Egoyis ka fè moun gen prejije. Yon moun ki egoyis gen yon pwennvi ki egzajere sou valè l. Li wè tèt li kòm moun ki pi enpòtan e li jije lòt moun ki pa menm avè l kòm moun ki pi ba. Nenpòt moun ka kòmanse ap panse konsa. Men sa yon ansiklopedi di: “Nan pifò [kilti], byenke sa pa nan menm nivo tout kote, moun yo santi fason yo viv, manje yo, rad yo mete, abitid yo, kwayans yo, prensip yo ak lòt bagay ankò gen plis enpòtans pase pa lòt gwoup moun yo.” ​(Encyclopædia Britannica). Ki jan nou ka evite move pwennvi sa a?

“Avèk imilite, konsidere lòt moun yo siperyè nou.” — FILIPYEN 2:3.

Sa sa vle di? Pou n evite twò fyè de tèt nou, nou bezwen chèche gen imilite, ki kont ògèy. Lè nou gen imilite, n ap rive wè lòt moun pi bon pase nou nan kèk domèn. Pa gen yon ras ki gen tout bèl kalite ak kapasite yo nèt.

Ann pran egzanp Stefan. Li te grandi nan yon peyi kominis, men li te elimine prejije li te genyen sou moun ki pa soti nan peyi kominis menm jan avè l. Li di: “Mwen kwè lè n konsidere  lòt moun pi enpòtan pase n, sa bon pou ede n elimine prejije. Mwen pa konn tout bagay. Mwen ka aprann yon bagay nan men chak moun.”

Eseye gen yon pwennvi rezonab sou tèt ou e toujou admèt ou konn fè erè. Rekonèt lòt moun kapab fè kèk bagay pi byen pase w. Ou pa dwe panse tout moun nan yon gwoup gen menm defo.

Olye w gen panse negatif sou yon moun ki soti nan yon lòt gwoup moun, mande tèt ou:

• ‘Èske tanperaman moun sa a pa bon vre, oubyen tanperaman l jis pa menm ak pa m?’

• ‘Èske moun sa a ka wè erè pa m?’

• ‘Nan ki domèn moun sa a gen plis kapasite pase m?’

Si w reponn kesyon sa yo onètman, ou ka pa sèlman elimine prejije w gen lakay ou, men tou, ou ka jwenn bagay ou apresye lakay moun nan.