Ovahongonone va Jehova ve muna omambo nozovidio nḓa zikamena kOmbeibela morungovi tjinene. Posiya momahi omengi mouye, ovakambure ovakwetu kave yenene okuranda oindaneta. Nu varwe ve kara kotuveze potwingi oindaneta pu i wa, poo ku i kayenda kaṱiṱi, poo ve kara kotuveze ku ku hina oindaneta oparukaze.

 Posiya nai ovakambure ovakwetu ve yenena okunanena omambo nozovidio nḓa zikamena kOmbeibela mouyendjezewa wawo, nokuhina okuhepa oindaneta! Omomuano uṋe mu ve yenena okutjita nao?

 O-JW Box ke yandjewa kozombongo nḓe nouzeu woindaneta. Oko ka ungurwa noiriera (router device) ndji randwa kozonganda nḓe randisa omitwaro, nu mu nopragrama ndja twamewa i orupa ndu ungura nozokombiuta poBetel, kunao ve yenena okutwamo omambo nozovidio nḓe ri morungovi indwi jw.org moJW Box. Okamboksa akehe kekosa ozondola za Amerika ape 75.

 PEtuwo rOmerikotameneno ovakambure ovakwetu ve tjita kutja ozongoze zawo ze ungure kuna oka-JW Box, nu okuzambo ave nana omambo nozovidio nḓa zikamena kOmbeibela. Nandarire imba mbe nozongoze ozonguru ve yenena okutjita nao wina. Nandarire kutja ombongo kai na oindaneta, hapo oka-JW Box ke yenena vi okukara nomambo nozovidio ozombe? Orutavi romberoo ru hinda ozo-USB momueze auhe kozombongo, oka-USB akehe ke kosa $4, nu mu twa mewa oviungurisiwa ovipe mbi ri ko-jw.org ovakambure ovakwetu mu mave yenene okukanana okuza mo-JW Box.

 Hapo oka-JW Box ka vatera vi ovakambure ovakwetu? Nathan Adruandra, otjiuru tjeṱunḓu moDemocratic Republic of Congo, wa tja: “Mba kondja ovikando ovingi okunana okavidio nga ‘O Jehovah, . . . I Trust in You’ na inga Remember the Wife of Lot. Posiya ya ri ouzeu tjinene, nu otjiṋa hi aa tji ndji wisa momuinyo. Nai mbi yenena okunana ozovidio nḓa mongoze yandje, nu mena rouvidio mbwi otjovanene tu yenena okuhonga ovanatje vetu nawa.”

 Omurumendu omukambure moNigeria ngwa vatera ombongo okutwamo oka-JW Box wa tja: “Ovakambure ovakwetu ve vara oka-JW Box otjotjiyandjewa tjapeke okuza ku Jehova. Owo ve tjaterwa tjinene kutja ve yenena okunana omambo nozovidio okuza kOviungurisiwa vyetu vyokuhonga.”

 Ozo-JW Box 1 700 za hindwa kovakambure ovakwetu koAfrika, koOceania, na koSouth America, nu wina mape tjitwa ozondyero zokuyenena okuhinda ozo-JW Box kozombongo zarwe ozengi. Hapo ovimariva mbi ungura oviṋa avihe mbi vi za pi? Vi za moviyandjewa vyouharupu mbi yandjewa kouye auhe, nu ovengi ve yandja oviyandjewa vyouharupu mokuungurisa orungovi ndwi donate.ps8318.com. Okuhepa tjinene kouharupu weṋu mbo.