Si w se yon Temwen Jewova, èske w kapab imajine sitiyasyon sa a kote lapolis akonpaye w pou w kapab preche bon nouvèl la kay an kay? Se yon eksperyans konsa Joseph te fè nan Mikwonezi an 2017. Li menm ak twa lòt Temwen t ap patisipe nan yon kanpay espesyal pou yo pale ak moun nan zile ki nan zòn sa a.

 Vè midi, kat Temwen yo rive sou yon ti zile ki gen anviwon 600 moun ki abite sou li. Majistra zòn nan te byen akeyi Temwen sa yo sou plaj la. Men kòman Joseph esplike n jan bagay yo te pase annapre: “Majistra a te di n yon machin polis kapab akonpaye n nan vizit nou ta pral fè yo. Nou te vrèman sezi poutèt òf sa a li te fè n nan, men avèk respè, nou di l non, li pa bezwen fè sa. Nou te vle vizite moun yo apye jan n abitye fè sa, kay an kay.”

 Pwoklamatè yo t ale apye e yo te detèmine pou yo pale ak plis moun posib. Men sa yo di: “Moun yo te byen akeyi n e yo te montre yo enterese nan mesaj nou t ap bay la. Kòm rezilta, nan chak kay nou te vizite yo, nou te pase plis tan pase sa n te prevwa.”

 Pita nan jounen an, gen yon machin lapolis ki te pase de fwa kot Joseph te ye a e sou twazyèm fwa a, machin nan kanpe bò kote l. Polisye yo mande l si yo te kapab kondui l al nan kay li ret pou l vizite yo. Yon lòt fwa ankò Joseph di non, men fwa sa a yo te ensiste, men sa yo di l: “Nou rete sèlman yon tikras tan pou n kite zile a, kidonk, n ap mennen nou nan rès kay ki rete yo”. Joseph di fwa sa a li pa t ka refize yo ankò, paske l te ret anpil lòt kay toujou pou l te vizite. Men sa Joseph ajoute: “Devan chak kay nou rive, polisye yo te di m ki jan fanmi ki nan kay la rele e yo te di m si pa gen pèsonn ki vin ouvri pòt la lè m frape, y ap pase sirèn nan pou yo fè mèt kay la konnen n la.”

 Men sa li di ankò: “Grasa èd sa a nou te jwenn nan, nou te gen posiblite vizite tout kay nan zòn nan jou sa a. Nou te bay moun yo anpil piblikasyon e nou te fè aranjman pou n vizite moun ki te enterese yo ankò.”

 Polisye yo te di Joseph: “Nou te vrèman kontan patisipe nan gaye bon nouvèl la.” Lè solèy la t ap kouche, Temwen yo te kite zòn nan pou y al lakay yo epi polisye yo ki te bò plaj la t ap souri ba yo toutpandan yo t ap fè yo babay avèk piblikasyon n yo kenbe nan men yo.