Nan dat ki te 18 desanm 2021 an, frè Dirk Grundmann, ki nan komite filyal Ewòp santral la, te anonse premye liv ki disponib nan Labib – Tradiksyon monn nouvo a nan lang siy alman, se liv Matye a ak liv Jan an. Te gen anviwon 800 moun ki te wè pwogram nan pa mwayen videyo konferans.

Gouvènman peyi Almay la vin rekonèt lang siy alman an kòm lang jis nan ane 2002. Men, depi ane 1960 yo, Temwen Jewova yo te deja konn entèprete asanble ak kongrè ki te fèt ann Almay yo pou moun ki soud yo. Jodi a, gen 571 pwoklamatè k ap sèvi nan 11 kongregasyon ak 21 gwoup ki itilize lang siy alman.

Liv sa yo ki parèt yo se premye liv nan Bib la yo tradui nan lang siy alman. Anvan sa, pwoklamatè yo te jis ka itilize kèk vèsè nan Bib la pou yo fè etid pèsonèl yo oswa pou yo preche.

Men sa yon pwoklamatè di: “Kòm pa gen Bib la okonplè, byen souvan li te difisil pou nou jwenn yon prensip nan Bib la oswa prèv ki kore kwayans nou. Li te difisil pou nou ankouraje yon etidyan Labib pou l egzamine yon pòsyon nan Bib la chak jou, paske se te jis kèk vèsè pasipala ki te disponib.”

Men sa yon tradiktè di: “Se vrèman yon gwo bagay pou nou travay sou Bib la, pou nou tradui Pawòl Jewova a pou moun ki soud yo ka vin bon zanmi l. Sa touche nou anpil paske nou gen privilèj travay sou pwojè sa a.”

N ap priye pou Tradiksyon monn nouvo a nan lang siy alman ede plis moun ki gen imilite toujou pou yo konnen chemen Jewova a. — Sòm 25:9.