1, 2. Poukisa Bondye te rejte wa Sayil? (Gade foto ki nan kòmansman atik la.)

LÈ WA Sayil te kòmanse dirije nasyon Izrayèl tan lontan an, li te yon moun ki te konn limit li e moun te respekte l (1 Sam. 9:1, 2, 21; 10:20-24). Men, yon ti tan apre l vin wa, li te kòmanse fè yon seri aksyon ki montre li te pran dwa ki pa pou li. Lè Samyèl, pwofèt Bondye a, pa t rive Gilgal nan lè l te dwe rive a, Sayil te vin pèdi pasyans. Moun Filisti yo t ap prepare yo pou yo batay, e Izrayelit yo te kouri kite Sayil. Li dwe te di tèt li: ‘Fò m fè yon bagay, e fò m fè sa vit.’ Konsa, li te ofri Bondye yon sakrifis li pa t gen dwa fè. Sa pa t fè Jewova plezi. — 1 Sam. 13:5-9.

² Lè Samyèl rive Gilgal, li reprimande Sayil. Olye Sayil te aksepte koreksyon an, li te bay yon seri eskiz, li te eseye lage chay la sou do lòt moun, e l te minimize sa l te fè a (1 Sam. 13:10-14). Se te kòmansman yon seri evènman terib ki t apral rive youn apre lòt e ki t ap lakòz Sayil pèdi otorite l antanke wa, e sa k pi rèd la, sa t ap fè l pèdi favè Jewova (1 Sam. 15:22, 23).  Byenke Sayil te byen kòmanse, lavi l te fini mal anpil. — 1 Sam. 31:1-6.

3. a) Ki sa anpil moun panse sou kesyon pou moun konn limit yo a? b) Ki kesyon ki merite jwenn repons?

³ Jodi a, nan monn sa a ki chaje ak konpetisyon, anpil moun panse se yo ki dwe toujou devan. Pou yo rive fè sa, yo konn vag sou tout prensip ki gen rapò ak imilite. Pa egzanp, men sa yon aktè sinema anpil moun byen konnen e ki te vin yon politisyen annapre te di yon lè: “Kesyon pou moun konn limit yo a se pa yon bagay ki aplikab nan ka pa m nan okenn fason, e mwen espere sa pap janm rive.” Ebyen, ki rezon ki fè li toujou bon pou n konn limit nou? Sa sa vle di pou yon moun konn limit li, e ki sa sa pa vle di? Epi, ki jan n ka toujou ret nan limit nou menm lè n nan sitiyasyon difisil oswa lè lòt moun ap fè presyon sou nou? Nan atik sa a, nou pral reponn de premye kesyon yo, e nan atik ki vin apre a, nou pral reponn twazyèm kesyon an.

4. Ki lè w t ap di yon moun pran dwa ki pa pou li?

⁴ Bib la fè diferans ant moun ki konn limit yo ak moun ki pran dwa ki pa pou yo. (Li Pwovèb 11:2.) Avèk sajès, David te mande Jewova pou l pa “kite [l] fè sa li pa gen dwa fè”. (Sòm 19:13.) Ki lè yon moun fè “sa li pa gen dwa fè”? Se lè l aji san reflechi oubyen li fè espre fè yon bagay li pa gen otorizasyon fè. Piske nou eritye peche, nou tout konn pran dwa ki pa pou nou pafwa. Men, jan egzanp wa Sayil montre sa, si nou pran abitid pran dwa ki pa pou nou, towouta n ap gen gwo pwoblèm ak Bondye. Men sa Sòm 119:21 di konsènan Jewova: “Ou disipline moun ki pran dwa ki pa pou yo.” Ki rezon ki fè l fè sa?

5. Poukisa se yon bagay ki grav lè moun pran dwa ki pa pou yo?

⁵ Li pi grav lontan lè yon moun pran dwa ki pa pou li pase lè yon moun fè yon seri erè san l pa fè espre. Premyèman, lè nou aji yon fason ki montre nou pa konn limit nou, nou pa onore Jewova antanke Souvren ki gen dwa pou dirije nou an. Dezyèmman, lè nou fè plis pase sa nou gen dwa fè, nou ka vin gen pwoblèm ak lòt moun (Pwo. 13:10). Epi twazyèmman, lè sa parèt klè nou te pran dwa ki pa nou, nou ka vin santi n jennen oswa nou ka menm santi n wont (Lik 14:8, 9). Sa pa konn fini byen pou moun ki pran dwa ki pa pou yo. Jan Ekriti yo montre sa, li toujou pi bon pou n konn limit nou.

6, 7. Ki sa imilite ye, e ki rapò l genyen ak lè yon moun konn limit li?

⁶ Gen yon rapò sere ant moun ki konn limit yo ak moun ki gen imilite. Nan Bib la, mo imilite a fè referans ak moun ki pa gen ògèy oswa ki pa awogan (Flp. 2:3). An jeneral, yon moun ki gen imilite se yon moun ki konn limit li tou, li kapab evalye kapasite l ak sa l ka reyalize yon fason ki egzak, li kapab rekonèt erè l, e li kapab aksepte konsèy ak ide lòt moun ba l. Lè yon moun gen imilite, sa fè Jewova kontan anpil.

⁷ Nan Bib la, yon moun ki konn limit li se yon moun ki gen yon pwennvi kòrèk sou tèt li e ki byen konnen sa l ka fè ak sa l pa ka fè. Nan tèks orijinal la, sanble yo met aksan sou efè konesans sa a ta dwe genyen sou fason nou aji ak lòt moun.

8. Bay kèk siy ki fè n wè fason nou panse oswa aji montre nou pa konn limit nou.

⁸ Ki lè nou ka kòmanse panse oswa aji yon fason ki montre nou pa konn limit nou? Ann konsidere kèk siy k ap fè n wè sa. Nou ka bay tèt nou oswa privilèj nou genyen  twòp enpòtans (Wom. 12:16). Nou ka ap atire atansyon sou nou yon seri fason ki pa kòrèk (1 Tim. 2:9, 10). Oubyen nou ka ap baze senpleman sou pozisyon nou, relasyon nou, oswa refleksyon pèsonèl nou pou n soutni yon seri ide ak tout fòs (1 Kor. 4:6). Byen souvan, lè nou aji konsa, nou ka pa menm rann nou kont nou kite limit nou pou n pran dwa ki pa pou nou.

9. Ki sa k fè kèk moun konn vin pran dwa ki pa pou yo? Bay yon egzanp nan Bib la.

⁹ Nenpòt moun ka aji yon fason ki montre l pa konn limit li si l kite dezi lachè anvayi l menmsi se pou yon ti tan. Anbisyon egoyis, anvi ak kòlè san kontwòl lakòz anpil moun pran dwa ki pa pou yo. Gen yon seri moun Bib la pale de yo tankou Absalon, Ozyas ak Nebikadneza ki te lage kò yo nan “zèv lachè” sa yo e Jewova te rabese yo paske yo te pran dwa ki pa pou yo. — 2 Sam. 15:1-6; 18:9-17; 2 Kwo. 26:16-21; Dàn. 5:18-21.

10. Poukisa nou dwe evite jije lòt moun sou sa yo di oswa sa yo fè? Bay yon egzanp nan Bib la.

¹⁰ Gen lòt rezon ankò ki ka fè yon moun aji yon fason ki montre l pa konn limit li. Pa egzanp, ann konsidere istwa biblik ki vin annapre yo: Jenèz 20:2-7 ak Matye 26:31-35. Èske se dezi lachè ki te pouse Abimelèk ak Pyè aji yon fason ki sanble yo te pran dwa ki pa t pou yo? Oubyen èske se paske moun sa yo te jis pa t gen tout enfòmasyon yo oswa èske se paske yo te aji san reflechi? Piske nou pa ka li kè moun, n ap montre nou saj e nou gen lanmou lè n pa kouri jije lòt moun sou sa yo di oswa sa yo fè. — Li Jak 4:12.

11. Nan ki sans yon moun ki konn limit li se yon moun ki rekonèt wòl li jwe nan dispozisyon Bondye pran yo?

¹¹ Vrèmanvre, pou yon moun konn limit li li bezwen kòmanse rekonèt wòl li jwe nan dispozisyon Bondye pran yo. Antanke yon Bondye ki gen lòd, Jewova bay nou chak yon plas oswa yon travay pou nou fè nan kay li a. Chak moun gen wòl pa l nan kongregasyon an, men, nou tout gen enpòtans. Nan favè san parèy li, Jewova bay nou chak yon seri don, resous, kapasite oswa talan. Nou kapab itilize yo pou nou ba l glwa e pou n ede lòt moun (Wom. 12:4-8). Jewova konfye nou chak yon sèvis ki fè n jwenn onè, ki fè moun fè n konfyans, e ki ban nou responsablite. — Li 1 Pyè 4:10.

12, 13. Poukisa nou pa dwe sezi si wòl nou jwe nan dispozisyon Bondye pran yo chanje detanzantan?

¹² Sepandan, wòl nou jwe nan dispozisyon Bondye pran yo se pa yon wòl ki fiks. Li kapab chanje detanzantan. Ann pran egzanp Jezi. Okòmansman, li te poukont li ak Jewova (Pwo. 8:22). Apre sa, li te ede Jewova fè lòt kreyati espirityèl yo, linivè a, e finalman, lèzòm (Kol. 1:16). Annapre, Jezi te vin gen yon nouvo wòl sou tè a, toudabò, li te yon tibebe san defans, ansuit, li te vin yon adilt (Flp. 2:7). Apre Jezi fin bay lavi l kòm sakrifis, li te retounen nan syèl la antanke yon espri pou l vin Wa nan Wayòm Bondye a an 1914 (Ebre 2:9). Epi, se pa dènye fwa l ap gen pou l chanje asiyasyon. Apre rèy mil an Jezi a, Jezi ap remèt Jewova Wayòm nan yon fason pou “Bondye ka tout bagay pou tout moun”. — 1 Kor. 15:28.

¹³ Menm jan an tou, nou kapab atann asiyasyon nou ap chanje detanzantan, e byen souvan, akoz desizyon nou pran yo. Pa egzanp, èske w te selibatè, men apre w vin marye? Èske w ap leve timoun? Nan dènye ane ki pase yo, èske w te senplifye lavi w pou w antre nan sèvis aplentan? Chak desizyon sa yo te mache ak yon seri privilèj ak responsablite. Lè  sitiyasyon n chanje, sa kapab fè n vin nan pozisyon pou n fè plis oswa pou n fè mwens. Èske w jèn oswa èske w gen yon bon ti laj? Èske w an sante oswa èske w pa viv sante? Jewova toujou gade ki pi bon fason li ka itilize nou chak nan sèvis li. Se sèlman sa ki rezonab li vle nou fè, e li vrèman apresye tout sa nou fè. — Ebre 6:10.

14. Ki jan lè n konn limit nou sa ban nou satisfaksyon e sa ede n kenbe jwa nou nan nenpòt sitiyasyon?

¹⁴ Jezi te gen kè kontan nan kèlkeswa asiyasyon l te genyen, e nou kapab gen kè kontan nan asiyasyon nou yo tou (Pwo. 8:30, 31). Yon moun ki konn limit li pap santi l bloke akoz asiyasyon oswa responsablite li gen nan kongregasyon an. Li pap bay tèt li pwoblèm pou l jwenn yon seri privilèj alavni oswa pou sa lòt moun ap reyalize. Okontrè, li konsantre enèji l nan chèche konprann wòl li e li chèche jwenn satisfaksyon ladan l paske l konsidere se Jewova ki ba li l. Anmenmtan tou, avèk senserite, li respekte wòl oswa plas Jewova bay lòt moun. Lè nou konn limit nou, sa fè n kontan bay lòt moun onè ak sipò yo merite. — Wom. 12:10.

15. Ki sa nou ka aprann nan egzanp Jedeyon antanke moun ki te konn limit li?

¹⁵ Jedeyon se yon bèl egzanp antanke moun ki te konn limit li. Lè yon zanj Jewova te parèt devan Jedeyon pou premye fwa, byen vit, Jedeyon te rekonèt li pa t sot nan gran fanmi e li pa t fè anyen  ki estrawòdinè (Jij 6:15). Apre Jedeyon te fin aksepte asiyasyon Jewova te ba l la, li te asire l li byen konprann sa yo te mande l fè a, e l te chèche direksyon nan men Jewova (Jij 6:36-40). Jedeyon te gen kran ak kouraj. Aktout sa, li te aji ak prekosyon e l te pridan (Jij 6:11, 27). Li pa t pwofite responsablite Bondye te ba l la pou l chèche vin yon moun enpòtan. Okontrè, kou sa te posib, li te kontan retounen nan plas li. — Jij 8:22, 23, 29.

16, 17. Ki sa yon moun ki konn limit li pran an konsiderasyon lè l ap reflechi sou pwogrè espirityèl li bezwen fè?

¹⁶ Lè yon moun konn limit li, sa pa vle di li pa dwe janm chèche gen privilèj oubyen aksepte lòt privilèj. Labib ankouraje nou tout pou nou fè pwogrè (1 Tim. 4:13-15). Èske sa toujou mande pou n chanje asiyasyon? Pa vrèman. Grasa benediksyon Jewova, nou kapab fè pwogrè espirityèl kèlkeswa wòl nou genyen kounye a. Nou kapab kontinye devlope kapasite Bondye ban nou yo epi pwogrese nan fè bon travay.

¹⁷ Anvan yon moun ki konn limit li aksepte yon nouvo responsablite, toudabò, l ap chèche konnen ki sa l ap gen pou l fè. Konsa, li kapab byen egzamine sitiyasyon l. Pa egzanp, èske l ap kapab aksepte plis travay oswa responsablite san l pa neglije lòt bagay ki enpòtan yo? Èske l ka delege kèk nan travay li gen kounye a pou l ka gen plis tan pou nouvo responsablite a? Si repons pou youn oswa toule de kesyon sa yo se non, petèt gen yon lòt moun ki plis kapab aksepte responsablite sa a kounye a. Lè n priye e nou byen analize sitiyasyon nou, sa ap ede n evite aksepte privilèj ki depase kapasite nou oswa limit nou. Si n konn limit nou, nou gendwa pa aksepte responsablite sa a.

18. a) Lè nou konn limit nou, ki sa sa ap pouse nou fè lè nou gen yon nouvo privilèj oswa responsablite? b) Ki rapò Women 12:3 genyen ak yon moun ki konn limit li?

¹⁸ Lè n aksepte yon nouvo privilèj, egzanp Jedeyon ap fè n sonje nou pa kapab reyisi san direksyon Jewova ak benediksyon l. Dayè, nou resevwa envitasyon pou nou “mache avèk Bondye [nou an], e pou [n] fè sa avèk imilite”. (Miche 6:8.) Se sa k fè, nenpòt lè nou gen yon nouvo responsablite, nou bezwen byen reflechi sou tout sa Jewova di nou pa mwayen Pawòl li a ak òganizasyon l lan. Nou dwe aprann veye sou fason n ap mache pou n ka suiv bonjan direksyon Jewova ap ban nou. Se pou n sonje se imilite Jewova ki ‘fè n vin enpòtan’, se pa pwòp kapasite nou (Sòm 18:35). Lè n chwazi mache ak Bondye avèk imilite, sa ap ede n pou n pa panse de tèt nou plis pase sa n dwe panse, oubyen pou n pa rabese tèt nou. — Li Women 12:3.

19. Pou ki rezon nou dwe aprann konn limit nou?

¹⁹ Yon moun ki konn limit li bay Jewova onè li merite, piske se Jewova ki Kreyatè nou e se li ki Souvren linivè a (Rev. 4:11). Lè n konn limit nou, sa ede n satisfè ak wòl nou genyen nan dispozisyon Bondye pran yo, e sa fè n bay bon rezilta. Lè nou konn limit nou, sa anpeche n aji yon fason ki rale lawont sou nou, e sa fè gen inite nan mitan pèp Jewova a. Lè nou konn limit nou, sa fè n konsidere lòt moun siperyè nou, sa ankouraje nou pou n montre nou pridan, konsa, nou evite fè erè grav. Pou rezon sa yo, pèp Bondye a bay kesyon konn limit la anpil enpòtans, e Jewova bay moun ki konn limit yo anpil valè. Men, e lè nou jwenn eprèv? Atik ki vin apre a pral montre nou fason pou n kontinye rekonèt limit nou lè n nan sitiyasyon ki bay strès.