Men sa Bib la di: “Moun ki vivan yo konnen y ap mouri, men moun ki mouri yo pa konn anyen ditou.” (Eklezyas 9:5; Sòm 146:4). Kidonk, lè yon moun mouri, li pa egziste ankò. Moun ki mouri yo pa ka panse, yo pa ka aji e yo pa gen okenn santiman.

“W ap retounen nan pousyè”

 Bondye te esplike sa k rive lè yon moun mouri lè l t ap pale ak Adan, premye gason an. Piske Adan pa t obeyi Bondye, men sa Bondye te di l: “Se pousyè w ye, w ap retounen nan pousyè.” (Jenèz 3:19). Anvan Bondye te kreye Adan “ak pousyè ki sot nan tè a”, Adan pa t egziste (Jenèz 2:7). Menm jan an tou, lè Adan vin mouri, li retounen nan pousyè e li pa egziste ankò.

 Se menm bagay la ki rive moun ki mouri jodi a. Anpalan de bèt ak moun, men sa Bib la di: “Yo tout soti nan pousyè e yo tout ap tounen nan pousyè.” — Eklezyas 3:19, 20.

Lanmò pa oblije met fen nan tout bagay

 Byen souvan, Bib la konpare lanmò ak dòmi (Sòm 13:3; Jan 11:11-14; Travay 7:60). Yon moun ki nan fon somèy pa konn sa k ap pase bò kote l. Se konsa tou, moun ki mouri yo pa konn anyen ditou. Sepandan, Labib anseye Bondye kapab leve moun ki mouri yo menm jan yo leve yon moun k ap dòmi, e li kapab ba yo lavi ankò (Jòb 14:13-15). Pou moun Bondye resisite yo, lanmò pa met fen nan tout bagay.