Non. Bib la di aklè Bondye kreye lèzòm ak tout kalite plant ak bèt “selon gwoup yo ye a”. a (Jenèz 1:12, 21, 25, 27; Revelasyon 4:11.) Bib la di tout moun ki sou tè a soti nan Adan ak Èv, de premye moun ki te sou tè a (Jenèz 3:20; 4:1). Bib la pa soutni teyori ki fè konnen Bondye te sèvi ak evolisyon pou l kreye tout sa ki gen vi nan yo. Yon lòt bò, sa Bib la di sou kreyasyon an pa an kontradiksyon ak sa syantifik yo konstate anrapò ak varyasyon ki genyen nan diferan gwoup yo.

•  Èske Bondye te sèvi ak evolisyon?

•  Èske evolisyon mache ak sa Bib la di?

•  Ki sa nou kapab di sou kapasite bèt yo ak plant yo genyen pou yo adapte yo?

 Moun ki kwè Bondye te sèvi ak evolisyon pou l kreye lavi yo gen yon pakèt ide sou fason l te fè sa. Dapre yon ansiklopedi (Encyclopædia Britannica), gen nan moun sa yo ki panse Bondye sèvi ak sa yo rele seleksyon natirèl la pou l kontwole lavi sou tè a, sa vle di se moun, bèt ak plant ki pi djanm yo ki kontinye egziste.

 Teyori sa a gen ladan l tou ide sa yo:

•   Tout sa ki gen vi nan yo jounen jodi a soti nan menm zansèt yo ki te egziste sa gen lontan.

•   Yon òganis vivan kapab vin tounen yon lòt òganis vivan ki diferan nèt pa mwayen evolisyon.

•   Se Bondye ki lakòz chanjman sa yo fèt.

 Teyori sa a vle fè kwè sa Bib la di sou kreyasyon an nan liv Jenèz la pa fin egzak. Epoutan, Jezi te pale de sa ki nan liv Jenèz la kòm bagay ki te rive toutbon (Jenèz 1:26, 27; 2:18-24; Matye 19:4-6). Bib la fè konnen, anvan Jezi te vin sou tè a, li te nan syèl la avèk Bondye e li te ede Bondye fè “tout bagay” vin egziste (Jan 1:3). Se sa k fè, ide ki fè konprann Bondye te sèvi ak evolisyon pou l kreye tout sa ki gen vi nan yo pa mache ak sa Bib la di.

 Bib la pa bay detay sou kantite varyasyon ki kapab fèt nan yon gwoup. Anmenmtan tou, Bib la pa di diferan gwoup bèt ak plant Bondye kreye yo pa ka gen varyasyon nan yo pandan y ap repwodui oswa y ap adapte yo ak yon nouvo anviwònman. Byenke gen moun ki konsidere varyasyon sa yo se evolisyon, se pa nouvo gwoup ki vin kreye.