Indu omatondero tji ye hi nokukara po nga aruhe
Nandarire kutja twa isa okutonda ovandu, eṱe kamaatu yenene okutjaera varwe ongondoroka na eṱe okutonda varwe. Ovandu mbe hi nondjo ve kayenda komurungu okutondwa. Nu hapo otjikwaye tji matji yenene okuyandisa omatondero nga oparukaze?
Jehova Mukuru erike ongu ma yenene okuisa po omatondero ayehe ngu tu muna ndino. Imbi ooviṋa Ombeibela mbya kwizika kutja eye ma tjiti.—Omiano 20:22.
MUKURU MA YANDISA OVIṊA MBI ETA OMATONDERO
-
1. SATAN OMUDIABOLI. Satan omuengeli omupirukire ongu eta omatondero ngu tu muna ndino. Mukuru ma nyono Satan na imba mbe tonda varwe tjimuna ye.—Epsalme 37:38; Ovaroma 16:20.
-
2. OUYE OURUNDE WA SATAN MBWE URA NOMATONDERO. Mukuru me kanyona oviṋa avihe mbi eta omatondero. Ovyo mavi kamburire mo ovanane vozopolotika, novanane vozongamburiro mbe tjita kutja ku kare nomatondero. Mukuru wina me kanyona ozongetjefa nḓe nomunenetima, novandu mbe hi nouatjiri.—2 Petrus 3:13.
-
3. OVANDU MBE HE RI OHOMONENA. Ombeibela i kahurura kutja ovandu avehe va rumata ouvi. (Ovaroma 5:12) Ku nao, eṱe potuingi tu ripura, okufula, nokutjita oviṋa ovivi. Okukara nomeripura omavi nokuraisa okutonda varwe otjiṋa tjimwe tjouvi. Mukuru ma vatere ovandu okuisa ozongaro azehe ozombi kokutja ape ha kara omatondero oparukaze.—Jesaja 54:13.
OMBEIBELA YA KWIZIKA OUYE MU MU HI NOKUKARA OMATONDERO
-
1. KAPE NOKUKARA OUHASEMBA. Ouhona wa Mukuru mau honapara kombanda yehi arihe. Owo mau honaparere okuza meyuru nu mau eta ousemba nga aruhe. (Daniel 2:44) Ombangu youmuhokohoko kai nokukara po rukwao. Mukuru ma kaisa po ouhasemba auhe ovandu mbu ve muna nai.—Lukas 18:7.
-
2. OVANDU AVEHE MAVE KARA MOHANGE. Kape nomundu ngu ma kamuna ouzeu mbu etwa i yovita noutwe. (Epsalme 46:9) Ovandu avehe kombanda yehi mave kara norusuvero rwohange, ku nao oro maru rire oruveze rwondjeverero okutura mo.—Epsalme 72:7.
-
3. OVANDU AVEHE MAVE HUPU ORURE MONGARO OMBWA. Ovandu avehe mave raisasana orusuvero rwatjiri. (Mateus 22:39) Kape nomundu ngu ma kakara mombameno poo ngu ma kakara nomeripura omavi. (Jesaja 65:17) Indu omatondero ayehe tji yanda, ovandu “mave vyarere ohange onene.”—Epsalme 37:11.
Hapo ove mo vanga okuhupa mouye tjimuna mbwo? Nandarire nai, ovandu ovengi ve rihonga okuisa okutonda mokuṱakamisa omirari vyOmbeibela. (Epsalme 37:8) Imbi ooviṋa Ovahongonone va Jehova mbi ve tjita ongondoroka mouye. Nandarire kutja owo va za kozombazu pekepeke nomekurisiro nga panguka, owo ve nombwaneno nu ve raisasana orusuvero.—Jesaja 2:2-4.
Ovahongonone va Jehova mave kara nohange okuhaṋasana oviṋa mbi ve rihonga ohunga nomuano wokutuurunga ouhasemba nombangu ndji tjitwa. Oviṋa mbi mo rihongo mavi ku vatere okuisa okutonda nokuuta okusuvera. Ove mo rihongo omuano wokuraisa orusuvero, nandarire ku imba mbe hi nondangi poo mbe tonda varwe. Mena ranao, ove mo kara nondjoroka nai nu mo kara noupanga ouwa ku na varwe. Kombanda yaavihe, ove mo rihongo oviṋa mbi mo yenene okutjita kutja u hupe kehi yOuhona wa Mukuru, indu ovandu tji ve hi nokutondasana rukwao nga aruhe.—Epsalme 37:29.
Mo yenene okutara ku imbi wina
ORUHUNGU
Ouhona wa Mukuru mau yenenisa ye?
Jesus aa tjiwa kutja Ouhona wa Mukuru oohoromende aiyerike ndji mai yenene okuisapo omauzeu kombanda yehi. Otjikeṋa Ouhona mbo mbu wa yenenisa mbi mavi kurisa ongamburiro yetu?
