EKONDWA 25

Me yenene vi okunakaura ongaro yokurinyandisa oviṋepo vyourumendu poo vyoukazendu?

“Ami mba uta okurinyandisa oviṋepo vyandje vyourumendu indu tji mba ri nozombura hambondatu. Kombunda mbe rihonga oumune wa Mukuru ohunga notjiṋa hi. Ee fula navi aruhe indu tji mba putara. Ami ee ripura omuini kutja, ‘Hapo Mukuru ma yenene vi okusuvera omundu otja ami?’ ”​—Luiz.

INDU omundu tja vaza ozombura zokutiha, ozonḓuma zokukara nomahakaeneno womonyama ze rira ozonamasa tjinene. Ku nao, mape ya o hiti mombate yokurinyandisa oviṋepo vyourumendu poo vyoukazendu. a Ovengi mape ya ave tja iho katjiṋa otjivi. Nu ve tja: “Kape nomundu ngu mo hihamisa.” Posi ya, pe nepu esemba rokunakaura ongaro ndjo. Omuapostele Paulus wa tjanga kutja: “Mamu sokukoza ozonḓuma zouye nḓe ri mu eṋe; okutja . . . omananukiro womonyama.” (Ovakolose 3:5) Okurinyandisa oviṋepo vyourumendu poo vyoukazendu kaku koza omahakaeneno womonyama, poo okuzewisa pehi. Nungwari, ku tjita kutja u kare nonḓero onyingi. Tara komapu ngu maye kongorere kehi mba:

● Ongaro yokurinyandisa oviṋepo vyourumendu poo vyoukazendu i tjita kutja u ripurire kozonḓero zoye omuini. Otjotjihorera, indu omundu tji me rinyandisa oviṋepo vyourumendu, poo vyoukazendu u yandja ombango okurikovisa ozonḓuma ze omuini.

● Ongaro yokurinyandisa oviṋepo vyourumendu poo vyoukazendu i tjita kutja u vare varwe otja oviṋa mbi mavi ungurisiwa okukovisa ozonḓero zoye zomahakaeneno womonyama.

● Ongaro yokuripurira kove omuini ndji etwa i yongaro yokurinyandisa oviṋepo vyourumendu poo vyoukazendu i tjita kutja i rire ouzeu okukovisa ozonḓuma zomahakaeneno womonyama morukupo.

Pendje yokurinyandisa oviṋepo vyourumendu poo vyoukazendu kutja u kovise ozonḓuma zoye, kondja okukara nomeritjaerero. (1 Ovatesalonika 4:4, 5) Kutja u tjite nao, Ombeibela i tu tunduuza kutja tu kare kokure noviṋa mbi mape ya avi pendura ozonḓuma. (Omiano 5:8, 9) Hapo nu tjike tji wa iririra okurinyandisa oviṋepo vyourumendu poo vyoukazendu? Ngahino ove wa rora okukondja okuisa oviṋa mbyo, posi ya ko toṋene. Ma rire oupupu okumuna kutja komoo rundurura ongaro yoye nokuhupa otja komirari vya Mukuru. Omuzandu wena Pedro wa ri noumune mbwo. Eye wa tja: “Indu tji mba wa ee fula navi. Ami ee munu kutja himee isirwa ku imbi mbi mba tjita, nu ya ri ouzeu ku ami okukumba.”

Indu tji u fula nao, o rihahiza ove mo yenene okutoṋa. Omitanda novandu ovanene ovengi va yenena okutuurunga ongaro yokurinyandisa oviṋepo vyourumendu poo vyoukazendu. Ove wina mo yenene.

Omomuano uṋe mu mo yenene okutuurunga okurimuna ondjo?

Otja tji pa raisiwa rukuru, imba mbe rinyandisa oviṋepo vyourumendu poo vyoukazendu potuingi ve rimuna ondjo. Nu owo ve kara ‘noruhoze otja kombango yaNdjambi,’ poo ve fula navi mena rokutja va hihamisa Mukuru. Nu iho tji yenena okutjita kutja ve yenene okutuurunga ongaro ndjo. (2 Ovakorinte 7:11) Posi ya, okurimuna ondjo tjinene ku tjita kutja u rihahize nokuvanga okuyumba ohama.—Omiano 24:10.

Ku nao, kondja okukara noumune ouwa. Okurinyandisa oviṋepo vyourumendu poo vyoukazendu otjiṋa otjihakohoke. Otjo tji yenena okutjita kutja u rire ‘omukarere wozonḓuma nevyaro ngamwa arihe,’ nokutjita kutja u kare nozongaro ozombi. (Titus 3:3) Posi ya, okurinyandisa oviṋepo vyourumendu poo vyoukazendu kauvi ounene tjimuna okutjita oruvakiro. (Judas 7) Indu tji u kondja nongaro yokurinyandisa oviṋepo vyourumendu poo vyoukazendu, ove ko sokumuna kutja wa tjiti ouvi mbu hi nokuyenena okuisirwa. Otjiṋa otjinanḓengu tjinene, okuhinokurihahiza nokuyumba ohama.

I rira oupupu okuwa momuinyo indu tji wa zu nokuputara. Indu iho tji tja tjitwa, zemburuka omambo nge ri mOmiano 24:16 nge tja: “Nandarire kutja omusemba ma u potuingi, eye ma sekama rukwao; nungwari ovarunde mave putara moviwonga.” Okuputara kaku hee kutja oove omundu omurunde. Ku nao, o rihahiza. Nungwari, kondja okutjiwa kutja ovikwaye mbi tjita kutja u putare nu u nakaure oviṋa mbyo.

Kondja okutwa po oruveze okuripurira ko oukoto korusuvero notjari tja Mukuru. Omutjange wEpsalme David, ngwa katuka mena roungundipare we, wa tja: “Otja ihe punga e ṱotjari novanatje ve, Muhona opunga e ṱotjari na imba mbe Mu karera. Eye u tjiwa kutja eṱe twa ungurwa pu tjike, nu u zemburuka kutja oweṱe oruuma.” (Epsalme 103:13, 14) Otjiperi kutja Jehova u tjiwa oungundipare wetu nu u nonḓero ‘okutuisira.’ (Epsalme 86:5) Komunda imbwo warwe, eye u vanga kutja tu kondje nomasa okurundurura ongaro yetu. Hapo omikambo viṋe mbi mo yenene okutoora kutja u taare ongaro yokurinyandisa oviṋepo vyourumendu poo vyoukazendu?

Konḓonona oviṋa mbi u tarera. Hapo ove u tarera ozomuvi, ozoprograma zotiivii poo u yenda kotungovi tu tu pendura ozonḓuma zoye zokukara nomahakaeneno womonyama? Omutjange wEpsalme wa kumba ku Mukuru kutja: “Ndji tjaera kutja e ha kara nonyuṋe moviṋa vyomungandjo.”—Epsalme 119:37.

Kondja okuripura ohunga noviṋa vyarwe. Omurumendu omukambure wena William wa tja: “Ngunda au hi ya rara, lesa omambo nga zikamena kOmbeibela. Otjiṋa otjinanḓengu tjinene okulesa oviṋa mbya zikamena kOmbeibela ngunda eyuva roye ari ha yanda.”—Ovafilipi 4:8.

Hungira komundu ohunga nongaro ndjo. Okuṱohoṋi mape ya aku tjiti kutja i rire ouzeu kove okuhungira ohunga notjiṋa ho komundu ngu nongamburiro mo. Posi ya, okutjita nao maku yenene okukuvatera okutuurunga ongaro ndjo. Omurumendu omukambure wena David otja tjita. Eye wa tja: “Ami mba hungira ku na tate nu oviṋa mbye ndji raera himee zembi ko. Ngunda ama meṱameṱa we ndji raera kutja ‘wa tjiti otjiṋa otjiwa nu me tjaterwa.’ Eye aa tjiwa kutja katja ri otjiṋa otjipupu okuhungira ku ye ohunga notjiṋa ho. Ingo ya ri omayanḓiparisiro nge hepa nu tje ndji vatera kutja mbi kayende komurungu okutjita omarundurukiro.

“Tate we ndji raisira omazeva tjiva wOmbeibela nge ndji vatera okumuna kutja kawami omundu omuvi. Nu okuzambo, we ndji raisira omazeva warwe wOmbeibela nga tjita kutja mbi tjiwe kutja oviṋa mbyee tjiti vya ri ovivi. Eye we ndji raera kutja, ‘Ngatu hungire rukwao, nu o tjiti kutja tji wa putara otjiṋa ho tji ku wise momuinyo. Kondja nomasa otjikando tjarwe.’ ” David wa kayende komurungu okutja: “Okukara nomundu ngu ma tjiwa ohunga nouzeu wandje kwe ndji vatere tjinene.”

[Omambo wokehi]

ETJANGWA ENANḒENGU

“Taurira ozonḓuma zoumutanda, nu u ramangere ousemba nongamburiro norusuvero nohange puna imba mbe kwa ku Muhona nomutima omukohoke.”—2 Timoteus 2:22.

ONDUNGE

Kumba ngunda ozonḓero zokukara nomahakaeneno womonyama aze ha ririra ko ozonamasa. Ningira Jehova Mukuru okukupa “omasa nge kapita avihe” okutjinda omarorero ngo.​—2 Ovakorinte 4:7.

HAPO OVE OO TJIWA . . .?

Omundu ngamwa ngu ri otjingundi ma yenene okurira omukarere wozonḓuma ze zomahakaeneno womonyama. Posi ya, pe kambura omurumendu wakatjiri poo omukazendu wakatjiri, okukara nomeritjaerero nandarire mohamunika.

OMUKAMBO MBU MO SOKUTOORA!

Ami me yenene okuripurira koviṋa ovikohoke indu tji me ․․․․․

Moruveze rwokukongorera ozonḓuma zandje, me ․․․․․

Oviṋa mbi me vanga okupura omunene wandje, poo ovanene vandje ohunga nepu ndi ․․․․․

OVE U NOUMUNE UṊE?

● Ongwaye tje ri ounanḓengu okuzemburuka kutja Jehova u nonḓero ‘okutuisira’?—Epsalme 86:5.

● Mukuru, ngwa mema ovandu nonḓero yokukara nomahakaeneno womonyama, wina wa tja matu sokukara nomeritjaerero, ku nao ongamburiro iṋe ndje na yo move?

[Epu enanḓengu]

Okutuurunga ongaro ndjo kwa tjita kutja mbi kare nomeritjiviro omawa womomutima komurungu wa Jehova, nu iho otjiṋa otjinanḓengu.’’​—Sarah

[Otjiperendero]

Tji wa u ngunda amo tupuka, katji hee kutja mo sokuuta rukwao. Momuano otjingewo, tji wa utu okurinyandisa oviṋepo vyourumendu poo vyoukazendu rukwao, katji isa po omarundurukiro ngu wa tjita.