana be Lohiabada Ena, bona lau be ia ese ia gaukaralaia tauna ta!” Lagani 1960 ena dokona kahanai, lau be haisikuli dekenai lau noho. Unai negai politikol orea ta, Black Panthers ena memba ta ai lau lao. Unai orea be taunimanima edia maoro totona idia heai. Nega haida protest ai karaia negadiai, sikuli idia koua.

Unai protest karadia ese egu badu karana ia koua lasi. Unai dainai, dagedage karadia ma haida lalonai lau vareai. Hegeregere, nega haida egu turadia ida muvi theater dekenai ai lao bona guna United States ai igui hesiai gaukara idia karaia Africa taudia idia hahisia edia muvi ai itaia. Unai dagedage laulau ai itaia dainai, theater dekenai idia noho kurokuro matamatadia ai dadabadia. Gabeai, ai lao emai strit ai idia noho kurokuro taudia ai tahua bona dadabadia.

Egu mauri lagani be 20 bamona neganai, lau, egu tadina rua bona kakana idia gwauraia taunimanima dikadia. Nega momo pulisi ese ai idia dogoatao. Unai nega ai egu tadina ta be momo idia diba raskol oreana edia memba ta, bona lau be idia lau bamoa. Egu mauri be ia dika momokani.

Egu turana ta ena tama sina be Iehova ena Witnes taudia. Lau idia boiria edia kongrigeisen heboudia do lau lao, bona idia ida lau lao. Unai nega amo, Iehova ena Witnes taudia edia kara lau itaia. Ibounai be mai edia Baibel, bona hebou lalonai edia Baibel idia gaukaralaia. Matamata taudia be tok idia henia danu! Lau moale badina lau dibaia gauna be, Dirava be mai ena ladana, Iehova, bona idia gaukaralaia.  (Salamo 83:18) Kongrigeisen ai taunimanima idauidau idia noho, to idia inai heheni lasi.

Matamanai, lau ura lasi Witnes taudia ida Baibel lau stadilaia, to edia hebou lao henia karana lau moalelaia. Hanuaboi ta, lau be Witnes taudia edia hebou lalonai lau noho, to egu turadia be konseti ta dekenai idia lao. Konseti gabunai, mero ta be ia ura lasi ena jeket ia henia dainai, idia botaia ela bona ia mase. Unai dina murinai, idia karaia karana idia heagilaia. Danu, kota dekenai idia nanadaia neganai, idia laloa edia kerere be gau badana lasi bona idia hevasehalaia. Idia momo be dibura ruma dekenai idia siaia bona unuseni do idia noho ela bona idia mase. To, lau moale bada badina unai hanuaboi ai lau be idia danu lau noho lasi. Egu lalona lau hadaia egu mauri do lau haidaua bona Baibel do lau stadilaia.

Egu mauri ai lau itaia bese idauidau idia inai heheni, to lau hoa badina Witnes taudia be unai bamona lasi. Hegeregere, Witnes kurokuro tauna ta be gabu ta ia lao neganai, ena natudia be Witnes korema famili ta dekenai idia rakatania. Danu, mero koremana ta be noho gabuna ia tahua neganai, kurokuro famili ta ese ia idia abia dae. Lau abia dae momokani Iehova ena Witnes taudia be Iesu ena hereva, Ioane 13:35 ai, idia badinaia: “Unai amo taunimanima ibounai do idia diba umui be egu hahediba taudia, bema umui huanai lalokau ia noho.” Unai nega amo lau diba orea momokanina lau davaria, idia be tadikaka korikori bamona.

Baibel stadilaia karana amo lau laloparara egu lalohadai lau haidaua be namo. Namona be taunimanima ibounai ida maino ai do lau noho, bona lau abia dae momokani, inai be mauri dalana namona. (Roma 12:2) Gabeai, lau goada lau lao. January 1974 ai, lau bapatiso bona Iehova ena Witnes tauna ta ai lau lao.

Ena be lau bapatiso, to lau hekwarahi noho egu badu karana lau biagua totona. Hegeregere, nega ta ruma-ta-ruma-ta haroro gaukara ai karaia lalonai, raskol ta be egu motuka amo reidio ia henaoa bona ia lau lulua. Ia kahirakahira lau lao neganai, reidio ia hamorua bona ia heau. Ia vara gauna be ma haida dekenai lau gwauraia neganai, haroro grup ai ia noho elda ta ese lau ia nanadaia, “Stephen, bema unai tauna oi dogoatao dahaka do oi karaia?” Unai henanadai ese lau ia durua egu kara lau laloa bona ma haida ida maino ai lau noho totona.

October 1974 ai, ful-taim hesiai gaukara lau karaia matamaia, hua ta ta hora 100 lalonai ma haida dekenai Baibel lau herevalaia. Gabeai, Brooklyn, New York ai, Iehova ena Witnes taudia edia hedikwota dekenai volantia gaukara lau karaia. Lagani 1978 ai, egu sinana ia gorere dainai Los Angeles dekenai lau giroa lou ia lau naria totona. Lagani rua murinai, egu lalokau adavana, Aarhonda lau adavaia. Ia be lau ia durua egu sinana ai naria ela bona ia mase. Gabeai, lau bona Aarhonda be Gilead Sikuli ai lao bona ai idia siaia Panama dekenai misinari gaukara ai karaia totona.

Lau bapatiso negana amo gau idauidau ese egu badu haraga karana ia tohoa. To, unai bamona negadiai taunimanima amo lau raka siri eiava dala ma haida ai egu badu karana lau biagua. Unai bamona lau karaia dainai, egu adavana bona ma haida ese lau idia hanamoa. Lau hoa danu! Do lau gwau lasi, sibona egu goada dekena amo egu mauri lau haidaua, to lau abia dae momokani Baibel ena hereva be mai ena siahu ta ena mauri ia haidaua totona.​—Heberu 4:12.

Baibel ena hereva dainai, egu mauri be mai ena anina, bona lau ia durua taunimanima ida maino ai lau noho totona. Hari, taunimanima lau dadabaia lasi, to Dirava ena hereva amo idia lau durua. Guna sikuli ai lau inai henia tauna ta be lau ese Baibel amo lau durua! Ia bapatiso murinai, ai ruaosi be daiutu tamona dekenai ai noho. Unai nega amo ema bona hari ai be tura namodia. Lau bona egu adavana be Baibel amo taunimanima 80 mai kahana ai durua Iehova ena Witnes taudia ai idia lao totona.

Iehova lau tanikiu henia badina egu mauri be mai ena anina bona lau moale badina lau be tadikaka oreana huanai lau noho.