2 | ‘Omapandiparisiro ngu twa pewa i yomatjangwa’
OMBEIBELA I TJA: “Omambo aehe nga tjangwa mOmatjangwa ya tjangerwa okutuhonga, kokutja tu kare nomaundjiro, nga zikama mouretima na momapandiparisiro ngu twa pewa i Omatjangwa.” —OVAROMA 15:4.
Etjangwa ndi mari hee ye?
Ombeibela i tu tunduuza nomambo omayanḓiparise nge yenena okutuvatera, indu tji matu ripura noviṋa ovivi. Ombuze yOmbeibela wina i tu pa omaundjiro wokutja omihihamo kavi nokukakara po rukwao moruyaveze.
Omomuano uṋe okuṱakamisa etjangwa ndi mu maku tu vatere?
Povikando tjiva eṱe katu kara nondjoroka, posi ya imba mbe nombameno momuinyo nomerikendero ve kara nomihihamo eyuva arihe. Ombeibela mai yenene vi okuvevatera?
Ombeibela i yandja oumune ouingi ouwa mbu yenena okurundurura omeripura omavi. (Ovafilipi 4:8) Oyo i yenena okutuvatera kutja tu kare noumune ouwa, mbu tjita kutja tu kare nomeritjaerero ohunga noviṋa mbi matu ripura.—Epsalme 94:18, 19.
Ombeibela i yenena okutuvatera kutja atu ha kara nomeripura wokutja kaweṱe ovananḓengu.—Lukas 12:6, 7.
Omazeva omengi mOmbeibela ye tu tunduuza kutja kaweṱe atu erike, nokutja Mukuru Omuute wetu, eye u tjiwa omuano mbu tu fula.—Epsalme 34:18; 1 Johanes 3:19, 20.
Ombeibela ya kwizika kutja Mukuru ma kaisa po omeripura omavi. (Jesaja 65:17; Omavandururiro 21:4) Indu tji tu kondja nomeripura omavi nomihihamo, omakwizikiro nga maye yenene okutupa omasa kutja tu kayende komurungu.
