Nonb 25:1-18
25 Lè pèp Izrayèl la te abite Sitim+, yo t al fè imoralite seksyèl ak medam peyi Mowab yo+.
2 Medam yo te envite pèp la vin nan sakrifis k ap fèt pou dye y ap sèvi yo+ e pèp la te kòmanse manje nan sakrifis yo e yo te kòmanse pwostène devan dye y ap sèvi yo+.
3 Se konsa, pèp Izrayèl la t al adore Baal ki nan Peyò a+, e Jewova te vin fache anpil kont pèp la.
4 Jewova di Moyiz: “Pran tout moun ki alatèt* moun sa yo, pann yo gwo lajounen* devan Jewova pou Jewova pa an kòlè ankò kont pèp Izrayèl la.”
5 Apre sa, Moyiz di jij Izrayelit yo+: “Nou chak dwe touye gason pami nou ki t al adore* Baal ki nan Peyò a+.”
6 Men, nan moman sa a, gen youn nan Izrayelit yo ki te vin ak yon dam ki moun peyi Madyan+ toupre fanmi l yo, devan je Moyiz ak tout pèp Izrayèl la, pandan pèp la t ap kriye nan antre tant reyinyon an.
7 Lè Fineyas+, pitit gason Eleyaza ki pitit gason Arawon, prèt la, wè sa, san pèdi tan, li leve kanpe nan mitan pèp la e li pran yon lans.
8 Apre sa, li suiv Izrayelit la rive jis nan tant yo ye a e li pèse yo toule de ak lans lan. Lans lan travèse kò Izrayelit la l al antre nan pati entim dam nan. Menm moman an, flewo ki te tonbe sou Izrayelit yo sispann+.
9 Te gen 24 000 moun ki te mouri nan flewo a+.
10 Apre sa, Jewova di Moyiz:
11 “Fineyas+, pitit gason Eleyaza ki pitit gason Arawon, prèt la, te fè m pa an kòlè ankò kont pèp Izrayèl la, paske li pa t tolere okenn moun ki pa fidèl avè m nan mitan pèp la+. Se sa k fè m pa detwi Izrayelit yo, byenke mwen egzije pou moun atache avè m sèlman+.
12 Se poutèt sa, men sa pou w di: ‘M ap fè yon alyans avè l, yon alyans lapè.
13 Se yon alyans k ap pèmèt li menm ak desandan l yo sèvi kòm prèt pandan anpil tan+, paske li pa t tolere okenn moun ki pa fidèl avèk Bondye l la+ e paske li te fè pèp Izrayèl la jwenn padon pou peche yo.’”
14 Twouve, Izrayelit yo te touye ansanm ak dam ki moun Madyan an te rele Zimri. Se te pitit gason Salou, yon chèf fanmi nan tribi Simeyon an.
15 Dam ki moun Madyan yo te touye a te rele Kozbi. Se te pitit fi Sou+, yon chèf gwoup nan fanmi moun Madyan yo+.
16 Nan pita, Jewova di Moyiz:
17 “Al atake moun Madyan yo, epi touye yo+,
18 paske yo te atake nou lè yo te pran nou sou plan nan zafè Peyò a+ ak nan istwa Kozbi a, pitit fi yon chèf peyi Madyan, dam yo te touye+ jou flewo a te tonbe sou pèp la nan zafè Peyò a+.”
