Jozye 7:1-26
7 Sepandan, Izrayelit yo pa t fidèl piske yo te dezobeyi lòd yo te resevwa pou yo detwi bagay ki te merite detwi yo, paske Akan+, pitit gason Kami ki pitit gason Zabdi, li menm ki pitit gason Zera ki soti nan tribi Jida, te pran nan bagay ki te merite detwi yo+. Se sa k fè Jewova te vin an kòlè anpil kont Izrayelit yo+.
2 Epi, Jozye voye kèk mesye sot Jeriko pou al Ayi+ ki toupre Bètavenn, nan lès Betèl+, li di yo: “Ale kòm espyon nan peyi a.” Se konsa, mesye yo ale kòm espyon nan vil Ayi.
3 Lè yo retounen kot Jozye, yo di l: “Tout lame a pa bezwen ale. Anviwon 2 000 oswa 3 000 gason kont pou pote laviktwa sou Ayi. Ou pa bezwen fè tout lame a fatige kò yo al nan zòn nan, paske moun Ayi yo pa anpil.”
4 Se konsa, anviwon 3 000 gason t al Ayi, men yo te kouri pou mesye Ayi yo+.
5 Mesye Ayi yo te touye 36 ladan yo. Yo te kouri dèyè yo soti depi deyò pòtay vil la rive jis Chebarim*, epi yo te kontinye touye kèk ladan yo toutpandan y ap desann pou yo tounen. Konsa, pèp la pa t gen kouraj* menm ankò, yo te santi tout kò yo lage.
6 Lè sa a, Jozye chire rad sou li e li lage kò l fas atè devan Lach Jewova a rive jis nan aswè, ni li menm ni ansyen ki nan pèp Izrayèl la. Epi, yo pa t sispann mete pousyè tè sou tèt yo.
7 Jozye di: “Elas! Jewova, Seyè ki Souvren an, poukisa w te fè pèp sa a travèse Rivyè Jouden an pou w annik vin lage nou nan men Amorit yo pou yo touye nou? Pito n te reziyen n nou ret lòt bò* Rivyè Jouden an!
8 Padon, o Jewova, ki sa pou m di apre m fin wè pèp Izrayèl la kouri* devan ènmi l yo?
9 Lè moun Kanaran yo ak tout lòt moun ki abite nan peyi a tande sa, y ap sènen nou e y ap elimine non nou sou tè a. Ki sa w ap fè pou non w, yon non ki san parèy+?”
10 Jewova reponn Jozye, li di l: “Leve! Poukisa w kouche fas atè?
11 Pèp Izrayèl la peche. Yo pa t kenbe alyans+ mwen te fè avèk yo a, alyans mwen te ba yo lòd pou yo respekte a. Yo te pran nan bagay ki te merite detwi yo+, yo vòlè yo+ e yo sere yo nan zafè pa yo+.
12 Se sa k fè, Izrayelit yo pap ka kanpe devan ènmi yo. Y ap vire y ale e y ap kouri pou yo, paske yo vin tankou yon bagay ki merite detwi. Mwen pap avèk nou ankò si nou pa elimine bagay ki merite detwi a nan mitan nou+.
13 Leve pou w pirifye pèp la+! Di yo: ‘Demen, nou dwe pirifye tèt nou, paske men sa Jewova, Bondye Izrayèl la, di: “Bagay ki merite detwi a nan mitan nou, o Izrayèl. Nou pap ka kanpe devan ènmi nou yo si nou pa retire bagay ki merite detwi a nan mitan nou.
14 Demen maten, nou dwe rasanble pèp la, tribi pa tribi. Tribi Jewova pran an+ ap pwoche devan l, fanmi pa fanmi. Fanmi Jewova pran an ap pwoche devan l, kay apre kay. Kay Jewova pran an ap pwoche devan l, yon gason apre yon lòt.
15 Epi, y ap touye moun yo kenbe ki gen bagay ki te merite detwi a nan men l e y ap boule l+ ansanm ak tout sa l genyen, paske li pa t respekte alyans+ Jewova a e li te fè yon move zak ann Izrayèl.”’”
16 Se konsa, nan demen, Jozye leve granmmaten, li fè Izrayelit yo pwoche devan Bondye, tribi pa tribi, epi Bondye te pran tribi Jida a.
17 Li fè tribi Jida a pwoche devan Bondye e Bondye te pran fanmi Zera+. Epi, li fè fanmi Zera pwoche devan Bondye, yon gason apre yon lòt, Bondye te pran Zabdi.
18 Alafen, li fè moun lakay Zabdi pwoche devan Bondye, yon gason apre yon lòt. Epi, Bondye te pran Akan, pitit gason Kami ki pitit gason Zabdi, li menm ki pitit gason Zera ki soti nan tribi Jida+.
19 Lè sa a, Jozye di Akan: “Pitit gason m, tanpri, bay Jewova, Bondye Izrayèl la, glwa, e konfese peche w ba li. Tanpri, rakonte m sa w te fè a. Pa kache m anyen.”
20 Akan reponn Jozye: “An reyalite, se mwen menm ki peche kont Jewova, Bondye Izrayèl la. Kite m di w sa m te fè.
21 Lè m te gade nan bagay nou te jwenn apre lagè a, mwen te wè yon bèl rad espesyal ki soti nan peyi Chineya+, mwen te wè kèk pyès ajan ki peze 200 chekèl* ak yon pyès lò ki peze 50 chekèl, mwen te vin anvi yo e mwen te pran yo. Mwen sere yo anba tè nan tant mwen an, mwen met lajan an pa anba.”
22 Menm kote a, Jozye voye yon seri mesye al nan tant Akan an, yo kouri ale e yo jwenn rad yo sere nan tant lan, ak lajan an anba rad la.
23 Yo pran bagay yo nan tant lan, yo pote yo bay Jozye ak tout Izrayelit yo e yo depoze yo devan Jewova.
24 Lè sa a, Jozye ansanm ak tout Izrayelit yo pran Akan+, pitit gason Zera a, yo pran pyès ajan yo, rad espesyal la ak pyè lò a+ ansanm ak pitit gason l yo, pitit fi l yo, bèf li yo, bourik li yo, mouton l yo, tant li an ak tout sa k te pou li, yo mennen yo nan Vale* Akò+.
25 Jozye di: “Poukisa w lakòz malè tonbe sou nou+? Jewova ap lage malè sou ou jodi a.” Lè sa a, tout pèp Izrayèl la touye l ak kout wòch+. Se konsa, yo te touye yo tout ak kout wòch e yo te boule yo+.
26 Epi, yo mete yon gwo pil wòch sou li, ki la jis jodi a. Lè sa a, Jewova te sispann an kòlè anpil kont pèp la+. Se sa k fè yo rele kote sa a Vale Akò* jis jodi a.
Nòt anba paj
^ Sa vle di: “Min wòch”.
^ Lit.: “kè”.
^ Anpalan de bò ki nan lès la.
^ Oswa: “vire do”.
^ Yon chekèl egal 11,4 g. Gade Apendis B14.
^ Oswa: “Plèn”.
^ Sa vle di: “Malè”.
