Tji mo vanga okutjiwa omundu, mape ya rutenga mo mu pura kutja, “Ena roye otjikwaye?” Hapo tji wa pura Mukuru epuriro ndo, eye ma tja vi kove?

“OwAmi Jehova. Indi ena randje.”​—Jesaja 42:8, NW.

Ena ra Mukuru enanḓengu tjinene ku ye omuini. Kape nomundu ngwa yandja ena ndi ku Mukuru. Oro ena nda toorora omuini. Jehova wa tja: “Ena randje ri ri nai nga aruhe, noro mari zemburukwa okuza komihoko nga komihoko.” (Eksodus 3:15) MOmbeibela, ena ra Mukuru ri munika povikando ovingi okukapita omaisaneno wondjozikiro tjimuna, Omunamasaaehe, Tate, Muhona poo Mukuru. Nu ri munikwa tjinene kombanda yomana wovandu tjimuna, Abraham, Moses, David, poo Jesus. Kombanda yanao, Jehova u vanga kutja ena re ri tjiukwe. Ombeibela mai tja: “Ve tjiue, kutja Ove erike, ngu nena indi Jehova;: ingui Uokombanda kombanda jehi arihe.”​—Epsalme 83:19, EEP.

Ena ndo enanḓengu ku Jesus. Mongumbiro ndji isanewa “Tate yetu,” Jesus wa honga ovahongewa ve okukumba nai ku Mukuru: “Ena roye ngari yapurwe.” (Mateus 6:9) Jesus omuini wa kumba nai ku Mukuru: “Tate, yandja ondjozikiro kena roye!” (Johanes 12:28) Okuyozika ena ra Mukuru ya ri otjiṋa otjinanḓengu tjinene mehupo ra Jesus, nu opa zokukumba nai: “Ami mbe ve tjiukisa ena roye, nu me panḓere pokutjiukisa.”​—Johanes 17:26.

Ena ndi enanḓengu ku imba mbe tjiwa Mukuru. Ovakarere va Mukuru voruveze orukuru aave tjiwa kutja ondjeverero nondjamo aai zu mena ra Mukruru. “Ena ra Muhona oro otjiretundu otjinamasa; omusemba ma taurire ku tjo na kamuna ko omaundiro.” (Omiano 18:10) “Auhe ngu ma isana ena ra Muhona ma hupisiwa.” (Joel 2:32) Ombeibela i raisa kutja ena ra Mukuru okukutjiukirwa imba mbe mu karera. “Otjiwaṋa atjihe matji rikotamene natji kara nonḓuviro komukuru watjo wotjisenginina, nungwari eṱe matu rikotamene natu  kara nonḓuviro ku Muhona [poo ‘Jehova,’ NW] Ndjambi wetu nga ko nga aruhe.”—Mika 4:5; Oviungura 15:14.

Ena ra Mukuru ri mu tjiukisa kourike we. Ovakonḓonone ovengi ve muna kutja ena ndi Jehova ri heya “Eye u yenenisa atjihe tje ripurire ko.” Jehova we tu kahururira omaheero wena re indu tja hungira ku Moses ohunga naye omuini na tja: “Ami owAmi ngwi ngu mbi ri Ami.” (Eksodus 3:14) Okutja ena ra Mukuru ri tu raera ovingi kombanda yotjiungura tje otjOmuute woviṋa avihe. Oro wina ri raisa omasa we wokuyenena okutjita kutja eye omuini noviutwa vye, vi rire tjamwa otjiṋa tji matji heperwa po kutja ma yenenise ondando ye. Nandarire kutja omaisaneno wondjozikiro ye yenena okukahurura otjihako poo omasa wa Mukuru, ena re Jehova porwe, ondi raisa oviṋa avihe eye mbye kuramena po, noviṋa mbye yenena okurira.

Ena re ri raisa kutja eye u nonḓero mweṱe. Omaheero wena ra Mukuru ye kuramena po orusuvero poo ouṱakame we koviutwa vye. Nu wina, Mukuru tja tjiukisa ena re kweṱe ku raisa kutja eye u vanga kutja tu mu tjiwe. Nu nandarire eye omuini wa toora omukambo omutenga wokuturaera ena re ngunda atu hiye mu pura. Oukahu kutja Mukuru ka vanga kutja tu mu vare otjomundu poo omukuru ngu ri kokure na eṱe, nungwari u vanga kutja tu mu vare otjOmundu ngu matu yenene okukara noupanga wopopezu kuna ye.​—Epsalme 73:28.

Okuungurisa ena ra Mukuru ku raisa onḓero yetu mu ye. Okusasaneka, mape ya oningire omundu ngu mo vanga kutja ma rire epanga roye kutja me ku isane kena roye. Nu hapo mo munu ko vi omundu ngo tji ma panḓa okuungurisa ena roye? Kombunda mape ya outu okuhimwa kutja omundu ngo u vanga okurira epanga roye tjiri. Otjiperi nao wina ohunga na Mukuru. Jehova wa raera ena re kovandu, neye u vanga kutja tu riungurise. Tji matu ungurisa ena re, tu mu raisira kutja tu vanga okutumbuka popezu na ye. Eye nandarire u muna imba “mbe yozike ena re.”​—Maleaki 3:16.

Omukambo omutenga nomunanḓengu mbu mau tu vatere okutjiwa Mukuru, okutjiwa ena re. Posi yokutja katu sokuyandera mbo. Matu sokurihonga ovingi ohunga nOmundu ngu nena ndo. Matu sokurihonga kutja eye omundu wovikaṋena mbya sana pi.