Jij 10:1-18
10 Apre Abimelèk, gen yon lòt mesye ki rele Tola ki te vin parèt pou l sove pèp Izrayèl la+. Tola se te pitit Pouwa e Pouwa se te pitit Dodo. Li te moun tribi Isaka. Li te abite Chami, nan zòn ki gen mòn nan Efrayim nan.
2 Li te jij ann Izrayèl pandan 23 an. Apre sa, li mouri e yo antere l Chami.
3 Apre li, Jayi, ki te moun Galaad, te vin parèt. Li te jij ann Izrayèl pandan 22 an.
4 Li te gen 30 pitit gason ki te konn monte 30 bourik. Yo te gen 30 vil. Vil sa yo nan Galaad, e yo rele yo Avòtjayi+ jis jodi a.
5 Apre sa, Jayi mouri e yo antere l Kamon.
6 Yon lòt fwa ankò, Izrayelit yo te kòmanse fè sa ki mal nan je Jewova+. Yo te kòmanse sèvi Baal yo+, imaj Achtorèt yo, dye Aram* yo, dye peyi Sidon yo, dye peyi Mowab yo+, dye desandan Amon yo+ ak dye moun Filisti yo+. Yo te vire do bay Jewova e yo te sispann sèvi l.
7 Lè sa a, Jewova te vin an kòlè anpil kont pèp Izrayèl la e li lage yo nan men moun Filisti yo ak desandan Amon yo+.
8 Nan ane sa a, yo te malmennen Izrayelit yo e yo te kòmanse toupizi yo. Yo te toupizi Izrayelit yo anpil pandan 18 an nan Galaad, sou bò nan Rivyè Jouden an kote Amorit yo te rete a.
9 Men tou, desandan Amon yo te konn travèse Rivyè Jouden an pou y al goumen ak moun nan tribi Jida yo, moun nan tribi Benjamen yo ak moun nan tribi Efrayim yo. Sa te bay Izrayelit yo anpil pwoblèm.
10 Apre sa, Izrayelit yo te mande Jewova pote yo sekou+, yo te di: “Nou peche kont ou, Bondye nou an, paske nou vire do ba ou e n al sèvi Baal yo+.”
11 Men, Jewova te di Izrayelit yo: “Èske m pa t sove nou anba men Ejipsyen yo+, anba men Amorit yo+, anba men desandan Amon yo, anba men moun Filisti yo+,
12 anba men moun Sidon yo, anba men moun Amalèk yo e anba men moun Madyan yo lè yo t ap toupizi nou an? Lè nou te mande m pote nou sekou, mwen te sove nou.
13 Men, nou te vire do ban mwen e nou t al sèvi lòt dye+. Se poutèt sa mwen pap sove nou ankò+.
14 Al mande dye nou te chwazi yo pote nou sekou+. Se yo ki pou sove nou nan pwoblèm nou ye a+.”
15 Men, Izrayelit yo te di Jewova: “Nou peche. Ou mèt fè nou nenpòt sa w vle. Men, tanpri, sove nou jodi a.”
16 Apre sa, yo te retire tout fo dye yo te gen nan mitan yo e yo te sèvi Jewova+. Se sa k fè, li pa t ka aksepte pou pèp Izrayèl la kontinye soufri*+.
17 Rive yon lè, desandan Amon yo+ te rasanble e yo te tabli kan yo nan Galaad. Se sa k fè, Izrayelit yo te rasanble tou e yo te tabli kan yo nan Mispa.
18 Moun Galaad yo ak prens ki nan Galaad yo t ap di youn lòt: “Kiyès k ap pran latèt pou l al goumen ak desandan Amon yo+? Se pou moun sa a vin chèf tout moun k ap viv Galaad.”
