Angela * se yon sè selibatè ki nan trantèn li e l yon ti jan strese. L ap ret tann ansyen yo. Ki sa yo pral di l? Se vre, li te rate kèk reyinyon, men li te tèlman fatige apre l fin fè tout yon jounen ap travay nan pran swen moun ki aje. Nonsèlman li gen pwoblèm pa l chak jou, men tou, l ap enkyete l anpil pou sante manman l.

Etandone Angela se yon “moun ki bouke”, ki jan w t ap ankouraje l si w ta gen pou w vizite l (Jer. 31:25)? Toudabò, ki jan w t ap prepare w pou w fè yon vizit pastoral ki ankourajan?

Pafwa, nou tout konn fatige akoz travay pwofàn nou oswa responsablite teyokratik nou genyen yo. Pa egzanp, pwofèt Dànyèl ‘te santi l faya’ apre l te fin resevwa yon vizyon li pa t ka konprann (Dàn. 8:27, NW). Annapre, li te jwenn èd lè zanj Gabriyèl te parèt devan l. Mesaje Bondye a te ede Dànyèl konprann bagay yo, li te ba l asirans Jewova te tande priyè l yo, e li te fè l konnen li se yon “moun Bondye renmen anpil”. (Dàn. 9:21-23.) Nan yon lòt okazyon, kèk pawòl byen chwazi yon lòt zanj te di pwofèt la ki te fatige te ankouraje l. — Dàn. 10:19.

Menm jan an tou, anvan w al vizite yon kwayan parèy ou, petèt ki bouke oswa ki dekouraje, pran yon ti tan pou w reflechi sou sitiyasyon l. Ki pwoblèm li genyen? Ki jan pwoblèm sa yo kapab fè l pèdi fòs? Ki bèl kalite li demontre? Gen yon frè ki rele Richard k ap sèvi kòm ansyen depi plis pase  20 an ki fè konnen: “Mwen konsantre m sou bèl kalite frè m yo.” Men sa l ajoute: “Lè m byen reflechi sou sitiyasyon yo anvan m al vizite yo, li vin pi fasil pou m jwenn fason pou m ba yo bonjan ankourajman yo bezwen.” Si gen yon lòt ansyen k ap akonpaye w nan vizit la, poukisa w pa egzamine sitiyasyon moun ou pral vizite a ansanm avè l?

Petèt, w ap dakò li pa toujou fasil pou yon moun di sa l santi. Pa egzanp, yon frè gendwa twouve l difisil pou l pale konsènan sa l santi lè ansyen yo vin vizite l. Kounye a, ki jan w kapab mete frè sa a alèz? Yon souri ki sensè ak kèk pawòl ki ankourajan kapab gen yon bon efè sou li. Byen souvan, Michael, yon frè k ap sèvi kòm ansyen depi plis pase 40 an, kòmanse vizit li yo ak pawòl sa yo: “Ou konnen, youn nan pi bèl privilèj yon ansyen genyen se al vizite frè yo lakay yo epi aprann konnen yo pi byen. Se sa k fè, jodi a, mwen te vrèman anvi vin vizite w.”

Nan kòmansman vizit la, ou kapab chwazi fè yon priyè ak tout kè w. Nan priyè apot Pòl te fè yo, li te konn pale de lafwa, lanmou ak andirans frè yo genyen (1 Tes. 1:2, 3). Lè w eksprime santiman w konsènan bèl kalite frè a genyen yo, an reyalite, se prepare w ap prepare kè w ansanm ak kè l pou n gen yon konvèsasyon ki ankourajan. Pawòl ou yo tou kapab soulaje l. Men sa Ray, yon ansyen ki gen anpil eksperyans, fè konnen: “Pafwa, nou tout konn bliye bon aksyon n ap akonpli yo. Se sa k fè, lè yon moun fè nou sonje yo, sa ankouraje nou.”

Menm jan ak Pòl, ou kapab pataje yon “benediksyon ki soti nan Bondye” ak frè a lè w pataje yon panse ki sot nan Bib la avè l, li te mèt se yon sèl vèsè (Wom. 1:11). Pa egzanp, yon frè ki tris kapab santi l pa vo  anyen menm jan ak salmis la ki te konpare tèt li ak “yon bidon ki fèt an po ki nan lafimen” e ki vin sèch (Sòm 119:83, 176, NW). Apre w fin bay yon esplikasyon tou kout sou ekspresyon sa a, ou kapab fè frè a konnen ou gen konfyans li “pa bliye” kòmandman Bondye yo.

Menm jan an tou, èske parabòl konsènan drak ki te pèdi a pa t ap touche yon sè ki vire do bay kongregasyon an oswa ki ralanti sou aktivite l (Lik 15:8-10)? Drak ki pèdi a te ka youn pami plizyè lòt drak ki nan yon kolye ki fèt ann ajan e ki gen anpil valè. Fason w esplike egzanp lan ka ede sè a wè li gen anpil valè nan kongregasyon an. Apre w fin esplike l sa, ou ka atire atansyon l sou fason Jewova montre l gen anpil sousi pou li antanke youn nan timouton l yo.

An jeneral, kwayan parèy nou yo renmen pale konsènan sa yo te li nan Bib la. Kidonk, pa pran konvèsasyon an pou ou sèl! Apre w fin li yon vèsè ki aplikab ak sitiyasyon yo, ou ka chwazi yon mo kle oswa yon fraz nan vèsè a epi w mande yo pou yo fè kòmantè sou li. Pa egzanp, apre yon ansyen fin li 2 Korentyen 4:16, li kapab mande: “Èske w remake fason Jewova fè w vin yon lòt moun?” Metòd sa a ka fè ‘youn ankouraje lòt’ toutbonvre. — Wom. 1:12.

Ou ka ankouraje yon kwayan parèy ou tou lè w pale avè l konsènan yon moun Bib la pale de li ki te nan yon sitiyasyon ki sanble ak pa l la. Yon moun ki santi l dekouraje gendwa santi l menm jan ak Ana oswa Epafwodit, de moun ki te konn tris pafwa, men ki te toujou gen anpil valè nan je Bondye (1 Sam. 1:9-11, 20; Fil. 2:25-30). Poukisa w pa pale avè l sou kèk bèl egzanp nou jwenn nan Bib la lè sitiyasyon an pèmèt ou fè sa?

Ou ka montre w gen sousi pou frè ak sè yo toutbonvre lè w kontinye montre w enterese nan yo apre vizit la (Tra. 15:36). Anvan w fini vizit pastoral la, ou ta kapab pran randevou pou w preche ansanm ak moun nan. Lè Bernard, yon ansyen ki gen eksperyans, rankontre yon frè oswa yon sè li pa gen lontan depi l te vizite l, li fè konnen, san moun pa remake anyen, li konn fè referans ak kèlkeswa konsèy li te ba l lè l poze l kesyon sa a: “Di m non, èske sa te byen mache pou ou?” Lè w montre w enterese nan moun nan nan fason sa a, w ap kapab wè si l nesesè pou w ba li plis èd toujou.

Sa k pi enpòtan an sèke frè ak sè yo bezwen ou montre w gen sousi pou yo, ou konprann yo epi w renmen yo (1 Tes. 5:11). Se sa k fè, anvan w al fè yon vizit pastoral, pran yon ti tan pou w reflechi sou sitiyasyon frè w la oswa sè w la. Lapriyè sou sa. Chwazi vèsè ki apwopriye yo. Konsa, w ap jwenn bon pawòl pou w ankouraje “moun ki bouke yo”!