Pwovèb 18:1-24
18 Yon moun ki met kò l apa se yon moun k ap chèche fè tèt li plezi sèlman.Li refize aji avèk* sajès*.
2 Yon moun ki sòt pa pran plezi nan chèche konprann,Li pito devwale sa k nan kè l+.
3 Lè yon moun mechan parèt yon kote, yo meprize l,E lè yon moun aji yon fason ki pa onorab, sa fè gen lawont+.
4 Pawòl nan bouch yon moun tankou gwo dlo ki fon+.Sous sajès sanble ak yon fontèn ki plen dlo.
5 Li pa bon pou yon moun nan paspouki ak mechan+,Oswa pou l anpeche moun ki jis la jwenn jistis+.
6 Pawòl moun ki sòt la lakòz diskisyon+,E bouch li fè lòt moun anvi bat li+.
7 Bouch moun ki sòt la ap fini avè l+,Bouch li se yon pyèj pou lavi l*.
8 Pawòl yon moun k ap pale moun mal tankou yon ti manje ki gou*+,Li desann tou dwat nan vant moun+.
9 Moun k ap fè parès nan travay liSe frè moun k ap kraze brize+.
10 Non Jewova se yon fò ki byen solid+.Moun ki jis la kouri antre anndan l e li jwenn pwoteksyon*+.
11 Richès moun ki rich la tankou yon vil ki byen pwoteje,Nan tèt li, li tankou yon miray k ap pwoteje l+.
12 Se ògèy yon moun gen nan kè l ki fè l tonbe+,Men, imilite fè moun jwenn glwa+.
13 Yon moun ki kouri reponn anvan l tande sa yo di a,Sa l fè a se bagay moun sòt, e se yon imilyasyon pou li+.
14 Lespri yon moun ka ede l sipòte maladi l genyen+,Men, kiyès ki ka sipòte lè l dekouraje nèt*+?
15 Kè moun ki gen bon konprann nan chèche gen konesans+,E zòrèy moun ki gen sajès la ap chèche jwenn konesans.
16 Lè yon moun bay kado, sa ouvri wout pou li+,Sa fè l jwenn ak moun ki enpòtan.
17 Moun ki pale anvan nan yon pwosè parèt gen rezon+,Jiskaske lòt moun nan vini epi li poze l kesyon*+.
18 Lè yo fè tiraj osò, sa fè tout diskisyon fini+,E sa met ola nan mitan* gwo advèsè.
19 Li pi fasil pou yo pran yon vil ki byen pwoteje pase pou yon moun rekonsilye ak yon frè l ki fache+.Gen kont ki tankou gwo bwa yo konn fèmen pòtay fò yo+.
20 Pawòl* yon moun tankou manje ki plen vant li+,L ap satisfè ak sa k ap sot nan bouch li.
21 Lang yon moun gen pouvwa pou l lakòz lanmò e li gen pouvwa pou l bay lavi+.Moun ki renmen sèvi avè l ap manje sa l bay+.
22 Yon gason ki jwenn yon bon madanm jwenn yon bon bagay+,E li jwenn favè* Jewova+.
23 Lè malere a ap pale, se sipliye l ap sipliye moun,Men, moun ki rich la reponn moun rèd.
24 Gen zanmi ki prèt pou kraze youn lòt+,Men, gen zanmi ki pi fidèl pase yon frè+.
Nòt anba paj
^ Oswa: “Li meprize”.
^ Oswa: “sajès ki bay bon rezilta”.
^ Oswa: “pou nanm li”.
^ Oswa: “tankou bagay pou moun vale avèk vorasite”.
^ Lit.: “e yo leve l byen wo”. Sa vle di yon kote yo pa ka pran l, yon kote li an sekirite.
^ Oswa: “lè lespri l kraze”.
^ Oswa: “li fouye l pou l konnen”.
^ Lit.: “sa separe”.
^ Lit.: “Bouch”.
^ Oswa: “bonte”.
