Jewova envite nou pou n pale avè l konsènan kèlkeswa chay k ap twouble lespri nou ak kè nou (Sòm 55:22). Pa gen pwoblèm ki twò gwo oswa ki twò piti pou n priye pou li. Si sa enpòtan pou nou, li enpòtan pou Jewova. Lapriyè se yon etap enpòtan pou ede nou gen lapè lespri nou. — Filipyen 4:6, 7.

Lè n ap goumen ak sante mantal nou, nou ka santi nou poukont nou nèt. Lòt moun pa toujou konprann tout sa n ap pase yo (Pwovèb 14:10). Men, lè nou di Bondye sa nou santi ak tout kè nou nan lapriyè, n ap jwenn yon moun ki ka mete l nan plas nou e ki konprann nou. Jewova wè nou, li konnen doulè nou ak difikilte n ap andire, e li vle nou priye l pou kèlkeswa bagay k ap enkyete nou an. — 2 Kwonik 6:29, 30.

Lè nou pale ak Jewova nan lapriyè sa ranfòse konviksyon nou genyen Bondye gen sousi pou nou. Nou ka santi n menm jan ak youn nan moun ki te ekri Sòm yo ki te priye konsa: “Ou wè soufrans mwen yo. Ou konnen jan m nan gwo pwoblèm.” ​(Sòm 31:7). Lefètke nou konnen Jewova sansib devan sa n ap andire yo, sa sèlman ka ede nou avanse nan moman difisil yo. Men, li fè plis pase jis wè kalamite nou yo. Plis pase nenpòt lòt moun, li konprann sa n ap andire yo e l ede nou jwenn rekonfò ak ankourajman nan Bib la.