Fikse objektif ou pou w sèvi Bondye pou toutan
Chapit 18
Fikse objektif ou pou w sèvi Bondye pou toutan
1, 2. Ki sa ki egzije apre moun fin gen konesans Bondye a ?
IMAJINE ou kanpe devan yon pòt fèmen ki bay sou yon chanm kay chaje ak trezò. Yon moun ki gen otorizasyon ba w kle a, epi li di w nan richès sa yo pran sa w vle. Kle sa a pap itil ou anyen si w pa sèvi avè l. Menm jan an, fòk ou sèvi ak konesans ou genyen si w vle li pote avantaj pou ou.
2 Sa pi vre toujou pou konesans Bondye a. Wi, yon konesans egzak sou Jewova Dye ak Jezi Kris siyifi lavi etènèl (Jan 17:3). Poutan, genyen senpman konesans lan pa ka reyalize esperans sa a. Menm jan ou ta sèvi ak yon kle ki gen anpil valè, ou bezwen mete konesans Bondye a an pratik nan lavi w. Jezi te di se moun ki fè volonte Bondye k ap “ antre nan Wayòm nan ”. Moun sa yo ap gen privilèj sèvi Bondye pou toutan. — Matye 7:21 ; 1 Jan 2:17.
3. Ki sa Bondye vle nou fè ?
3 Apre ou fin aprann ki sa volonte Bondye ye, li vital pou w fè l. Ki sa w kwè volonte Bondye a ye pou ou ? Pawòl sa yo ka rezime li byen : Se pou w imite Jezi. Annou li 1 Pyè 2:21 : “ Se pou konpòtman sa a yo te rele nou, paske Kris tou te soufri pou nou, li kite yon modèl pou nou suiv tras li fidèlman. ” Pou fè volonte Bondye, ou bezwen suiv egzanp Jezi fidèlman otank posib. Se konsa pou w mete konesans Bondye a an pratik.
KOUMAN JEZI TE SÈVI AK KONESANS BONDYE A
4. Sa k fè Jezi te konnen Jewova byen konsa, e ki jan l te sèvi ak konesans sa a ?
4 Jezi konnen Bondye pi byen pase nenpòt lòt moun. Li t ap viv avèk Jewova Dye nan syèl la e li t ap travay avè l lontan lontan lontan anvan l te vin sou tè a (Kolosyen 1:15, 16). Ki sa Jezi te fè ak tout konesans sa a ? Li pa t kontante l genyen l senpman, men Jezi te viv ann akò avèk li. Se sa ki fè l te trete lèzòm avèk anpil bonte, anpil pasyans ak anpil lanmou. Konsa, Jezi te imite Papa l ki nan syèl la e li te aji selon konesans li genyen sou ajisman ak pèsonalite Jewova. — Jan 8:23, 28, 29, 38 ; 1 Jan 4:8.
5. Poukisa Jezi te batize, e kouman li te viv ann akò ak siyifikasyon batèm ni an ?
5 Konesans Jezi genyen an te pouse l fè yon pa esansyèl tou. Li soti Galile, l al nan larivyè Jouden kote Jan te batize l la (Matye 3:13-15). Ki sa batèm Jezi a te represante ? Etan Jwif li te fèt nan yon nasyon ki te tou vwe bay Bondye. Konsa, Jezi te vwe depi l fèt (Egzòd 19:5, 6). Pa mwayen batèm nan, li te prezante l li menm devan Jewova nan moman sa a pou l fè volonte li (Ebre 10:5, 7). Epi Jezi te viv ann akò ak siyifikasyon batèm ni an. Li te lage kò l nan fè sèvis Jewova, li te sote sou tout okazyon pou l pataje konesans Bondye a ak moun yo. Jezi te pran plezi nan fè volonte Bondye, li menm di sa te tankou yon manje pou li. — Jan 4:34.
6. Nan ki fason Jezi te renye tèt li ?
6 Totalman Jezi te rann li kont fè volonte Bondye t apral koute l trè chè, sa t apral menm koute l lavi li. Malgre sa, Jezi te renye tèt li, li te mete enterè pèsonèl li nan dezyèm plas. Se fè volonte Bondye li te toujou bay priyorite. Nan sans sa a, ki jan nou kapab suiv egzanp pafè Jezi te bay la ?
DEMACH K AP MENNEN NAN LAVI ETÈNÈL LA
7. Bay kèk nan demach yon moun dwe fè pou l kalifye pou batèm nan ?
7 Kontrèman ak Jezi nou fèt tou pechè. Batèm nan se yon etap esansyèl, men nou kapab rive ladan l sèlman apre nou fin fè yon seri lòt gwo demach. Avantou, fò konesans egzak sou Jewova ak Jezi Kris la antre nan kè nou. Konsa, sa ap fè nou egzèse lafwa epi n ap gen lanmou pwofon pou Bondye (Matye 22:37-40 ; Women 10:17 ; Ebre 11:6). Obeyi ni lalwa ni prensip ni egzijans Bondye yo dwe mennen nou repanti, epi sa dwe fè nou demontre nou gen tristès ki konfòm ak volonte Bondye a pou peche nou nan tan lontan yo. Sa mennen nou konvèti, ki vle di kase tèt tounen epi abandone tout move chemen nou t ap suiv lè nou potko gen konesans Bondye a (Travay 3:19). Natirèlman, si nou toujou ap pratike peche an kachèt olye pou nou fè sa ki jis, nou pa ni kase tèt tounen toutbonvre, ni nou pap rive twonpe Bondye. Jewova ap detekte tout ipokrizi. — Lik 12:2, 3.
8. Ki demach ou dwe fè lè w vle patisipe nan aktivite predikasyon Wayòm nan ?
8 Kòm kounye a ou vin gen yon bon dòz konesans sou Bondye, èske li pa konvnab pou w konsidere ki jan ou menm ou wè kesyon espirityèl yo ? Petèt ou gen anpresman pou w pale de sa w aprann ak fanmi w, ak zanmi w yo oswa ak lòt moun ankò. Anfèt, petèt ou deja kòmanse fè sa menm jan ak Jezi ki te konn pataje bon nouvèl la ak lòt moun nan kad enfòmèl (Lik 10:38, 39 ; Jan 4:6-15). Petèt kounye a ou anvi fè plis. Ansyen yo ap byen kontan pale avè w pou wè si w kalifye, epi si w kapab kòmanse patisipe ak Temwen Jewova yo nan aktivite regilyè predikasyon Wayòm nan. Si pa gen pwoblèm, ansyen yo ap fè aranjman pou yon Temwen akonpaye w nan ministè a. Disip Jezi yo te suiv enstriksyon li yo defason pou yo akonpli ministè yo a nan lòd (Mak 6:7, 30 ; Lik 10:1). Ou pral jwenn menm èd sa a pandan w ap simaye mesaj Wayòm nan kay an kay ak lòt fason ankò. — Travay 20:20, 21.
9. Kouman yon moun kapab vwe lavi li bay Bondye, e ki efè ve a fè sou lavi moun nan ?
9 Preche tout kalite moun bon nouvèl la nan tèritwa kongregasyon an se yon fason pou w rankontre moun ki swaf jistis yo, epi sa se youn pami bèl zèv ki demontre w gen lafwa (Travay 10:34, 35 ; Jak 2:17, 18, 26). Asiste reyinyon yo regilyèman, patisipe toutbon nan travay predikasyon an se fason tou pou w demontre ou te repanti e ou te kase tèt tounen, epitou se fason pou w montre ou detèmine pou w viv ann akò ak konesans Bondye a. Lojikman ki demach ki vin apre ? Se vwe Jewova Dye lavi w. Sa vle di nan yon priyè sensè, de bongre, ou di Bondye ou ba li lavi w ak tout kè w, pou w fè volonte l. Se fason sa a ou vwe tèt ou bay Jewova, e w asepte jouk dous Jezi a. — Matye 11:29, 30.
SA BATÈM NAN SIYIFI POU OU
10. Poukisa w dwe batize apre w fin vwe lavi w bay Jewova ?
10 Selon Jezi, tout moun ki vin disip li dwe batize (Matye 28:19, 20). Poukisa sa nesesè onfwa w fin vwe tèt ou bay Bondye ? Depi w te vwe Jewova lavi w li konnen ou renmen l. Men se sèten, w ap vle fè lòt aksyon pou w fè lòt moun konnen ou renmen Bondye. Enben, batèm nan ba w mwayen pou w fè konnen piblikman ou vwe tout ou menm bay Jewova Dye. — Women 10:9, 10.
11. Ki sa batèm vle di ?
11 Batèm senbolize anpil bagay. Lè w plonje a oswa lè w “ antere ” anba dlo a, se kòmsi w te mouri kanta ansyen fason w te konn viv la. Lè w soti anba dlo a, se kòmsi w leve pou yon lòt lavi nèf, yon lavi volonte Bondye ap gouvènen, non pa volonte pa w. Natirèlman sa pa vle di ou pap fè fot ankò, paske nou tout fèt pechè e nou peche chak jou. Toutfwa, etan sèvitè Jewova vwe e batize, ou vin antre nan yon relasyon espesyal avè l. Akòz se repantans ak imilite w ki fè w asepte batize, Jewova dakò pou l padone peche w yo sou baz sakrifis redanmsyon Jezi a. Konsa batèm nan pèmèt ou vin gen yon konsyans pwòp devan Bondye. — 1 Pyè 3:21.
12. Sa sa vle di batize a) “ nan non Papa a ” ? b) ‘ nan non Pitit la ’ ? c) ‘ nan non lespri sen an ’ ?
12 Jezi te òdone moun k ap suiv li yo pou yo batize nouvo disip yo, “ nan non Papa a, nan non Pitit la ak nan non lespri sen an ”. (Matye 28:19.) Ki sa Jezi te vle di ? Batize “ nan non Papa a ” endike moun nan asepte Jewova ak tout kè l kòm Kreyatè a, kòm Chèf siprèm lejitim linivè a (Sòm 36:9 ; 83:18 ; Eklezyas 12:1). Lè moun nan batize ‘ nan non Pitit la ’ sa vle di li rekonèt Jezi Kris, sitou sakrifis redanmtè li a kòm sèl mwayen Bondye prevwa pou moun sove (Travay 4:12). Batize ‘ nan non lespri sen an ’ siyifi kandida batèm nan rekonèt lespri sen Jewova a oswa fòs aktif li a kòm enstriman Bondye sèvi pou reyalize pwogram li yo. Li sèvi avè l pou fòtifye sèvitè li yo pou yo fè volonte l ki jis, an kolaborasyon ak òganizasyon l ap dirije avèk lespri li a. — Jenèz 1:2 ; Sòm 104:30 ; Jan 14:26 ; 2 Pyè 1:21.
ÈSKE W PARE POU BATÈM NAN ?
13, 14. Poukisa nou pa ta dwe pè chwazi sèvi Jewova Dye ?
13 Piske batèm nan gen tout siyifikasyon sa a, e piske se jalon ki pi enpòtan nan lavi yon moun, èske se yon demach ou ta dwe pè pou w fè ? Non, pa ditou ! Byenke moun pa fèt pou pran desizyon pou batize a alalejè, pa gen dout se pi bon desizyon ou ta ka pran.
14 Batèm nan demontre ou chwazi pou w sèvi Jewova Dye. Reflechi sou moun ou konnen yo. Vle pa vle, yo chak gen yon mèt y ap sèvi, pa vre ? Genyen ki esklav larichès (Matye 6:24). Gen lòt se karyè yo y ap pousuiv oswa se tèt yo y ap sèvi, paske enterè pèsonèl yo se sa ki pi enpòtan pou yo nan lavi a. Gen lòt ankò se fo dye y ap sèvi. Men ou menm ou chwazi pou w sèvi vrè Dye a, Jewova. Pa gen pèsonn ki montre bonte, konpasyon ak amou konwè li. Bondye onore lèzòm piske li konfye yo yon travay itil k ap pèmèt yo sove. Rekonpans l ap bay sèvitè l yo se lavi etènèl. Sètènman ou pa bezwen pè suiv egzanp Jezi, ni pè bay Jewova lavi w. An reyalite se sèl fason pou lavi moun ye pou l fè Bondye plezi, epi sa rezonab nèt. — 1 Wa 18:21.
15. Ki bagay souvan ki konn anpeche yon moun batize ?
15 Toutfwa, batèm nan se pa yon demach pou moun fè anba presyon. Se yon kesyon pèsonèl ant ou menm ak Jewova (Galat 6:4). Kòm ou fè bonjan pwogrè espirityèl, petèt w ap mande w : “ Ki sa ki anpeche m batize ? ” (Travay 8:35, 36). Poze tèt ou kesyon sa yo : ‘ Èske se opozisyon fanmi m ki kenbe m ? Èske m ap viv nan yon sitiyasyon ki kontrè ak sa Bib la di, oswa èske m ap pratike kèk peche toujou ? Èske se pa pè mwen pè pèdi favè moun nan katye a ? ’ Sa yo se kèk pwen pou w egzamine, men reflechi sou yo defason reyalis.
16. Ki pwofi w ap jwenn nan sèvi Jewova ?
16 Li pa reyalis pou w peze enkonvenyan yo san w pa mezire avantay w ap retire nan sèvi Jewova. Paregzanp, annou egzamine opozisyon manm fanmi w yo. Jezi te pwomèt menmsi, poutèt disip li yo ap suiv li yo pèdi paran yo, yo ta vin genyen yon pi gran fanmi espirityèl (Mak 10:29, 30). Moun sa yo ki gen menm lafwa avè w yo ap montre w yo gen lanmou fratènèl, y ap ede w andire pèsekisyon, epi y ap soutni w sou wout lavi a (1 Pyè 5:9). Ansyen yo nan kongregasyon an, espesyalman, ap ede w fè fas ak pwoblèm yo avèk lòt sitiyasyon difisil w ap rankontre (Jak 5:14-16). Konsènan pèdi favè monn nan, li bon pou w poze w kesyon : ‘ Ki sa ki kapab konpare ak jwenn apwobasyon Kreyatè linivè a, fè kè l kontan lè m chwazi mòd lavi sa a ? ’ — Pwovèb 27:11.
SE POU W VIV ANN AKÒ AK VE OU FÈ A ANSANM AK BATÈM NAN
17. Poukisa w ta dwe gade batèm nan tankou yon kòmansman e non pa tankou yon fen ?
17 Li enpòtan pou w raple w batèm nan se pa dènye etap ki genyen nan pwogrè espirityèl ou. Li make kòmansman tout yon vi nan sèvis Bondye kòm yon minis òdone, e kòm youn nan Temwen Jewova yo. Aktout batèm nan enpòtan anpil, se pa yon garanti pou moun sove. Jezi pa t di : ‘ Tout moun ki batize ap sove . ’ Li te di pito : “ Moun ki andire jiska lafen se moun sa a k ap sove. ” (Matye 24:13). Pakonsekan, li vital pou w chèche Wayòm Bondye a dabò, lè w ba li premye plas nan lavi ou. — Matye 6:25-34.
18. Apre batèm nan ki lòt objektif pou w pousuiv ?
18 Pou w andire nan sèvis ou pou Jewova, li ta bon pou w fikse objektif espirityèl pou tèt ou. Yon objektif valab se pwogrese nan konesans ou sou Bondye grasa yon etid pèsonèl regilyè nan Pawòl li. Fè pwogram pou w li Bib la chak jou (Sòm 1:1, 2). Toujou asiste reyinyon yo regilyèman, paske frekantasyon w ap fè nan okazyon sa yo pral ede w jwenn plis fòs espirityèl. Bò kote pa w, poukisa w pa fikse objektif pou w fè kòmantè nan reyinyon kongregasyon an pou w bay Jewova lwanj e pou w bati lòt moun (Women 1:11, 12) ? Yon lòt objektif ou te ka fikse se chèche amelyore kalite priyè w yo. — Lik 11:2-4.
19. Kilès kalite lespri sen kapab ede w devlope ?
19 Si w vle viv ann akò ak siyifikasyon batèm ou an, ou bezwen veye toutan sou jan w ap aji, kite lespri sen Bondye devlope yon seri kalite nan ou tèlke lanmou, lajwa, lapè, pasyans, byenveyans, bonte, lafwa, ladousè, ak metriz (Galat 5:22, 23 ; 2 Pyè 3:11). Pa bliye, Jewova ap bay tout sèvitè fidèl e obeyisan li yo lespri sen, depi yo lapriyè pou sa (Lik 11:13 ; Travay 5:32). Priye Bondye pou l ba ou lespri li, mande l èd pou w manifeste kalite ki fè l plezi yo. Ofiramezi w ap kite lespri sen aji sou ou, kalite sa yo ap vin pi vizib nan pawòl ou ak nan konduit ou. Natirèlman, chak manm nan kongregasyon an ap lite pou yo devlope “ nouvo pèsonalite a ” pou yo ka vin sanble piplis ak Kris (Kolosyen 3:9-14). Nou chak nou rankontre ak divès kalite eprèv pandan n ap fè sa, selon nivo pwogrè espirityèl nou. Piske ou fèt pechè, ou dwe travay di pou rive gen yon pèsonalite ki sanble ak pa Kris la. Men, sou rapò sa a, pa janm dekouraje, paske li posib pou w reyisi avèk èd Bondye.
20. Ki fason ou kapab imite Jezi nan ministè a ?
20 Imite egzanp Jezi te bay nan domèn lajwa a pi byen ta dwe pami objektif espirityèl ou yo (Ebre 12:1-3). Li te renmen ministè li. Alò, si w gen privilèj patisipe nan aktivite predikasyon Wayòm nan, veye pou l pa tounen yon senp woutin. Menm jan ak Jezi, chèche jwenn satisfaksyon nan anseye lòt moun Wayòm Bondye a. Sèvi ak enstriksyon yo bay nan kongregasyon an pou w ka vin yon pi bon anseyan. Epi ou mèt asire, Jewova kapab ba ou fòs pou w akonpli ministè w. — 1 Korentyen 9:19-23.
21. a) Kouman nou fè konnen moun batize ki fidèl yo se trezò pou Jewova ? b) Ki sa ki demontre batèm nan enpòtan pou nou ka sove anba jijman Bondye a k ap tonbe sou sistèm de choz mechan jodi a ?
21 Yon moun ki vwe e ki batize k ap fè efò pou l suiv Jezi fidèlman, se yon moun presye pou Bondye. Jewova ap egzamine kè tout moun, sa vle di dè e dè milya, epi li konnen jan de moun konsa yo ra. Li konsidere yo tankou trezò, tankou “ bagay apresyab ”. (Agayi 2:7.) Pwofesi biblik yo montre Bondye konsidere moun sa yo tankou moun ki make pou sove anba jijman l lan k ap tonbe sou sistèm mechan ki la jodi a (Ezekyèl 9:1-6 ; Malaki 3:16, 18). Èske w “ nan dispozisyon kòrèk pou lavi etènèl la ” ? (Travay 13:48.) Èske w gen dezi sensè pou w resevwa mak la kòm yon moun k ap sèvi Bondye ? Ve a ansanm ak batèm nan fè pati mak la e yo esansyèl pou w ka sove.
22. Ki espwa “ gwo foul moun ” nan genyen devan l ?
22 Apre delij dlo a, Noye ak fanmi l te soti nan lach la vin sou yon tè pirifye. Menm jan an jodi a, “ yon gwo foul moun ” mete konesans Bondye a an pratik nan lavi yo. Jewova apwouve yo e yo gen espwa chape vivan lè sistèm mechan ki la jodi a detwi, pou yo jwenn lavi etènèl sou yon tè pirifye anpèmanans (Revelasyon 7:9, 14). Ki jan lavi sa a pral ye ?
TESTE KONESANS OU
Kouman Jewova vle w sèvi ak konesans ou genyen sou li a ?
Bay kèk nan demach ki mennen nan batèm.
Poukisa batèm nan se yon kòmansman e non pa yon fen ?
Kouman pou nou viv ann akò ak ve nou fè a ansanm ak batèm nan ?
[Kesyon]
[Foto nan paj 172]
Èske w vwe lavi w bay Bondye nan lapriyè ?
[Foto nan paj 174]
Ki sa ki anpeche w batize ?
