HAPO U NOZONDANDO ZA TJIRI KORUYAVEZE ROYE? Ovandu tjiva ve muna kutja ka hepero okutwapo ozondando, orondu kave nokutjiwa kutja muhuka mari eta ye. Indu tji ve ha toṋene mondando imwe poo ongwao, owo ve yumba ohama nokurihahiza. Nu ve tja,“ Okutja ka tja ri ama tji sokutjitwa!”

Varwe ve wa momiinyo indu tji mave munu oṋiṋikizire youye ouhasemba mu twa tura mbwi, mbu ve ha yenene okuyepa. Tjiva ve kondja okurihupisa nawa, posi yokutja oviṋa tjimuna ovita, ozondjito zoutwe, oviwonga, nomauvere vi teya ozondando zawo aruhe. Owo ve uta okuripura kutja: ‘Me u hara ame ungura ye rukwao?’

Omambo tjiri kutja ovipwite mehupo vi yenena okuhanda ozondando zoye. (Omuzuvarise 9:11) Posi yokutja, tji pe ya koruyaveze roye orukarerere, mosokukara nozondando za tjiri. Ombeibela i raisa kutja oruyaveze roye ru rekareka kozondando nḓu mo toora. Tara ku imbi mbi i heya.

Moses, ngwa hongorere otjiwaṋa tja Israel otjikuru, wa raera ovandu tji va ri pokuhita mEhi rOruyano na tja: “Omuinyo nonḓiro, nondaya nosengiro ami mbe mu raisira. Ritoororera omuinyo ove nozondekurona zoye kutja mu hupe. Suvera Muhona, Ndjambi woye, puratena keraka re, nu panḓera pu Ye.”​—Deuteronomium 30:15, 19, 20.

“Omuinyo nonḓiro, nondaya nosengiro ami mbe mu raisira. Ritoororera omuinyo.”​—Deuteronomium 30:19

Ii! Mukuru wa kutura Ovaisrael koukarere wa Engipte nu e ve raisire onguturiro noruyaveze rouṋingandu mEhi rOruyano. Posi yokutja kave nokumuna oviṋa mbi nao uriri. Kutja ve mune ozondaya nḓo, aave ‘sokuritoororera omuinyo.’ Omomuano uṋe? ‘Omokusuvera Muhona, Ndjambi wawo, nokupuratena keraka re, nokupanḓera pu Ye.’

Ndino, ove u ri mongaro ndjo wina, nu ozondando nḓu mo toora o ku maku rekareka oruyaveze roye. Mokusuvera Muhona, nokupuratena keraka re, nokupanḓera pu ye, okutja nao wa toorora okukahupa nga aruhe mOparadisa. Hapo nu omikambo mbi vi kamburira mo ye?

Orusuvero ootjikaṋena otjinenenene tja Mukuru. Omuapostele Johanes wa tjanga kutja. “Ndjambi tjinga e ri orusuvero,” (1 Johanes 4:8) Nandarire Jesus o pa zokuzira nai, tja purwa kutja etwako enenenene ooriṋe: “Suvera Muhona Ndjambi woye nomutima woye auhe nomuinyo woye auhe nozondunge zoye azehe.” (Mateus 22:37) Oupanga wa tjiri kuna Jehova mau sokuzikamena korusuvero, nungwari ka mena rondira nonḓuviro ya kauriri. Nu hapo ongwaye tji twa sokutoorora okusuvera Mukuru?

Jehova wa suvera ovandu tjinene tjimuna ovanene tji ve suvera ovanatje va wo. Nandarire kutja ovanene mba suvera ovanatje vawo ovahahomonena, owo ve honga, nokuvetunduuza, nokuvevyura mena rokutja owo ve vanga kutja ve kare nondjoroka nokurira ovaṋingandu. Nu ovanene ve undjira ko tjike kovanatje vawo? Owo ve vanga kutja ovanatje vawo ve ve suvere, nokuungurisa ondjiviro ndji ve ve honga kutja ve ṋingapare. Momuano tjinge wo, Tate wetu womeyuru u undjira kokutja tu raise orusuvero ondangi koviṋa avihe mbye tu tjitira?

Meraka rOmbeibela, embo ndi “puratena” ri he ya “onḓuviro.” Nu tjiri otji tu he ya tji matu tja, “Puratena  kovanene voye”? Okutja okupuratena ku Mukuru nokukara nonḓuviro komarakiza we. Kutja ka tu zuu eraka ra Mukuru omuini a ma hungire, tu puratena ku ye mokulesa Ombeibela nokuṱakamisa imbi mbi matu rihongo mo.​—1 Johanes 5:3.

Okuṋuṋisa ounanḓengu wokupuratena keraka ra Mukuru, otjikando tjimwe Jesus wa tja: “Omundu ka hupu momboroto porwayo, nungwari u hupisiwa i embo arihe Ndjambi ndi ma hungire.” (Mateus 4:4) Omuano ovikurya mbi tu rya mu vi ri ovinanḓengu, okutoora ondjiviro yembo ra Mukuru wina ounanḓengu tjinene. Omena ra ye? Ombara Salomo wa tja: “Ovimariva punga avi yandja ondjamo, ounongo opunga au yama wina; nungwari otjiṋa otjinanḓengu kondjiviro otjo hi; Ounongo u ṱakamisira omuini wawo omuinyo.” (Omuzuvarise 7:12) Ounongo nondjiviro ya Mukuru ma vi yenene okutuṱakamisa ndino nu ma vi tu vatere okutoora ozondando nḓu ma ze tu etere omuinyo waaruhe.

Zemburuka otjisasanekero tja Jesus ku twa tara morupa ndwa kapita indu tja tja: “Omuvero mbwi mbu twara komuinyo owo omumango, nondjira ndji yenda ngo i neputi, novehinanḓengu imba mbe i muna.” (Mateus 7:13, 14) Okukaenda mondjira ndjo, tjiri matu ṋingapara mokukara popezu nomuhongore onongo ndovazu matu vanga okukamuna omuinyo waaruhe. Okutja tjiri tu nepu ewa ndi matu sokupanḓera pu Mukuru. (Epsalme 16:8) Nu ihi matu tji tjiti vi?

Eyuva arihe, pe noviṋa mbi twa sokutjita na vyarwe ovingi mbya tja tu vanga okutjita. Oviṋa mbi vi tu handa tjinene poo ka vi tu yandjere kutja tu twepo oruveze rwokutjita imbi Mukuru mbye vanga kutja tu tjite. Ombeibela o pu i zu okutuzemburukisa nai: “Ṱakamiseye kutja mamu kara nongarero ndja sana pi. Amu kara otja ovandu mbe hi nozondunge, nungwari kareye otja ovanazondunge. Unguriseye oruveze ndu mu na rwo momuhingo omusemba, tjinga atu ri momayuva omavi.” (Ovaefese 5:15, 16) Tu panḓera pu Mukuru mokupamisa oupanga wetu kuna ye, otjotjiṋa otjinahepero momuinyo wetu.​—Mateus 6:33.

Otjiperi kutja ko notjiṋa okutjita okurundurura orukapitaveze rwoye, nungwari pe noviṋa mbi mo yenene okutjita kutja ove novasuverwa voye mu kare noruyaveze oruwa rwondjeverero. Ombeibela i raisa kutja Tate wetu womeyuru, Jehova Mukuru, wetu suvera tjinene nu u tu raera avihe mbye vanga okutumuna ama tu tjiti. Zemburuka omambo wa Mika nga:

“Ayee indee! Atjihe otjiwa eṱe twa tjivisiwa. Ihi Muhona tji ma ningire ku eṱe otjo hi: Okutjita ousemba, nokuramanga morusuvero orukohoke, nokuryanga momerisusuparisiro komurungu waNdjambi wetu.”​—Mika 6:8.

Hapo ove mo yakura omaṋangero wa Jehova wokukayenda puna ye kutja u mune ozondaya ozongarerere? Tja sewa kove!