Ndovazu Mukuru kangu eta omauzeu, hapo oviṋa avihe tjimuna ondjara, ousyona, ovita, omitjise, noviwonga vi etwa i uṋe? Embo ra Mukuru, Ombeibela ri tu honga oviṋa vitatu mbi tjita kutja ovandu ve mune ouzeu:

1. Okuripurira kove omuini, omunenetima nonyengo. “Omundu umwe rumwe u honaparera omukwao nga tji ma humapara.” (Omuzuvarise 8:9) Ovandu potuingi ve muna ouzeu mena rokutumbwa navi i ovandu mbe he ri ohomonena, mbe ripurira ku wo oveni, poo mbe nongaro youtwe.

2. Oruveze novitjitwa mbi tu werereka. Ovandu potuingi ve muna ouzeu mena rokutja “oruveze rwokumuna ouhumandu ru ya ku wo avehe.” (Omuzuvarise 9:11) Ihi matji hee kutja ovandu ve kara poruveze oruvi moiri ndji he ri yo. Omaumba ye tjitwa ngunda atu hiya undjira ko, nu ovandu tjiva kave nakonatja nu varwe ve tjita ozondataiziro.

3. Omunane omurunde wouye mbwi. Ombeibela i tjiukisa omundu ngu eta omauzeu aehe kovandu. Oyo i tja: “Ouye auhe u ri kehi youhonapare waingwi umwe Omunaurunde.” (1 Johanes 5:19) “Omunaurunde” ngu ma tamunwa mbo oSatan Omudiaboli, otjiutwa tjombepo otjinamasa. Neye wa ri omuengeli wa Mukuru rukuru, posi yokutja “keya rora okuungurira ouatjiri.” (Johanes 8:44) Ovaengeli varwe ve rikuta kuna Satan okupirukira Mukuru kokutja ve yenenise ozonḓero zawo oveni, nowo ve ritjita oveni ozondemone. (Genesis 6:1-5) Okuza koruveze ndu va pirukira Mukuru, Satan nozondemone ze ve ungurisa omasa noutwe okuṋiṋikiza ovandu mouye okutjita ombango yawo. Nu imbi oviṋa mbi ve tjita tjinene moruveze rwetu ndwi. Nai Satan u nomazenge omanene nu u “pukisa ouye auhe,” nu ihi tja eta “owee” poo omazeu kouye auhe. (Omavandururiro 12:9, 12) Satan tjiri omunane ngu hi nombinḓu komutima. Eye u tjaterwa tji ma munu ovandu amave munu ouzeu. OSatan, nungwari ka Mukuru ngu eta omauzeu kovandu.

RIPURIRA KU IMBI: Omundu ngu ma tjiti kutja ovandu ovehinandjo ve mune ouzeu, ma sokurira omundu ngu hi nakonatja novandu, nu omurunde tjinene tjimuna Satan. Posi yokutja Ombeibela i tja: ‘Ndjambi orusuvero.’ (1 Johanes 4:8) Nu mena rongaro ye yorusuvero ndji “Ndjambi Omunamasaaehe ka tjiti ouvi nouhasemba.”—Job 34:10.

Posi yokutja mape ya o himwa kutja, ‘Hapo Mukuru Omunamasaaehe ma yandjere Satan, omunane omurunde ngwa sana ngo nga ruṋe?’ Otja tji twa munu, Mukuru wa tonda ourunde, nu u hihamwa tjinene tji me tu munu amatu munu ouzeu. Embo re komurungu ri tu tunduuza nomambo nga: “Omerikendero weṋu aehe yumbeye kombanda Ye, Eye tjinga e mu pa imbi mbi mwa hepa.” (1 Petrus 5:7) Mukuru we tu suvera nu u nomasa wokuisapo omauzeu nomauhasemba aehe moruyaveze ropopezu, otja orupa ndu maru kongorere ko tji maru ke tu kahururira nawa. *