CHAPIT 15

Ki jan m ka reziste anba presyon lòt jèn ap fè?

“Nan lekòl la, yo fè presyon sou ou pou anpil bagay: fimen, dwòg, sèks. Ou konnen sa elèv yo vle w fè a pa bon. Men, ou rive nan yon pwen kote w santi w pa ka kontinye ap rale kò w dèyè.” — Eve.

NATIRÈLMAN, moun vle pou lòt moun aksepte yo. Se sa k fè, lè yo fè presyon sou yon moun, an jeneral sa mache. Pa egzanp, si w leve nan yon fanmi kretyen, ou konnen gen kèk bagay ki pa bon, tankou fè sèks anvan maryaj ak bwè twòp alkòl (Galat 5:19-21). Men, anpil nan jèn parèy ou yo ap ankouraje w fè bagay sa yo. Èske se reflechi yo te reflechi sou bagay sa yo ki fè yo pran desizyon yo pran an? Nou  pa kwè sa. An jeneral, yo jis fè sa lòt moun fè. Yo vle pou moun aksepte yo, se sa k fè yo kite lòt moun enfliyanse yo. Èske se konsa w ye? Oswa, èske w gen kouraj pou w defann konviksyon w genyen yo?

Omwen pandan yon tan, Arawon, frè Moyiz la, pa t reziste anba presyon lòt moun ap fè sou li. Lè Izrayelit yo te fè presyon sou li pou l fè yon dye pou yo, li te fè egzakteman sa yo di l la (Egzòd 32:1-4). Imajine sa, se menm Arawon sa a ki te gen kran al kot Farawon pou l ba l mesaj Bondye te voye ba li a (Egzòd 7:1, 2, 16). Poutan, lè Izrayelit parèy li yo te fè gwo presyon sou li, li te sede. Sanble, li te pi fasil pou l reziste devan wa Ejip la pase pou l reziste devan presyon Izrayelit yo t ap fè sou li!

E ou menm? Èske w twouve li difisil pou w defann sa w konnen ki dwat? Èske w pa ta renmen reziste anba presyon lòt jèn ap fè sou ou san w pa kite yo wè w pè? Ou kapab! Yon bagay ki enpòtan se eseye gentan wè lè presyon an ap vini epi deside alavans sou jan w ap reyaji. Kat etap ki pi ba yo ap ede w fè sa.

1. Pran devan. (Pwovèb 22:3). Byen souvan, ou ka gentan wè pwoblèm nan alavans. Pa egzanp, imajine w ap mache  e w wè yon gwoup elèv pi devan an k ap fimen. Ou gentan konnen yo pral ofri w yon sigarèt. Etandone ou gentan wè pwoblèm nan, w ap pare pou w fè fas avè l.

2. Reflechi. (Ebre 5:14). Mande tèt ou: ‘Si m kòmanse fè menm bagay ak elèv sa yo, ki jan m ap santi m?’ Se vre, pandan yon ti tan ou ka santi jèn yo aksepte w, men ki jan w ap santi w annapre lè w avèk paran w oswa ak kretyen parèy ou yo? Èske w ap dakò pèdi bèl repitasyon ou gen devan Bondye a jis pou w fè elèv yo aksepte w?

3. Deside. (Detewonòm 30:19). Kit se kounye a kit se pi devan, tout sèvitè Bondye ap gen pou chwazi swa pou yo rete fidèl epi pou yo jwenn benediksyon swa pou yo pa rete fidèl epi pou yo peye move konsekans sa ap pote. Labib pale de yon seri mesye tankou Jozèf, Jòb ak Jezi, ki te pran bon desizyon. Li pale tou de yon seri mesye tankou, Kayen, Ezaou ak Jida, ki te pran move desizyon. Ki sa ou menm w ap fè?

4. Aji. Petèt ou ka panse se sa ki pi difisil la, men se pa vre. Si w deja reflechi ak konsekans yo epi w medite sou yo, ou ka sezi wè jan l pi fasil pou w fè konn pozisyon w, e sa ap pote byenfè (Pwovèb 15:23). Pa fatige w, ou pap bezwen fè yon diskou sou Bib la pou yo. Ou ka annik di yo: Non! Men, fè sa avèk kran. Oubyen, pou w ka montre yo pozisyon w byen klè, ou kapab di:

“M pa avè nou!”

“M pa nan bagay sa yo!”

“A mesye, nou konnen ki moun mwen ye!”

Sa k pi enpòtan an se aji rapid e avèk kran. Si w fè sa, w ap sezi wè jan y ap ba w vag byen vit! E si lòt jèn yo ap fawouche w? Si yo di w: “Sa w  gen la a? Apa w ap fè lach?” Lè sa rive, sonje sa yo di a se pa vre, se jis yon fawouch. Ki sa w ka fè? Ou gen omwen twa opsyon.

● Ou ka aksepte fawouch la. (“Ou gen rezon, mwen pè!” Epi bay rezon ki fè w pè a, san w pa di anpil bagay.)

● Ou ka vire fawouch la sou yon lòt bagay lè w annik di yo ki pozisyon w san w pa fè diskisyon avè yo.

● Ou ka retounen fawouch la sou yo. Bay rezon ki fè w pa dakò a epi di yo bagay ki fè yo reflechi. (“Ou fimen? M te panse w te pi entèlijan pase sa wi!”)

Si yo kontinye fawouche w, al fè wout ou! Sonje sa, plis ou rete se plis presyon an ap vin pi fò. Menmsi se ale  w ale, sonje: Se ou ki gen kontwòl sitiyasyon an. Ou pa t kite lòt moun fè w chanje moun ou ye a!

Gen kèk nan jèn parèy ou yo ki ka ba w defi e yo ka di w se pa ou k ap pran desizyon w. Men anfèt se ou ki pran desizyon w! Dayè, Jewova vle pou se ou menm ki rann ou kont pi bon fason pou w viv la se fè volonte l (Women 12:2). Donk, poukisa pou w kite lòt jèn yo fè w tounen yon maryonèt (Women 6:16). Defann sa w konnen ki bon an!

Fò w reyalis, ou pa ka anpeche lòt jèn fè presyon sou ou. Men, ou ka deside sa w vle fè, ou ka kanpe sou pozisyon w epi ou pran kontwòl sitiyasyon an. An reyalite, se nan men w desizyon an ye! — Jozye 24:15.

LI PLIS BAGAY SOU SIJÈ SA A NAN VOLIM 1, CHAPIT 9.

NAN LÒT CHAPIT LA:

Èske w ap mennen de vi? Ki byenfè ou ka jwenn si w met paran w okouran tout sa w ap mennen?

VÈSÈ KLE

“Moun ki mache ak moun ki gen sajès ap vin gen sajès, men, moun ki annafè ak moun ki sòt, sa ap mal pou li.” — Pwovèb 13:20.

MEN YON IDE

Lè w li eksperyans sèvitè Jewova nan epòk nou an fè ak fason yo pran pozisyon pou sa ki dwat, sa ap ede w gen kran.

ÈSKE W TE KONNEN?

Ennan apre w fini lekòl, se kèk elèv nan klas ou sèlman k ap gen kontak avè w. Anpil ladan yo ka pa menm sonje non w. Men fanmi w, e sitou, Jewova, ap toujou vle byen pou ou. — Sòm 37:23-25.

SA M KONTE FÈ

Men sa m ap fè pou m prepare m pou m reziste devan presyon lòt jèn ap fè ․․․․․

Men sa m ap fè si lòt jèn ap fè presyon sou mwen pou m fè sa k pa sa ․․․․․

Men sa mwen ta renmen mande paran m sou sijè sa a ․․․․․

KI SA W PANSE?

● Nan ki sitiyasyon ou panse kat etap nou te pale nan chapit sa a kapab ede w?

● Ki sa k ka rive si w sede devan presyon lòt jèn ap fè sou ou?

● Bay kèk fason ou kapab reziste devan presyon lòt jèn ap fè sou ou.

[Antrefilè nan paj 131]

“Pifò mesye yo konnen mwen se Temwen, e yo respekte m. Si yo pral pale yon vye bagay, yo di m: ‘Mike, nou pral pale yon bagay la a, si w vle ou kapab ale.’” — Mike.

 [Tablo nan paj 132, 133]

Fich aktivite

Si y ap fè presyon sou mwen

Modèl

1 Pran devan

Tantasyon an: Fimen sigarèt.

Kote m gen plis chans jwenn li: Nan twalèt yo.

2 Reflechi

Ki sa k ap rive si m sede?

M ap fè Jewova ak paran m lapenn. Konsyans mwen ap kale m. L ap pi difisil pou m di non pwochèn fwa a.

Ki sa k ap rive si m reziste?

Yo ka fawouche m oswa ban m non. Kèk nan elèv yo ka evite m. Men, m ap fè kè Jewova kontan, e m ap vin gen plis konviksyon.

3 Deside

Si m ta sede se paske

Mwen pa prepare ase pou m fè fas ak presyon an. Sa jèn parèy mwen yo panse gen plis enpòtans pou mwen pase sa Jewova panse.

M ap reziste paske

Mwen konnen sa pa fè Jewova plezi e fimen ka ban m pwoblèm sante.

4 Aji

M ap

di non epi m prale.

Fawouch

Si yon jèn di: “Ah, pran sigarèt la non. Ou genlè pè?”

Men diferan fason m ap reyaji si yo fawouche m

Aksepte l

“Ou gen rezon, mwen pè sigarèt. Mwen pa vle gen yon kansè poumon.”

Vire l

“Pa pèdi tan w ban m sigarèt ou a.”

Retounen l

“Non mèsi. Ou fimen? Mwen te panse w pi entèlijan pase sa!”

NOTE SA: Deplase tousuit si yo kontinye ap fè presyon sou ou. Plis ou rete, se plis ou gen chans pou w vin tounen yon maryonèt nan men yo. Kounye a, ranpli fich aktivite ki nan lòt paj la.

 Si y ap fè presyon sou mwen

Fè kopi paj sa a!

1 Pran devan

Tantasyon an: ․․․․․

Kote m gen plis chans jwenn li: ․․․․․

2 Reflechi

Ki sa k ap rive si m sede?

․․․․․

Ki sa k ap rive si m reziste?

․․․․․

3 Deside

Si m ta sede se paske...

․․․․․

M ap reziste paske...

․․․․․

4 Aji

․․․․․

M ap...

․․․․․

Fawouch

Si yon jèn di: ․․․․․

Men diferan fason m ap reyaji si yo fawouche m

Aksepte l

․․․․․

Vire l

․․․․․

Retounen l

․․․․․

Repete repons ou yo devan paran w oswa devan yon zanmi ki gen matirite.

[Foto nan paj 135]

Si w sede devan presyon lòt jèn fè sou ou, w ap vin tounen yon maryonèt nan men yo.