“REKÒT la anpil, men pa gen anpil travayè. Kidonk, priye Mèt rekòt la pou l voye travayè nan rekòt li a.” (Lik 10:2). Pawòl sa yo Jezi te di sa gen anviwon 2 000 an byen dekri sitiyasyon ki egziste nan peyi Myanma jodi a. Poukisa? Nan peyi Myanma, se sèlman anviwon 4 200 pwoklamatè k ap preche 55 milyon moun bon nouvèl la.

Sepandan, “Mèt rekòt la”, anpalan de Jewova, te touche kè plizyè santèn frè ak sè ki soti nan plizyè peyi, e yo te vin nan peyi sa a ki ann Azi sidès pou yo vin ede nan travay rekòt espirityèl la. Ki sa k te pouse yo kite peyi yo? Ki fason yo te jwenn èd pou yo fè vwayaj la? E ki benediksyon yo jwenn? Ann kite yo esplike n.

Sa gen kèk ane, Kazuhiro, yon pyonye nan peyi Japon, te fè yon kriz malkadi, li te pèdi konesans e yo te mennen l lopital. Doktè te di l pou l pa kondui pandan dezan. Sa te bay Kazuhiro anpil pwoblèm. Men sa l te mande tèt li: ‘Ki jan m pral ka kontinye nan sèvis pyonye a, yon sèvis mwen renmen?’ Li te priye Jewova ak tout kè l, li te sipliye l pou l ouvri yon chemen pou li pou l ka kontinye sèvi kòm pyonye.

Men sa Kazuhiro fè konnen: “Yon mwa annapre, gen yon zanmi m k ap sèvi nan peyi Myanma ki te aprann pwoblèm mwen. Li te rele m e l te di m: ‘Nan peyi Myanma, se bis ki plis genyen kòm mwayen transpò. Si w vin isit la, w ap ka kontinye nan sèvis la san w pa bezwen gen machin!’ M te mande doktè m nan si sante m ap pèmèt mwen al nan peyi Myanma. M te sezi lè doktè a te di m: ‘Gen yon espesyalis nan kesyon sèvo ki sot nan peyi Myanma k ap vizite Japon kounye a. M ap fè w wè avè l. Si w ta vin gen yon lòt kriz ankò, li ka pran swen w.’ M te konsidere sa doktè a di m nan kòm yon repons Jewova te ban m.”

San pèdi tan, Kazuhiro te voye yon imel bay biwo filyal peyi Myanma a e l te fè yo konnen li menm ak madanm li ta renmen vin sèvi kòm pyonye nan peyi sa a. Sèlman senk jou apre sa, filyal la te reponn yo e l te di yo: “Vini, nou bezwen plis pyonye!” Kazuhiro ak madanm li, Mari, te vann machin yo te genyen yo, yo te jwenn viza e yo te achte tikè avyon yo. Jodi a, y ap sèvi ak kè kontan nan yon gwoup lang siy nan Mandalay. Men sa Kazuhiro di: “Grasa eksperyans sa a, nou santi n vin gen plis lafwa nan pwomès Bondye fè nou jwenn nan Sòm 37:5 lan ki  di: ‘Kite Jewova dirije wout ou. Met konfyans ou nan li e li menm l ap ede w.’”

An 2014, Temwen Jewova nan peyi Myanma yo te gen privilèj pou yo òganize yon kongrè espesyal. Gen anpil delege ki te sot nan lòt peyi pou vin asiste evènman sa a. Men sa youn nan delege sa yo ki rele Monique, yon sè ki gen 34 an e ki sot Ozetazini, fè konnen: “Apre m te fin sot nan kongrè a, m te priye Jewova konsènan pwochen etap m te dwe franchi nan lavi m. Anplis de sa, m te pale ak paran m konsènan objektif espirityèl mwen yo. Nou tout te panse m ta dwe retounen Myanma, men, sa te pran kèk tan ak anpil priyè anvan m te rive pran dènye desizyon an.” Monique esplike rezon an.

“Jezi te ankouraje disip li yo pou yo ‘kalkile konbyen sa ap koute’. Donk, m te mande tèt mwen: ‘Èske m ap jwenn kòb pou m fè deplasman sa a? Èske m ap ka pran swen tèt mwen nan peyi sa a san m pa fè anpil tan ap travay?’” Men sa l admèt: “Byen vit, m te vin rann mwen kont m pa t gen ase lajan pou m deplase al nan yon lòt pati nan monn nan.” Nan ka sa a, ki sa k te ede l fè deplasman sa a? — Lik 14:28.

Men sa Monique fè konnen: “Yon jou, dam ki patwon m nan te di l bezwen m. M te yon ti jan pè paske m te panse l t apral revoke m. Men, olye de sa, li te remèsye m pou bon travay mwen fè. Apre sa, li te di m li pran dispozisyon pou l fè m jwenn yon bonis, ki se egzakteman kantite kòb mwen te bezwen pou m peye dèt mwen te genyen yo!”

Monique ap sèvi nan peyi Myanma depi desanm 2014. Ki jan l konsidere sèvis li antanke moun ki vin sèvi kote ki gen plis bezwen? Men sa l di: “M kontan anpil dèske m isit la. Mwen gen twa etid biblik. Youn nan etidyan m yo gen 67 an. Li toujou salye m ak yon souri e l ban m yon gwo akolad. Lè l te aprann non Bondye se Jewova, li te pran kriye. Li te di: ‘Se premye fwa nan lavi m mwen tande non Bondye se Jewova. Ou pi jèn pase m lontan, men, ou aprann mwen bagay ki pi enpòtan an, yon bagay m pa t janm aprann.’ M pa menm bezwen di jan mwen menm tou m te pran kriye. Kalite eksperyans sa yo fè moun k al sèvi kote ki gen plis bezwen yo jwenn anpil satisfaksyon nan lavi yo.” Sa pa gen twò lontan, Monique te gen privilèj pou l asiste Lekòl pou evanjelizatè Wayòm nan.

Yon lòt bagay ki te chofe kèk moun pou y al sèvi nan peyi Myanma se istwa yo rakonte sou peyi sa a nan Liv aktivite Temwen Jewova yo — 2013. Li, yon sè ki gen plis pase 30 an, te deja ap viv ann Azi sidès. Li t ap travay aplentan, men, istwa ki nan Liv aktivite a te pouse l reflechi pou l wè si l ka al sèvi nan peyi Myanma. Men sa l di: “An 2014, lè m te asiste kongrè espesyal yo te fè nan vil Yangon an, m te fè konesans ak yon mari ak madanm li k ap sèvi kote ki gen plis bezwen nan lang chinwa nan peyi Myanma. Piske m pale chinwa, m te deside al nan peyi Myanma pou m ede gwoup chinwa ki nan peyi sa a. M te pran kontak ak Monique, e m te deplase al Mandalay. Jewova te beni nou lè l te pèmèt nou toule de jwenn yon djòb amitan kòm pwofesè nan menm lekòl la, e n te jwenn yon apatman ki toupre a. Malgre l fè cho anpil e m jwenn kèk ti pwoblèm, m renmen travay m ap fè isit la. Moun nan peyi Myanma yo ap viv yon fason senp, men, yo janti e yo dispoze pran tan pou yo koute bon nouvèl la. Sa vrèman enteresan pou m wè jan Jewova ap akselere travay la. Mwen gen konviksyon se volonte Jewova pou m te vin sèvi isit la nan Mandalay.”

Gen anpil moun k al sèvi kote ki gen plis bezwen ki rive wè pouvwa lapriyè genyen. Ann pran egzanp Jumpei ak madanm li, Nao, yo toule de nan mitan trantèn yo. Yo te deja ap sèvi nan yon kongregasyon  lang siy nan peyi Japon. Poukisa yo te deplase al nan peyi Myanma? Men sa Jumpei di: “Madanm mwen avè m te toujou gen objektif pou n al sèvi kote ki gen plis bezwen nan yon peyi etranje. Gen yon frè nan kongregasyon lang siy kote nou ye nan peyi Japon an ki t al nan peyi Myanma. Aktout se sèlman yon tikras lajan nou te gen sere, nou menm tou nou t al nan peyi sa a an me 2010. Frè ak sè nan peyi Myanma yo te byen akeyi nou!” Ki santiman l genyen konsènan travay predikasyon nan lang siy nan peyi Myanma? Men sa l di: “Moun yo enterese anpil. Lè n montre moun soud yo videyo lang siy yo, yo sezi. Nou vrèman kontan dèske n te pran desizyon pou n vin sèvi Jewova isit la!”

Ki jan Jumpei ak Nao te rive jwenn lajan pou yo viv? Men sa Jumpei di: “Apre twazan, nou te gentan depanse pifò nan ti kòd nou te genyen an e n pa gen ase kòb pou n peye kay pou lòt ane. Madanm mwen avè m te priye Jewova anpil. San n pa t menm atann sa, nou te resevwa yon lèt biwo filyal la te voye kote yo te mande n sèvi kòm pyonye espesyal tanporè! Nou te met konfyans nou nan Jewova e n te wè li pa t abandone nou. Li te pran swen nou nan tout domèn.” Sa pa gen twò lontan, Jumpei ak Nao te asiste Lekòl pou evanjelizatè Wayòm nan tou.

Ki sa k te pouse Simone, yon frè ki gen 43 an e ki se moun peyi Itali, ansanm ak madanm li, Anna, yon sè ki gen 37 an e ki se moun peyi Nouvèl Zelann, pou yo vin sèvi nan peyi Myanma? Men sa Anna di: “Se istwa yo rakonte sou Myanma nan liv Aktivite 2013 la!” Men sa Simone di: “Se yon gwo privilèj pou n isit la nan Myanma. Bò isit la, lavi a senp anpil, e m ka pase plis tan nan sèvis Jewova a. Sa vrèman enteresan pou n wè jan Jewova pran swen nou lè n ap sèvi nan yon zòn ki gen anpil bezwen.” (Sòm 121:5). Men sa Anna di: “Kè m pa t janm kontan konsa. N ap viv yon fason senp. M pase plis tan ak mari m e nou vin pi pwòch youn ak lòt. Mete sou sa, nou vin gen lòt bon zanmi. Moun yo pa gen prejije kont Temwen yo, e moun yo nan tèritwa a vrèman enterese!” Nan ki sans?

Men sa Anna fè konnen: “Yon jou, pandan m te nan mache a, m te preche yon moun k ap etidye nan inivèsite, e m te pran randevou avè l pou n rewè ankò. Lè n te wè ankò, li te vin ak yon zanmi l. Nan lòt randevou a, li te vin ak plis zanmi. Annapre, li te vin ak plis zanmi toujou. Kounye a, m ap etidye Labib ak senk nan yo.” Men sa Simone di: “Moun nan tèritwa a amikal anpil e yo vle konn plis. Gen anpil nan yo ki enterese. Nou jis pa gen ase tan pou n pran swen tout moun sa yo ki enterese.”

Men, ki sa n ka di konsènan etap yon moun dwe suiv lè l ap pran desizyon pou l vin nan peyi Myanma? Men sa Mizuho ki sot nan peyi Japon fè konnen: “Mwen menm ak mari m, Sachio, te toujou vle al sèvi nan yon peyi ki gen anpil bezwen, men, nan ki peyi menm? Apre n te fi n li istwa yo rakonte sou  peyi Myanma nan liv Aktive 2013 la, bèl eksperyans yo rakonte yo te tèlman touche kè n, nou te kòmanse reflechi pou n wè si l t ap posib pou n al sèvi nan peyi Myanma.” Men sa Sachio ajoute: “Nou te deside fè yon vizit gide pandan yon semèn nan vil Yangon ki se pi gwo vil nan peyi Myanma, yon fason pou n ka wè ki jan peyi a ye. Ti vwayaj tou kout sa a nou te fè pou n jwenn enfòmasyon te konvenk nou pou n vin isit la.”

Rodney ak madanm li, Jane, sot nan peyi Ostrali, e yo toude nan senkantèn yo. Yo menm ak pitit gason yo a Jordan ansanm ak pitit fi yo a Danica ap sèvi nan peyi Myanma depi 2010. Men sa Rodney di: “Sa te touche n anpil pou n wè jan moun yo grangou nan domèn espirityèl. Se sèten, m ta renmen ankouraje lòt fanmi pou yo eseye al sèvi yon kote tankou Myanma.” Poukisa? “Sa fanmi nou jwenn nan domèn espirityèl grasa deplasman sa a gen anpil valè! Gen anpil jèn ki ret konsantre sou telefòn yo, machin yo, travay yo, elatriye. Timoun nou yo okipe anpil nan aprann nouvo mo pou yo itilize nan travay predikasyon an. Yo eseye aprann ki jan pou yo rezone ak moun ki pa abitye ak Bib la ak fason pou yo fè kòmantè nan reyinyon kongregasyon an, e yo ret konsantre sou anpil lòt bèl aktivite espirityèl.”

Men sa Oliver, yon frè ki prèske gen 40 an e ki sot nan peyi Etazini, di pou l esplike rezon ki fè l ankouraje moun antre nan kalite sèvis sa a: “Piske m al sèvi Jewova nan yon zòn kote m pa abitye, sa fè m jwenn anpil benediksyon. Lefètke m deplase kite lakay mwen, sa ede m fè Jewova konfyans nan kèlkeswa sitiyasyon m ye. Piske m ap sèvi ak moun m pa t konnen anvan sa men ki gen menm kwayans avè m, sa vrèman ede m wè pa gen anyen nan monn sa a ki ka konpare ak enpòtans Wayòm nan genyen.” Jodi a, Oliver ak madanm li, Anna, kontinye ap sèvi ak tout kè yo nan yon tèritwa kote moun yo pale chinwa.

Trazel, yon sè ki gen 52 an e ki sot nan peyi Ostrali, ap sèvi nan peyi Myanma depi 2004. Men sa l di: “M ap ankouraje tout moun sitiyasyon yo pèmèt yo pou y al sèvi yon kote ki gen anpil bezwen. M rann mwen kont si w gen volonte pou w sèvi, Jewova ap beni efò w fè yo. M pa t panse m t ap ka mennen yon vi konsa. Se pi gwo benediksyon ak pi gwo satisfaksyon m te ka jwenn nan lavi m.”

Nou swete pou pawòl sensè sa yo moun k ap sèvi kote ki gen plis bezwen nan peyi Myanma yo di yo pouse w reflechi ak tout kè w pou w wè si w ka al ede moun nan tèritwa ki poko preche yo. Wi, moun k ap sèvi kote ki gen plis bezwen yo ap rele w, yo di w: “Tanpri, vin Myanma pou w ede nou!”