Èske w ka sèvi kote ki bezwen plis pwoklamatè Wayòm nan ?

“ Nou t ap mennen yon vi ki konfòtab Ozetazini, men nou pa t vle pou lespri materyalis ki gen nan peyi sa a vin gen yon move enfliyans sou nou e sou de pitit gason nou yo. Anvan sa, mwen menm ak madanm mwen te misyonè, e nou te vle retounen viv tankou misyonè ankò, sètadi yon fason ki senp, men ki bay kè kontan. ”

SE DEZI sa a Ralph ak Pam te genyen ki te motive yo pou yo ekri kèk filyal an 1991 pou fè yo konnen yo ta renmen sèvi kote ki bezwen plis pwoklamatè Wayòm nan. Filyal Meksik la te fè yo konnen yo vrèman bezwen pwoklamatè pou preche moun ki pale anglè nan peyi a. Anfèt, filyal la te fè yo konnen nan tèritwa sa a ‘ grenn yo fin mi e yo tou bon pou yo ranmase yo ’. (Jan 4:35.) San pèdi tan, Ralph ak Pam ak de pitit gason yo, ki te gen 8 an ak 12 an lè sa a, te aksepte envitasyon an, e yo te kòmanse prepare yo pou yo deplase.

Yon tèritwa ki gran anpil

Men sa Ralph rakonte : “ Anvan nou te kite Etazini, te gen kèk frè ak sè ki te gen bon entansyon ki te di nou : ‘ Li twò danjere pou nou deplase al viv aletranje. ’ ‘ E si nou vin malad ? ’ ‘ Poukisa nou oblije deplase pou n al preche moun ki pale anglè ? Moun ki pale anglè lòtbò a pap enterese nan laverite. ’ Men, nou te deja pran desizyon nou. Anplis, desizyon sa a se pa t yon desizyon nou te pran sou kout tèt. Nou te pase plizyè ane ap prepare nou pou sa. Nou te evite fè dèt ki t ap mande anpil tan pou nou peye yo. Nou te fè ekonomi, e souvan nou te konn chita pale an fanmi sou difikilte nou ka jwenn. ”

Toudabò, Ralph ak fanmi l t al nan filyal Meksik la. Lè yo rive, frè yo te montre yo yon kat peyi a e yo te di yo : “ Men tèritwa nou ! ” Fanmi an te deside abite nan vil San Miguel de Allende, yon vil ki a anviwon 240 kilomèt parapò ak vil Meksiko, nan direksyon nòdwès, e ki gen anpil etranje k ap viv ladan l. Twazan apre yo fin rive, gen yon kongregasyon anglè ki te fòme nan vil sa a ki te gen 19 pwoklamatè. Se te premye kongregasyon anglè nan peyi Meksik, men te gen plis travay ki pou fèt toujou.

Yo estime gen anviwon yon milyon sitwayen ameriken k ap viv o Meksik. Anplis, gen anpil pwofesyonèl ak etidyan meksiken ki pale anglè kòm yon dezyèm lang. Men sa Ralph di : “ Nou te priye pou gen plis moun nan travay la. Nou te toujou kite yon chanm  disponib lakay nou pou frè ak sè ki te vle vin ‘ wè ki jan peyi a ye ’. ” — Nonb 13:2.

Yo te senplifye lavi yo pou yo ka fè plis nan ministè a

Anvan lontan, te vin gen plis frè ak sè ki te vle fè plis nan ministè a ki te vini. Pami yo, te gen Bill ak Kathy ki te sot Ozetazini. Yo te deja pase 25 an ap sèvi kote ki bezwen plis pwoklamatè Wayòm nan. Yo te panse yo te bezwen aprann pale espayòl, men yo te chanje lide lè yo te demenaje al viv nan vil Ajijic, ki arebò lak Chapala, yon vil kote anpil ameriken ki pran retrèt yo renmen al abite. Men sa Bill fè konnen : “ Nan vil Ajijic, nou te konsantre plis sou chèche moun ki pale anglè ki te vle konnen laverite. ” Dezan apre yo te rive nan vil sa a, Bill ak Kathy te byen kontan wè yon nouvo kongregasyon vin fòme. Se te dezyèm kongregasyon anglè nan peyi Meksik.

Ken ak Joanne ki sot Kanada te vle senplifye lavi yo e yo te vle pase plis tan nan predikasyon. Yo menm tou yo t al viv o Meksik ansanm ak pitit fi yo a ki rele Britanny. Men sa Ken di : “ Sa te pran tan pou nou aprann viv yon kote nou ka pase plizyè jou san dlo cho, san kouran oubyen san telefòn. ” Sepandan, travay predikasyon an te ban nou anpil kè kontan. Nan yon ti tan, Ken te vin asistan ministeryèl e dezan apre sa, li te vin ansyen. Okòmansman, li te difisil pou Britanny entegre l nan ti kongregasyon anglè a paske pa t gen anpil jèn ladan l. Men, lè li te kòmanse patisipe nan konstriksyon Sal Wayòm ki t ap fèt, li te vin gen anpil bon zanmi nan tout peyi a.

Patrick ak Roxanne ki soti Tegzas, Ozetazini, te kontan anpil lè yo te aprann gen yon tèritwa ki pa t lwen yo ki te bezwen plis pwoklamatè, kote gen moun ki pale anglè. Men sa Patrick di : “ Apre nou te fin vizite Monterrey, yon vil ki nan nòdès peyi Meksik, nou te santi Jewova t ap dirije nou pou nou bay koutmen pa nou nan vil sa a. ” Nan senk jou, yo te rive vann kay yo te genyen Tegzas la. E apre sa yo t al peyi Meksik, menm jan Pòl te janbe “ nan peyi Masedouàn ”. (Tra. 16:9.) Sa pa t fasil pou yo jwenn mwayen pou yo viv o Meksik, men apre dezan sèlman, yo te kontan wè yon ti gwoup ki te gen 17 Temwen ladan l grandi pou l tounen yon kongregasyon ki gen 40 pwoklamatè.

Jeff ak Deb te senplifye lavi yo tou pou yo fè plis nan ministè a. Yo te gen yon gwo kay Ozetazini. Yo te vann li e yo t al viv nan yon ti apatman ki nan Cancún, yon vil ki sou kot lès peyi Meksik. Anvan sa, yo te abitye asiste asanble nan lokal ki pa lwen lakay yo, ki klimatize e ki konfòtab. Kounye a, yo pase uit èdtan nan wout pou yo asiste kongrè ki pi pre yo a ki fèt ann anglè e ki fèt nan yon estad ki pa kouvri. Men yo te gen anpil satisfaksyon lefètke yo te wè yon kongregasyon ki gen 50 pwoklamatè fòme nan Cancún.

Gen kèk frè ak sè meksiken tou ki te kòmanse bay koutmen pa yo nan travay predikasyon ki t ap fèt ann anglè a. Pa egzanp, lè  Rubén ak fanmi l te tande premye kongregasyon anglè a te fòme nan San Miguel de Allende, e se tout Meksik ki te tèritwa kongregasyon sa a, san pran tan, yo te deside pou yo pote èd pa yo. Sa te mande pou yo aprann pale anglè, pou yo vin abitye ak yon lòt kilti e pou yo pakouri 800 kilomèt chak semèn, pou yo asiste reyinyon yo. Men sa Rubén fè konnen : “ Nou te kontan pale ak moun ki te sot nan lòt peyi, ki te gen plizyè ane depi y ap viv Meksik, men ki te tande bon nouvèl la nan lang pa yo pou premye fwa. Gen nan yo ki te gen dlo nan je lè yo t ap fè nou konnen jan yo te apresye vini nou te vin preche yo a. ” Apre Rubén ak fanmi l te fin ede kongregasyon ki nan San Miguel de Allende a, yo t al sèvi kòm pyonye nan vil Guanajuato, ki nan mitan peyi Meksik. Nan vil sa a, yo te bay koutmen pa yo pou fòme yon kongregasyon anglè ki gen plis pase 30 pwoklamatè. Jodi a, y ap sèvi nan yon gwoup anglè ki nan vil Irapuato, toupre vil Guanajuato.

Yo rive pale ak moun lòt pwoklamatè yo pa jwenn fasil

Nonsèlman gen etranje k ap viv nan peyi a ki pale anglè, men gen anpil Meksiken ki pale anglè tou. Byen souvan, li difisil pou pwoklamatè yo pataje mesaj Wayòm nan avèk yo paske y ap viv nan katye rich kote se sèvant ki vin ouvri pòt yo. Menm lè se mèt kay yo ki vin ouvri, yo konn pa vle koute mesaj la paske yo panse Temwen Jewova yo se yon ti relijyon ki nan zòn nan sèlman. Men, lè yo wè se Temwen ki sot nan lòt peyi ki vin pale avèk yo, gen nan yo ki konn koute.

 Annou pran egzanp Gloria k ap viv nan vil Querétaro ki nan mitan Meksik. Men sa l di : “ Te gen Temwen ki pale espayòl ki te konn vizite m, men mwen pa t konn koute yo. Sepandan, lè fanmi m ak zanmi m te kòmanse gen pwoblèm, mwen te vin fè yon depresyon e mwen te priye Bondye sou sa. Mwen te sipliye l pou l ede m jwenn yon solisyon. Yon ti tan apre sa, te gen yon fi ki pale anglè ki te frape pòt mwen. Li te vle konnen si gen moun nan kay la ki pale anglè. Lefètke l te yon etranje, li te atire atansyon m, e mwen te di l mwen konn pale anglè. Toutpandan li t ap pale avè m, nan kè m mwen t ap di ‘ sa Amerikèn sa a pèdi nan katye a ? ’ Men, mwen te mande Bondye yon siy, e petèt fi etranje sa a se fason Bondye te reponn priyè m nan. ” Gloria te aksepte yon etid biblik, li te fè pwogrè rapid jiskaske li te batize, malgre fanmi l te opoze. Jodi a, Gloria se yon pyonye pèmanan, e mari l ak pitit gason l lan ap sèvi Jewova tou.

Benediksyon moun ki etann ministè yo jwenn

Se vre, yon moun k ap sèvi kote ki bezwen plis pwoklamatè Wayòm nan ap jwenn difikilte, men tou, benediksyon l ap jwenn yo anpil. Men sa Ralph, nou te mansyone nan kòmansman atik la, di : “ Nou te kondui etid biblik ak moun ki sot Grann Bretay, Lachin, Jamayik, Syèd, e menm ak moun ki soti nan fanmi boujwa nan peyi Gana. Gen kèk nan etidyan sa yo ki te antre nan sèvis aplentan tou. Pandan ane ki pase yo, fanmi nou te wè sèt kongregasyon anglè vin fòme devan nou. Toule de pitit gason nou yo te vin pyonye ansanm avèk nou, e kounye a, y ap sèvi nan Betèl Ozetazini an.

Aktyèlman, gen 88 kongregasyon anglè ak anpil gwoup anglè o Meksik. Ki sa k fè gen akwasman rapid sa a ? Anpil moun ki pale anglè k ap viv Meksik potko janm pran kontak ak Temwen Jewova yo. Gen lòt ki byen reyaji paske yo lwen lakay yo kote yo te ka sibi presyon oubyen kote yo te ka jwenn opozisyon nan men zanmi ak fanmi yo. Genyen tou ki aksepte pou yo etidye Labib paske yo pran retrèt yo e sa fè yo gen tan pou yo etidye Labib. Mete sou sa, plis pase yon tyè nan pwoklamatè ki nan kongregasyon anglè yo se pyonye. Pakonsekan, kongregasyon yo chofe anpil e yo gen anpil akwasman.

Gen benediksyon k ap tann ou

Pa gen dout nan sa, gen anpil moun sou tè a toujou k ap byen reyaji lè yo tande bon nouvèl la nan lang pa yo. Se sa k fè kè nou kontan lè nou wè anpil frè ak sè ki espirityèl, jèn kou granmoun, selibatè kou moun marye ki dispoze al viv kote ki bezwen plis pwoklamatè Wayòm nan. Se vre, yo ka jwenn difikilte, men difikilte sa yo pa anyen devan kè kontan y ap genyen lè yo rive jwenn moun ki gen kè sensè ki aksepte verite ki nan Bib la. Èske w ka fè kèk chanjman k ap pèmèt ou al viv yon kote ki bezwen plis pwoklamatè Wayòm nan, swa nan peyi pa w, swa nan yon lòt peyi * (Lik 14:28-30 ; 1 Kor. 16:9) ? Si w fè sa, ou mèt gen asirans gen anpil benediksyon k ap tann ou !

[Nòt anba paj]

[Kare nan paj 21]

Lajwa yo genyen te atire atansyon l

Beryl te kite peyi l, Grann Bretay, pou l al viv o Kanada, kote li te travay kòm direktris pou plizyè konpayi entènasyonal. Anplis, li te vin fò anpil nan monte cheval e yo te menm chwazi l pou l reprezante Kanada nan Je olenmpik ki te fèt an 1980. Li te pran retrèt li nan vil Chapala, o Meksik, e li menm ak mari l te konn al manje nan restoran souvan. Lè l te wè moun ki retrete ki pale anglè e ki sanble gen kè kontan, li te konn fè konesans avèk yo epi li te konn mande yo sa y ap fè o Meksik. Souvan, moun ki gen kè kontan sa yo se Temwen Jewova yo te ye. Beryl ak mari l te di tèt yo si lè yon moun konnen Bondye, li rive gen kè kontan ak yon bi nan lavi a, yo menm tou yo ta renmen konnen Bondye. Donk, apre Beryl te asiste reyinyon yo pandan plizyè mwa, li te aksepte etidye Labib e li te vin yon Temwen. Pandan plizyè ane, li te gen posiblite sèvi kòm pyonye pèmanan.

[Kare nan paj 22]

“ Se yon benediksyon pou nou genyen yo avèk nou ”

Nan peyi ki bezwen plis pwoklamatè Wayòm nan, frè ak sè yo apresye moun ki deplase vin ede yo anpil. Men sa yon filyal ki nan Karayib la te ekri : “ Si plizyè santèn etranje k ap sèvi isit la ta oblije ale, sa t ap afekte estabilite kongregasyon yo. Se yon benediksyon pou nou genyen yo avèk nou. ”

Pawòl Bondye a di : ‘ Yon bann fanm ap gaye nouvèl la. ’ ​(Sòm 68:11). Donk, nou pa sezi lefètke gen yon pakèt sè selibatè pami moun k ap sèvi aletranje yo. Sè sa yo ki gen lespri sakrifis itil anpil. Men sa yon filyal nan Ewòp de Lès te remake : “ Nan anpil nan kongregasyon nou yo, gen yon gwo pousantaj sè ki konn rive 70 pousan pafwa. Pifò nan yo nouvo nan laverite, men gen sè selibatè ki pyonye e ki soti nan lòt peyi ki bay yon èd presye nan fòmasyon sè nouvo sa yo. Sè sa yo ki soti nan lòt peyi se yon vrè kado pou nou ! ”

Ki jan sè k ap sèvi aletranje yo konsidere sèvis yo ? Angelica, yon sè ki nan trantèn li kounye a, te pase kèk ane antanke pyonye selibatè ap sèvi aletranje. Men sa l di : “ Defi yo anpil. Nan youn nan asiyasyon mwen te genyen yo, nonsèlman mwen te konn pase mizè chak jou ap mache nan wout ki plen labou, men tou, toutotou m, mwen te wè moun k ap soufri, e sa te fè m mal. Men mwen te jwenn satisfaksyon nan ede lòt moun nan ministè a. Anplis de sa, lefètke sè ki nan zòn nan te toujou eksprime rekonesans yo, e yo te toujou ap remèsye m poutèt mwen te vini pou m ede yo, sa te touche m anpil. Gen yon sè ki te di m egzanp mwen bay lefètke m te vin jis nan peyi l pou m sèvi kòm pyonye te ankouraje l pou l antre nan sèvis aplentan tou. ”

Sue, yon pyonye ki fèk antre nan senkantèn li, te di : “ Pa gen dout nan sa, w ap jwenn difikilte, men yo pa anyen devan benediksyon w ap jwenn. Ministè a bay anpil kè kontan ! Piske mwen pase anpil tan ap preche ak sè ki jèn, mwen pataje sa m te aprann nan Bib la ak nan piblikasyon yo avèk yo sou fason pou yo jere sitiyasyon difisil yo. Souvan, yo di m egzanp mwen bay nan fason mwen fè fas ak pwoblèm mwen rankontre pandan tout ane mwen sèvi antanke pyonye ki selibatè ede yo wè yo menm tou yo ka fè fas ak difikilte yo jwenn nan lavi yo. Mwen santi m jwenn anpil satisfaksyon dèske m ede sè sa yo. ”

[Kat jeyografik nan paj 20]

(Gade peryodik la)

MEKSIK

Monterrey

Guanajuato

Irapuato

Ajijic

Chapala

Lak Chapala

San Miguel de Allende

Querétaro

MEKSIKO

Cancún

[Foto nan paj 23]

Moun k ap preche etranje ki tande bon nouvèl la pou premye fwa yo jwenn anpil kè kontan.