OVANDU TJIVA VE TJA KAKO. Onganga imwe ya tja, okupaha omuhunga mOmbeibela, ku ri tjimuna okuungurisa embo ekuru ndaa ri ungurisiwa mozombura nḓa 1920, okuhonga ohunga nounongo wovimemwa (chemistry). Omundu ngu hi nondengero kOmbeibela mape ya a pura kutja: ‘Ove mape ya oungurisa embo ekuru rozokombiuta, okupaha omuhunga ohunga nozokombiuta ozombe?’ Ihi matji raisa kutja, ovandu tjiva ve muna kutja Ombeibela embo ekuru navi, ndi u hina okuyenena okuungurisa.

Nu hapo ongwaye omundu tji mape ya a ungurisa embo ekuru nao, okupaha omuhunga mouye wounongo woviungurisiwa mbwa kayenda komurungu mbwi? Nu nandarire, motungovi otuingi mu yandjwa ounongo nomuhunga ohunga noviṋa mbi ṱuna kehupo retu ndino. Ozonongo nḓe tjiwa omuano ovandu mu ve ripura, nozonongo zehupo, novatjange vomambo ve raisiwa mozoprograma zotiivii. Nu ozonganda zomambo ze randisa omambo omengi wokurivatera omuini, nu ihi tji eta ovimariva ovingi kozongetjeva nḓo.

Nambano ongwaye tji matu sokuungurisa Ombeibela, embo nda tjangwa ozombura ape 2 000 nḓa kapita, ngunda ondjivisiro ombe aya takavara tjinene nao? Hapo ovapirure ngahino kave hungire ouatjiri nao, indu tji ve tja okupaha omuhunga membo ekuru nao, kwa sana nokuungurisa embo ekuru rounongo wovimemwa poo rozokombiuta? Posi yokutja omeripura otja ingo ye ri posyo. Ounongo wovimemwa nounongo moviungurisiwa vyouye wakandino u runduruka tjimanga, nu hapo ovihepwa vyovandu vya runduruka? Kako, ovandu ngamba ve paha omuhunga mehupo, nu ve vanga okukara nouṋingandu, nokuhupa mondjeverero. Wina ve vanga okukara nouṋingandu meṱunḓu, nomapanga omasemba.

Nandarire kutja Ombeibela embo ekuru tjinene, oro ri yandja omuhunga moviṋa otja imbyo, novingi vyarwe. Ombeibela wina i raisa kutja, oyo ya tjangwa nombatero yOmuute wetu. Oyo i tupa omuhunga mu ngamwa otjiṋa mehupo retu, nu i tupa omasa wokutjinda omauzeu. (2 Timoteus 3:16, 17) Nu kombanda yanao, Ombeibela i raisa kutja omirari vyayo kavi nomaandero, ovyo vi karerera! Ombeibela oini i tja: “Embo ra Ndjambi ri nomuinyo.”—Ovaheberi 4:12.

Hapo oviṋa Ombeibela mbi i hungira ouatjiri? Oyo tjiri kai yenene okuungurisiwa ndino? Poo hapo Ombeibela i nondjivisiro onanḓengu, nu ndji matu yenene okuungurisa ndino? Ondando yokambo nga, oyokukuvatera okumuna omaziriro komapuriro nga.