“Mwen salye manm òganizasyon nou an pou volonte ak zèl yo genyen pou yo travay pou Wayòm Bondye a. Nou vrèman apresye efò nou fè paske nou renmen moun, nou vrèman apresye èd nou bay Temwen Jewova parèy nou yo ansanm ak moun nan kominote a e nou bay sa anpil valè.”

Se sa Kasim Reed, majistra vil Atlanta a, nan Jòjya, Etazini, te di nan yon lèt. Nan lèt la, yo te di Temwen Jewova yo byenveni nan twa gwo kongrè yo t ap òganize nan vil sa a.

Nan menm sans lan, Konsèy vil Atlanta a te fè yon anons pou yo te di delege kongrè yo byenveni. Yo te di: “Gen prèske uit milyon Temwen Jewova sou tè a, e ladan yo, [...] gen moun ki soti nan plizyè santèn peyi ak lang, epoutan, [...] nou ini paske nou gen menm objektif [...]. [Nou] vle onore Jewova, Bondye ki mèt Bib la e ki Kreyatè tout bagay la.”

Twa kongrè yo te fèt an jiyè ak out 2014. De te fèt ann anglè e youn te fèt ann espayòl. Te gen delege ki te soti nan 28 peyi omwen. Epi, yo te entèprete pwogram ki te fèt ann anglè a nan lang ris ak nan lang japonè anmenmtan pou delege ki pale lang sa yo te ka byen pwofite pwogram sa a. Antou, gen 95 689 moun ki te asiste twa kongrè sa yo.

Pandan ane 2014 la, Temwen Jewova yo te fè 24 gwo kongrè entènasyonal nan nèf peyi. Sèz nan kote yo te fè kongrè sa yo nan peyi Etazini.