PLIZYÈ milyon kretyen chwazi pa fete Nwèl. Ki jan yo santi yo? Èske yo santi yo manke yon bagay? Èske pitit yo santi yo pèdi yon bagay? Ann gade sa kèk Temwen Jewova toupatou sou tè a di sou sa.

Yo sonje Jezi Kris: “Anvan m te vin Temwen Jewova, m pa t gen abitid al legliz. Lè m resi ale se nan okazyon Nwèl ak Pak. Men, menm lè sa a, mwen pa t vrèman panse ak Jezi Kris. M pa fete Nwèl ankò, men, mwen asiste reyinyon nou fè antanke kretyen yo de fwa pa semèn e m menm anseye lòt moun sa Bib la di sou Jezi!” — EVE, OSTRALI.

Yo jwenn kè kontan ki gen nan bay: “Se pa ti kontan mwen kontan lè moun ban m yon kado alòske m pa t ap atann sa. Mwen renmen sipriz! Epi mwen renmen fè kat ak tablo pou lòt moun, paske sa fè yo gen plis kè kontan e sa fè kè m kontan tou.” — REUBEN, ILANN DINÒ.

Yo ede moun ki nan bezwen: “Nou renmen fè manje pou moun ki malad. Pafwa, nou pote flè, gato, oswa yon ti kado pou fè kè yo kontan. Nou renmen sa paske nou ka al wè yo nenpòt lè nan ane a.” — EMILY, OSTRALI.

Fanmi yo pase tan ansanm: “Lè fanmi nou yo reyini ansanm, pitit nou yo rive konn tonton yo, matant yo, granparan yo, kouzen yo ak kouzin yo nan yon anbyans ki rilaks. Kòm se pa nan okazyon yon fèt sèlman nou oblije rankontre, nou pa santi nou sou presyon, epitou fanmi nou konnen nou vin wè yo paske nou renmen yo.” — WENDY, ZILE KAYIMAN.

Yo gen lapè: “Lè fèt Nwèl, se kòmsi tèlman gen aktivite, moun pa vrèman panse ak lapè. Mwen te aprann sa Bib la pwomèt pou lèzòm e sa fè m santi m byen. Mwen konnen pitit mwen pral gen yon bèl avni.” — SANDRA, ESPAY.