Mwen fèt nan yon vil ki rele Bilbawo ki nan nò peyi Espay. Se yon katye ki te gen moun nan klas mwayèn ki te abite ladan l. Mwen se dezyèm pitit fi nan yon fanmi ki gen kat timoun. Fanmi m te fran katolik, e m te konn al lamès chak jou. Lè m te gen 23 an, m te vin pwofesè. Se yon pwofesyon m te renmen anpil. M te pase 40 an ap anseye. Pami sijè m te konn anseye yo, m te fyè pou m anseye moun kwayans katolik yo genyen e nan aprèmidi m te konn anseye tifi ki pral fè premye kominyon yo katechis.

Mari m te mouri apre 12 an maryaj ki te ban nou anpil kè kontan. Li te kite m ak kat pitit fi pou m okipe. Lè sa a m te gen 33 an sèlman. M te fè efò pou m jwenn konsolasyon nan kwayans mwen antanke katolik, men gen plizyè kesyon ki te toujou vin nan lespri m. Mwen te konn ap mande tèt mwen: ‘Poukisa moun kontinye ap mouri si Jezi te rachte nou? Poukisa n ap priye Bondye pou Wayòm li an vini si bon moun yo pral nan syèl?’ Mete sou sa, m te konn fè refleksyon sa a: ‘Si Bondye jije nou lè nou mouri, poukisa nou oblije kite syèl la oubyen pigatwa a oubyen lanfè pou yon jijman final?’

Mwen te poze plizyè prèt m te rankontre kesyon sa yo. Gen youn ki te di m: “Mwen pa konnen. Mande evèk la. Poukisa sa enpòtan pou ou? Ou kwè nan Bondye, pa vre? Ebyen poukisa w ap enkyete w pou bagay konsa?” Men, m te kontinye ap chèche repons pou kesyon sa yo. Kèk tan apre, mwen t al nan konferans jezuit yo t ap fè. M t al nan pannkotis e m te konn asiste diskou nostik yo te konn fè. Men, okenn moun pa t janm ban m repons ki satisfè m.

Lè m te gen 60 an konsa, te gen yon tifi ki gen setan ki te envite m nan yon reyinyon Temwen Jewova yo ap fè. Sa m te wè yo te fè m plezi e m te renmen sa m te tande yo. Men m tèlman te okipe lè sa a, m pa t ka kontinye kenbe kontak ak Temwen yo. Dezan apre, gen de Temwen ki te frape nan pòt mwen. Se te Juan ak Maite, madanm li. Pandan twa mwa, nou te fè diskisyon sou diskisyon, chak fwa yo te vini m te benyen yo ak kesyon e yo te ban m repons pou tout. Finalman sa te mennen nan yon etid biblik.

 Mwen t ap tann chak etid avèk enpasyans. M te egzamine tout bagay an detay. M te sèvi ak twa tradiksyon Labib pou m ka sèten sa Temwen Jewova yo ap anseye a se laverite. Kèk tan apre, m te rann mwen kont jan m te nan konfizyon nan domèn relijye pandan plizyè dizèn ane. Gwo diferans ki genyen ant kwayans m te genyen yo ak sa m vin aprann nan Bib la te boulvèse m anpil. M te santi m oblije chanje kwayans mwen nèt, se tankou m te derasinen yon pyebwa ki te byen anrasinen.

Apre sa, dezyèm mari m te genyen an te vin malad byen grav epi li mouri. Prèske nan menm epòk la, m te pran retrèt nan travay mwen, epi m te kite Bilbawo pandan yon tan. Juan ak Maite te demenaje tou. Malerezman, m te kanpe etid la. Sepandan, nan fon kè m mwen te konnen m jwenn yon trezò. M pa t janm bliye l.

Anviwon 20 an apre, lè m te gen 82 an, Juan ak Maite te retounen Bilbawo e yo te vin vizite m. Se pa ti kontan m te kontan wè yo ankò! Mwen te rann mwen kont Jewova pa t bliye m, e m te rekòmanse etid la. Juan ak Maite te pran anpil pasyans avè m, paske byen souvan, m te konn poze yo menm kesyon yo plizyè fwa. M te bezwen tande agiman biblik yo t ap ban mwen yo plizyè fwa pou m te ka kase lyen afektif ki te atache m ak ansyen kwayans mwen yo. Ansuit, mwen te bezwen byen ekipe pou m te ka esplike zanmi m ak fanmi m verite biblik yo.

Finalman, mwen te batize lè m te gen 87 an. Se jou ki te ban m plis kè kontan nan lavi m. Yo te fè batèm nan pandan yon asanble Temwen Jewova yo te òganize. Gen yon frè, se yon ansyen li ye, ki te fè yon diskou ki baze sou Bib la pou moun ki pral batize yo. Diskou a te fè dlo koule nan je m. Mwen t ap koute diskou a tankou se Jewova ki t ap pale ak mwen dirèkteman. Apre m te fin batize, te gen anpil Temwen ki te vin felisite m menmsi pifò nan yo pa t janm rankontre m anvan sa.

Mwen te toujou konnen Jezi Kris se “chemen an”. (Jan 14:6.) Men etid biblik mwen te fè a te pèmèt mwen konnen Jewova, moun Jezi ap mennen nou jwenn nan. Kounye a, mwen ka priye Bondye antanke Papa m mwen renmen e antanke zanmi m. Lè m te fin li liv Annou pwoche bò kote Jewova a *, sa te fè yon gwo chanjman nan lavi m. Mwen te fin li l nèt nan yon sware! Lè m te aprann jan Jewova gen mizèrikòd sa te vrèman touche m.

Lè m sonje tout tan m te fè ap chèche laverite nan domèn relijyon, sa fè m panse ak pawòl sa yo Jezi te di: “Kontinye mande, e y ap ban nou. Kontinye chèche, e n ap jwenn. Kontinye frape, e y ap ouvri pou nou.” (Matye 7:7). Kounye a mwen jwenn repons mwen t ap tann yo, se ak anpil kè kontan m ap pataje yo ak lòt moun.

Byenke m gen 90 an, men m gen anpil bagay toujou pou m aprann sou Jewova. Chak reyinyon mwen asiste nan Sal Wayòm nan se yon okazyon espesyal pou mwen. Mwen gen de rezon pou sa. Toudabò, pou bonjan konesans mwen resevwa nan reyinyon sa yo, ansuit, pou konpayi frè ak sè yo mwen renmen anpil. M ap tann avèk enpasyans pou m vin yon pwofesè nan Paradi ki pral gen sou tè a (Revelasyon 21:3, 4). M ap tann jou a rive kote m pral wè moun pa m yo ki te mouri ki leve e lè sa a, m pral gen posiblite pou m anseye yo verite ki nan Bib la (Travay 24:15). Se pa ti anvi m anvi wè yo pou m esplike yo kokenn kado Jewova te ban mwen nan vyeyès mwen!