Pa gen dout, ansèyman fondamantal ou sot egzamine nan Bib la ranfòse lanmou w gen pou Jewova. Ou dwe kontinye travay pou w fè lanmou sa a vin pi fò toujou (1 Pyè 2:2). W ap ka toujou gen espwa jwenn lavi ki pap janm fini an si w kontinye pwoche bò kote Bondye grasa etid w ap fè nan Pawòl li a. — Li Jan 17:3; Jid 21.

Plis w ap vin gen konesans sou Bondye, se plis lafwa w ap vin pi solid. Lafwa ap ede w fè Bondye plezi (Ebre 11:1, 6). L ap pouse w pou w repanti e pou w fè chanjman ki nesesè nan fason w ap viv. — Li Travay 3:19.

Natirèlman, w ap anvi pataje sa w aprann yo ak lòt moun paske nou tout renmen bay bon nouvèl. Pandan w ap kontinye etidye Labib, w ap aprann fason pou w sèvi ak Bib la pou w bay rezon ki fè w gen lafwa nan Jewova ak nan bon nouvèl la. — Li Women 10:13-15.

Pifò moun kòmanse pataje bon nouvèl la ak zanmi yo oswa ak fanmi yo anvan. Men, se pou w fè sa avèk tak. Olye pou w di yo relijyon yo a pa bon, pale yo pito de pwomès Bondye fè yo. Epi pa bliye, souvan, konduit nou gen plis efè sou moun pase sa nou di. — Li 2 Timote 2:24, 25.

Lefètke w ap etidye Pawòl Bondye a, sa ap ede w vin gen pi bon relasyon ak Bondye. Rive yon lè, ou ka gen yon relasyon  vrèman espesyal ak Jewova. Anfèt, ou ka vin fè pati fanmi l, konsa w ap vin moun pa l. — Li 2 Korentyen 6:18.

Ou ka vin gen pi bon relasyon ak Bondye lè w kontinye etidye Pawòl li a (Ebre 5:13, 14). Mande yon Temwen Jewova pou l etidye Labib avè w nan liv Ki sa Labib kapab anseye nou? an. Plis w ap aprann konn Pawòl Bondye a, se plis lavi w ap reyisi. — Li Sòm 1:1-3; 73:27, 28.

Se Jewova, Bondye ki gen kè kontan an, ki bay bon nouvèl la. Ou ka pwoche bò kote l lè w vin pi pwòch ak pèp li a (Ebre 10:24, 25). Si w kontinye fè efò pou w fè Jewova plezi, w ap gen lavi toutbon an, lavi pou toutan an. Vrèmanvre, pwoche bò kote Bondye se pi bon bagay ou ka fè. — Li 1 Timote 1:11; 6:19.