Ritoororera omuini pokati kouwa nouvi
Omirari mbi tu kongorera mehupo mavi tjiti kutja tu kare nondjoroka poo atu ha kara nondjoroka. Jehova Mukuru u tjiwa otjiṋa ho. Ku nao ope zokuvanga kutja tu hupe otja komirari vye.
Jehova u vanga kutja tu kare nehupo rohange nondjoroka.
“OwAmi Muhona Ndjambi woye, ngu mbi vanga okukuhonga ihi tji tji ri ombatero kove, nu ngu me ku urikire ondjira mu mo sokuryanga. Andakuzu wa puratena komatwako wandje, indino ouṋingandu itjau pupira kove otja onḓonḓu ndji ha pwire, ousemba itjau ya kove otja ozongazona nḓe ritona komukuro.”—Jesaja 48:17, 18.
OtjOmuute wetu, Mukuru ma tjiwa omuano omusemba eṱe mu tu sokuhupa. Eye u vanga kutja tu kongorere omuhunga we mena rokutja maku tu etere ouwa. Indu tji twa kongorere omatwako wa Mukuru, eṱe katu nokuhepa okuripura kutja omikambo mbi twa toora mavi tu etere ouwa. Eṱe aruhe matu toora omukambo omusemba mbu mau tu etere ohange nondjoroka.
Jehova ke tu ningire okutjita oviṋa eṱe mbi tu hi nokuyenena okutjita.
“Etwako, ndi me ku rakiza ndinondi, kazeu kove nu kari ri kokure.”—Deuteronomium 30:11.
Kutja tu hupe otja komirari vya Mukuru mape ya atu hepa okurundurura omuano mbu tu ripura novitjitwa vyetu. Posi yokutja, Jehova ka undjire ko ovingi kweṱe. Otjomuute wetu eye ma tjiwa imbi mbi matu yenene okutjita. Nu otja tji matu rihongo ohunga na Jehova, matu munu kutja ‘omatwako we kamazeu okuyeṱakamisa.’—1 Johanes 5:3.
Jehova wa kwizika okuvatera imba mbe toorora okuhupa otja komirari vye.
“OwAmi Muhona, Ndjambi woye; me ku zeuparisa ne tja: ‘O tira, Ami me ku vatere.’”—Jesaja 41:13.
Eṱe matu yenene okuhupa omuano Mukuru mbu ma vanga kutja tu hupe mena rokutja eye me tu vatere. Eye ma yenene okutuvatera okupitira mEmbo re Ombeibela, ndji tu tunduuza nokutupa omaundjiro.
Omangete wovandu mouye va muna kutja okuhupa otja komirari vyOmbeibela kwa rundurura ehupo rawo. Rihonga ovingi ohunga nomaronga omawa nge ri mOmbeibela. Ove mo yenene okuuta okutjita nao mokukonḓonona okambo ku ka zikamena kOmbeibela nga Yorokera ehupo nga aruhe, mo ke vaza otjari ko jw.org. Oko ke nomapu nga:
-
Hapo Ombeibela mai yenene okukuvatera vi?
-
Ombeibela i tu pa omaundjiro
-
Mo yenene okukambura mOmbeibela?
Otja tji mo konḓonona Embo ra Mukuru Ombeibela, ove mo kamuna kutja nandarire kutja embo ekuru, oro ra “zikama aruhe nga aruhe.” (Epsalme 111:8, ONT) Okukongorera omirari mbi ri mOmbeibela oomuano omusemba wokuhupa. Posi yokutja, Mukuru kemee tu ṋiṋikiza okutjita nao. (Deuteronomium 30:19, 20; Josua 24:15) Auhe wetu ma sokuritoororera omuini kutja ma kongorere omirari mbyo poo indee.
